၅. ရုဟကဝဂ္ဂေါ

၁၉၁. ရုဟကဇာတကံ (၂-၅-၁)

၈၁. အပိ [အမ္ဘော (သျာ. က. သီ.)] ရုဟက ဆိန္နာပိ၊ ဇိယာ သန္ဓီယတေ ပုန၊

သန္ဓီယဿု ပုရာဏိယာ၊ မာ ကောဓဿ ဝသံ ဂမိ.

၈၂. ဝိဇ္ဇမာနေသု ဝါကေသု [ဝိဇ္ဇမာနာသု မရုဝါသု (သီ.)၊ ဝိဇ္ဇမာနာသု မရူဒွါသု (ပီ.)]၊ ဝိဇ္ဇမာနေသု ကာရိသု၊

အညံ ဇိယံ ကရိဿာမိ၊ အလညေဝ ပုရာဏိယာတိ.

ရုဟကဇာတကံ ပဌမံ.

၁၉၂. သိရိကာဠကဏ္ဏိဇာတကံ (၂-၅-၂)

၈၃. ဣတ္ထီ သိယာ ရူပဝတီ၊ သာ စ သီလဝတီ သိယာ၊

ပုရိသော တံ န ဣစ္ဆေယျ၊ သဒ္ဒဟာသိ မဟောသဓ.

၈၄. သဒ္ဒဟာမိ မဟာရာဇ၊ ပုရိသော ဒုဗ္ဘဂေါ သိယာ၊

သိရီ စ ကာဠကဏ္ဏီ စ၊ န သမေန္တိ ကုဒါစနန္တိ.

သိရိကာဠကဏ္ဏိဇာတကံ ဒုတိယံ.

၁၉၃. စူဠပဒုမဇာတကံ (၂-၅-၃)

၈၅. အယမေဝ သာ အဟမပိ [အဟမ္ပိ (သီ. သျာ. ပီ.)၊ အဟသ္မိ (က.)] သော အနညော၊ အယမေဝ သော ဟတ္ထစ္ဆိန္နော အနညော၊

ယမာဟ ‘‘ကောမာရပတီ မမ’’န္တိ၊ ဝဇ္ဈိတ္ထိယော နတ္ထိ ဣတ္ထီသု သစ္စံ.

၈၆. ဣမဉ္စ ဇမ္မံ မုသလေန ဟန္တွာ၊ လုဒ္ဒံ ဆဝံ ပရဒါရူပသေဝိံ၊

ဣမိဿာ စ နံ ပါပပတိဗ္ဗတာယ၊ ဇီဝန္တိယာ ဆိန္ဒထ ကဏ္ဏနာသန္တိ.

စူဠပဒုမဇာတကံ တတိယံ.

၁၉၄. မဏိစောရဇာတကံ (၂-၅-၄)

၈၇. န သန္တိ ဒေဝါ ပဝသန္တိ နူန၊ န ဟိ နူန သန္တိ ဣဓ လောကပါလာ၊

သဟသာ ကရောန္တာနမသညတာနံ၊ န ဟိ နူန သန္တီ ပဋိသေဓိတာရော.

၈၈. အကာလေ ဝဿတီ တဿ၊ ကာလေ တဿ န ဝဿတိ၊

သဂ္ဂါ စ စဝတိ ဌာနာ၊ နနု သော တာဝတာ ဟတောတိ.

မဏိစောရဇာတကံ စတုတ္ထံ.

၁၉၅. ပဗ္ဗတူပတ္ထရဇာတကံ (၂-၅-၅)

၈၉. ပဗ္ဗတူပတ္ထရေ [ပဗ္ဗတပတ္ထရေ (သီ. သျာ. ပီ.)] ရမ္မေ၊ ဇာတာ ပေါက္ခရဏီ သိဝါ၊

တံ သိင်္ဂါလော အပါပါယိ [အပါပါသိ (သီ. သျာ. ပီ.)]၊ ဇာနံ သီဟေန ရက္ခိတံ.

၉၀. ပိဝန္တိ စေ [ပိဝန္တိ ဝေ (သီ.)၊ ပိဝန္တိဝ (ပီ.)၊ ပိဝန္တေဝ (?)] မဟာရာဇ၊ သာပဒါနိ မဟာနဒိံ၊

န တေန အနဒီ ဟောတိ၊ ခမဿု ယဒိ တေ ပိယာတိ.

ပဗ္ဗတူပတ္ထရ [ပဗ္ဗတပတ္ထရ (သီ. သျာ. ပီ.)] ဇာတကံ ပဉ္စမံ.

၁၉၆. ဝလာဟကဿဇာတကံ (၂-၅-၆)

၉၁. ယေ န ကာဟန္တိ ဩဝါဒံ၊ နရာ ဗုဒ္ဓေန ဒေသိတံ၊

ဗျသနံ တေ ဂမိဿန္တိ၊ ရက္ခသီဟိဝ ဝါဏိဇာ.

