၄. အသဒိသဝဂ္ဂေါ

၁၈၁. အသဒိသဇာတကံ (၂-၄-၁)

၆၁. ဓနုဂ္ဂဟော အသဒိသော၊ ရာဇပုတ္တော မဟဗ္ဗလော၊

ဒူရေပါတီ အက္ခဏဝေဓီ၊ မဟာကာယပ္ပဒါလနော.

၆၂. သဗ္ဗာမိတ္တေ ရဏံ ကတွာ၊ န စ ကဉ္စိ ဝိဟေဌယိ၊

ဘာတရံ သောတ္ထိံ ကတွာန၊ သံယမံ အဇ္ဈုပါဂမီတိ.

အသဒိသဇာတကံ ပဌမံ.

၁၈၂. သင်္ဂါမာဝစရဇာတကံ (၂-၄-၂)

၆၃. သင်္ဂါမာဝစရော သူရော၊ ဗလဝါ ဣတိ ဝိဿုတော၊

ကိံ နု တောရဏမာသဇ္ဇ၊ ပဋိက္ကမသိ ကုဉ္ဇရ.

၆၄. ဩမဒ္ဒ ခိပ္ပံ ပလိဃံ၊ ဧသိကာနိ စ အဗ္ဗဟ [ဥဗ္ဗဟ (သျာ.)၊ အဗ္ဘုဟ (က.)]၊

တောရဏာနိ စ မဒ္ဒိတွာ၊ ခိပ္ပံ ပဝိသ ကုဉ္ဇရာတိ.

သင်္ဂါမာဝစရဇာတကံ ဒုတိယံ.

၁၈၃. ဝါလောဒကဇာတကံ (၂-၄-၃)

၆၅. ဝါလောဒကံ အပ္ပရသံ နိဟီနံ၊ ပိတွာ [ပီတွာ (သီ. ပီ.)] မဒေါ ဇာယတိ ဂဒြဘာနံ၊

ဣမဉ္စ ပိတွာန ရသံ ပဏီတံ၊ မဒေါ န သဉ္ဇာယတိ သိန္ဓဝါနံ.

၆၆. အပ္ပံ ပိဝိတွာန နိဟီနဇစ္စော၊ သော မဇ္ဇတီ တေန ဇနိန္ဒ ပုဋ္ဌော [ဖုဋ္ဌော (သီ. သျာ.)၊ မုဋ္ဌော (က.)]၊

ဓောရယှသီလီ စ ကုလမှိ ဇာတော၊ န မဇ္ဇတီ အဂ္ဂရသံ ပိဝိတွာတိ.

ဝါလောဒကဇာတကံ တတိယံ.

၁၈၄. ဂိရိဒတ္တဇာတကံ (၂-၄-၄)

၆၇. ဒူသိတော ဂိရိဒတ္တေန [ဂိရိဒန္တေန (ပီ.)]၊ ဟယော သာမဿ ပဏ္ဍဝေါ၊

ပေါရာဏံ ပကတိံ ဟိတွာ၊ တဿေဝါနုဝိဓိယျတိ [နုဝိဓီယတိ (သီ. ပီ.)].

၆၈. သစေ စ တနုဇော ပေါသော၊ သိခရာကာရ [သိင်္ဂါရာကာရ (သျာ.)] ကပ္ပိတော၊

အာနနေ နံ [တံ (သီ. သျာ. ပီ.)] ဂဟေတွာန၊ မဏ္ဍလေ ပရိဝတ္တယေ၊

ခိပ္ပမေဝ ပဟန္တွာန၊ တဿေဝါနုဝိဓိယျတီတိ.

ဂိရိဒတ္တဇာတကံ စတုတ္ထံ.

၁၈၅. အနဘိရတိဇာတကံ (၂-၄-၅)

၆၉. ယထောဒကေ အာဝိလေ အပ္ပသန္နေ၊ န ပဿတိ သိပ္ပိကသမ္ဗုကဉ္စ၊

သက္ခရံ ဝါလုကံ မစ္ဆဂုမ္ဗံ၊ ဧဝံ အာဝိလမှိ [အာဝိလေ ဟိ (သီ.)] စိတ္တေ၊

န ပဿတိ အတ္တဒတ္ထံ ပရတ္ထံ.

၇၀. ယထောဒကေ အစ္ဆေ ဝိပ္ပသန္နေ၊ သော ပဿတိ သိပ္ပိကသမ္ဗုကဉ္စ၊

သက္ခရံ ဝါလုကံ မစ္ဆဂုမ္ဗံ၊ ဧဝံ အနာဝိလမှိ စိတ္တေ၊

သော ပဿတိ အတ္တဒတ္ထံ ပရတ္ထန္တိ.

အနဘိရတိဇာတကံ ပဉ္စမံ.

၁၈၆. ဒဓိဝါဟနဇာတကံ (၂-၄-၆)

၇၁. ဝဏ္ဏဂန္ဓရသူပေတော၊ အမ္ဗောယံ အဟုဝါ ပုရေ၊

တမေဝ ပူဇံ လဘမာနော၊ ကေနမ္ဗော ကဋုကပ္ဖလော.

၇၂. ပုစိမန္ဒပရိဝါရော၊ အမ္ဗော တေ ဒဓိဝါဟန၊

မူလံ မူလေန သံသဋ္ဌံ၊ သာခါ သာခါ [သာခံ (သျာ. က.)] နိသေဝရေ [နိဝီသရေ (က.)]၊

အသာတသန္နိဝါသေန၊ တေနမ္ဗော ကဋုကပ္ဖလောတိ.

ဒဓိဝါဟနဇာတကံ ဆဋ္ဌံ.

၁၈၇. စတုမဋ္ဌဇာတကံ (၂-၄-၇)

၇၃. ဥစ္စေ ဝိဋဘိမာရုယှ၊ မန္တယဝှေါ ရဟောဂတာ၊

နီစေ ဩရုယှ မန္တဝှေါ၊ မိဂရာဇာပိ သောဿတိ.

၇၄. ယံ သုဝဏ္ဏော သုဝဏ္ဏေန [ယံ သုပဏ္ဏော သုပဏ္ဏေန (သီ. သျာ. ပီ.)]၊ ဒေဝေါ ဒေဝေန မန္တယေ၊

ကိံ တေတ္ထ စတုမဋ္ဌဿ၊ ဗိလံ ပဝိသ ဇမ္ဗုကာတိ.

စတုမဋ္ဌဇာတကံ သတ္တမံ.

၁၈၈. သီဟကောတ္ထုဇာတကံ (၂-၄-၈)

၇၅. သီဟင်္ဂုလီ သီဟနခေါ၊ သီဟပါဒပတိဋ္ဌိတော၊

သော သီဟော သီဟသံဃမှိ၊ ဧကော နဒတိ အညထာ.

၇၆. မာ တွံ နဒိ ရာဇပုတ္တ၊ အပ္ပသဒ္ဒေါ ဝနေ ဝသ၊

သရေန ခေါ [မာ (က.)] တံ ဇာနေယျုံ၊ န ဟိ တေ ပေတ္တိကော သရောတိ.

သီဟကောတ္ထုဇာတကံ အဋ္ဌမံ.

၁၈၉. သီဟစမ္မဇာတကံ (၂-၄-၉)

၇၇. နေတံ သီဟဿ နဒိတံ၊ န ဗျဂ္ဃဿ န [ဗျဂ္ဃဿ န စ (က.)] ဒီပိနော၊

ပါရုတော သီဟစမ္မေန၊ ဇမ္မော နဒတိ ဂဒြဘော.

၇၈. စိရမ္ပိ ခေါ တံ ခါဒေယျ၊ ဂဒြဘော ဟရိတံ ယဝံ၊

ပါရုတော သီဟစမ္မေန၊ ရဝမာနောဝ ဒူသယီတိ.

သီဟစမ္မဇာတကံ နဝမံ.

၁၉၀. သီလာနိသံသဇာတကံ (၂-၄-၁၀)

၇၉. ပဿ သဒ္ဓါယ သီလဿ၊ စာဂဿ စ အယံ ဖလံ၊

နာဂေါ နာဝါယ ဝဏ္ဏေန၊ သဒ္ဓံ ဝဟတုပါသကံ.

၈၀. သဗ္ဘိရေဝ သမာသေထ၊ သဗ္ဘိ ကုဗ္ဗေထ သန္ထဝံ၊

သတဉှိ သန္နိဝါသေန၊ သောတ္ထိံ ဂစ္ဆတိ နှာပိတောတိ.

သီလာနိသံသဇာတကံ ဒသမံ.

အသဒိသဝဂ္ဂေါ စတုတ္ထော.

တဿုဒ္ဒါနံ –

ဓနုဂ္ဂဟ ကုဉ္ဇရ အပ္ပရသော၊ ဂိရိဒတ္တမနာဝိလစိတ္တဝရံ၊

ဒဓိဝါဟန ဇမ္ဗူက သီဟနခေါ၊ ဟရိတယဝ နာဂဝရေန ဒသာတိ.