၉၂. ယေ စ ကာဟန္တိ ဩဝါဒံ၊ နရာ ဗုဒ္ဓေန ဒေသိတံ၊

သောတ္ထိံ ပါရံ ဂမိဿန္တိ၊ ဝလာဟေနေဝ [ဝါလာဟေနေဝ (သီ. ပီ.)] ဝါဏိဇာတိ.

ဝလာဟကဿ [ဝါလာဟဿ (သီ. ပီ.)] ဇာတကံ ဆဋ္ဌံ.

၁၉၇. မိတ္တာမိတ္တဇာတကံ (၂-၅-၇)

၉၃. န နံ ဥမှယတေ ဒိသွာ၊ န စ နံ ပဋိနန္ဒတိ၊

စက္ခူနိ စဿ န ဒဒါတိ၊ ပဋိလောမဉ္စ ဝတ္တတိ.

၉၄. ဧတေ ဘဝန္တိ အာကာရာ၊ အမိတ္တသ္မိံ ပတိဋ္ဌိတာ၊

ယေဟိ အမိတ္တံ ဇာနေယျ၊ ဒိသွာ သုတွာ စ ပဏ္ဍိတောတိ.

မိတ္တာမိတ္တဇာတကံ သတ္တမံ.

၁၉၈. ရာဓဇာတကံ (၂-၅-၈)

၉၅. ပဝါသာ အာဂတော တာတ၊ ဣဒါနိ နစိရာဂတော၊

ကစ္စိန္နု တာတ တေ မာတာ၊ န အညမုပသေဝတိ.

၉၆. န ခေါ ပနေတံ သုဘဏံ၊ ဂိရံ သစ္စုပသံဟိတံ၊

သယေထ ပေါဋ္ဌပါဒေါဝ၊ မုမ္မုရေ [မုမ္မုရေ (သျာ.)၊ မံ ပုရေ (က.) မုမ္မုရသဒ္ဒေါ ထုသဂ္ဂိမှိ ကုက္ကုဠေ စ ဝတ္တတီတိ သက္ကတာဘိဓာနေသု] ဥပကူထိတောတိ [ဥပကူသိတောတိ (သီ. သျာ. ပီ.)၊ ဥပကူလိတော (က.)].

ရာဓဇာတကံ အဋ္ဌမံ.

၁၉၉. ဂဟပတိဇာတကံ (၂-၅-၉)

၉၇. ဥဘယံ မေ န ခမတိ၊ ဥဘယံ မေ န ရုစ္စတိ၊

ယာစာယံ ကောဋ္ဌမောတိဏ္ဏာ၊ နာဒ္ဒသံ ဣတိ ဘာသတိ.

၉၈. တံ တံ ဂါမပတိ ဗြူမိ၊ ကဒရေ အပ္ပသ္မိ ဇီဝိတေ၊

ဒွေ မာသေ သင်္ဂရံ ကတွာ [ကာရံ ကတွာန (သီ. ပီ.)၊ သံကရံ ကတွာ (က.)]၊ မံသံ ဇရဂ္ဂဝံ ကိသံ၊

အပ္ပတ္တကာလေ စောဒေသိ၊ တမ္ပိ မယှံ န ရုစ္စတီတိ.

ဂဟပတိဇာတကံ နဝမံ.

၂၀၀. သာဓုသီလဇာတကံ (၂-၅-၁၀)

၉၉. သရီရဒဗျံ ဝုဍ္ဎဗျံ [ဝဒ္ဓဗျံ (သီ. ပီ.)]၊ သောဇစ္စံ သာဓုသီလိယံ၊

ဗြာဟ္မဏံ တေဝ ပုစ္ဆာမ၊ ကန္နု တေသံ ဝနိမှသေ [ဝဏိမှသေ (သီ. ပီ.)].

၁၀၀. အတ္ထော အတ္ထိ သရီရသ္မိံ၊ ဝုဍ္ဎဗျဿ နမော ကရေ၊

အတ္ထော အတ္ထိ သုဇာတသ္မိံ၊ သီလံ အသ္မာက ရုစ္စတီတိ.

သာဓုသီလဇာတကံ ဒသမံ.

ရုဟကဝဂ္ဂေါ ပဉ္စမော.

တဿုဒ္ဒါနံ –

အပိရုဟက ရူပဝတီ မုသလော၊ ပဝသန္တိ သပဉ္စမပေါက္ခရဏီ၊

အထ မုတ္တိမဝါဏိဇ ဥမှယတေ၊ စိရအာဂတ ကောဋ္ဌ သရီရ ဒသာတိ.