၃. ကလျာဏဝဂ္ဂေါ
၁၇၁. ကလျာဏဓမ္မဇာတကံ (၂-၃-၁)
၄၁. ကလျာဏဓမ္မောတိ ယဒါ ဇနိန္ဒ၊ လောကေ သမညံ အနုပါပုဏာတိ၊
တသ္မာ န ဟိယျေထ [ဟီယေထ (သီ.)] နရော သပညော၊ ဟိရိယာပိ သန္တော ဓုရမာဒိယန္တိ.
၄၂. သာယံ သမညာ ဣဓ မဇ္ဇ ပတ္တာ၊ ကလျာဏဓမ္မောတိ ဇနိန္ဒ လောကေ၊
တာဟံ သမေက္ခံ ဣဓ ပဗ္ဗဇိဿံ၊ န ဟိ မတ္ထိ ဆန္ဒော ဣဓ ကာမဘောဂေတိ.
ကလျာဏဓမ္မဇာတကံ ပဌမံ.
၁၇၂. ဒဒ္ဒရဇာတကံ (၂-၃-၂)
၄၃. ကော နု သဒ္ဒေန မဟတာ၊ အဘိနာဒေတိ ဒဒ္ဒရံ၊
တံ သီဟာ နပ္ပဋိနဒန္တိ [ကိံ သီဟာ နပ္ပဋိနဒန္တိ (သီ. ပီ.)၊ န သီဟာ ပဋိနဒန္တိ (က.)]၊ ကော နာမေသော မိဂါဓိဘူ.
၄၄. အဓမော မိဂဇာတာနံ၊ သိင်္ဂါလော တာတ ဝဿတိ၊
ဇာတိမဿ ဇိဂုစ္ဆန္တာ၊ တုဏှီ သီဟာ သမစ္ဆရေတိ.
ဒဒ္ဒရဇာတကံ ဒုတိယံ.
၁၇၃. မက္ကဋဇာတကံ (၂-၃-၃)
၄၅. တာတ မာဏဝကော ဧသော၊ တာလမူလံ အပဿိတော၊
အဂါရကဉ္စိဒံ အတ္ထိ၊ ဟန္ဒ ဒေမဿဂါရကံ.
၄၆. မာ ခေါ တွံ တာတ ပက္ကောသိ၊ ဒူသေယျ နော အဂါရကံ၊
နေတာဒိသံ မုခံ ဟောတိ၊ ဗြာဟ္မဏဿ သုသီလိနောတိ.
မက္ကဋဇာတကံ တတိယံ.
၁၇၄. ဒုဗ္ဘိယမက္ကဋဇာတကံ (၂-၃-၄)
၄၇. အဒမှ တေ ဝါရိ ပဟူတရူပံ၊ ဃမ္မာဘိတတ္တဿ ပိပါသိတဿ၊
သော ဒါနိ ပိတွာန [ပီတွာန (သီ. ပီ.)] ကိရိင်္ကရောသိ [ကိကိံကရောသိ (သီ. သျာ. ပီ.)]၊ အသင်္ဂမော ပါပဇနေန သေယျော.
၄၈. ကော တေ သုတော ဝါ ဒိဋ္ဌော ဝါ၊ သီလဝါ နာမ မက္ကဋော၊
ဣဒါနိ ခေါ တံ ဩဟစ္ဆံ [ဦဟစ္စ (သီ. ပီ.)၊ ဩဟစ္စံ (သျာ.)၊ ဥဟဇ္ဇံ (က.)]၊ ဧသာ အသ္မာက ဓမ္မတာတိ.
ဒုဗ္ဘိယမက္ကဋဇာတကံ စတုတ္ထံ.
၁၇၅. အာဒိစ္စုပဋ္ဌာနဇာတကံ (၂-၃-၅)
၄၉. သဗ္ဗေသု ကိရ ဘူတေသု၊ သန္တိ သီလသမာဟိတာ၊
ပဿ သာခါမိဂံ ဇမ္မံ၊ အာဒိစ္စမုပတိဋ္ဌတိ.
၅၀. နာဿ သီလံ ဝိဇာနာထ၊ အနညာယ ပသံသထ၊
အဂ္ဂိဟုတ္တဉ္စ ဥဟန္နံ [ဦဟန္တံ (သီ.)၊ ဦဟနံ (သျာ.)၊ ဦဟန္တိ (ပီ.)၊ ဥဟဒံ (က.)]၊ ဒွေ စ ဘိန္နာ ကမဏ္ဍလူတိ.
အာဒိစ္စုပဋ္ဌာနဇာတကံ ပဉ္စမံ.
၁၇၆. ကဠာယမုဋ္ဌိဇာတကံ (၂-၃-၆)
၅၁. ဗာလော ဝတာယံ ဒုမသာခဂေါစရော၊ ပညာ ဇနိန္ဒ နယိမဿ ဝိဇ္ဇတိ၊
ကဠာယမုဋ္ဌိံ [ကလာယမုဋ္ဌိံ (သီ. ပီ.)] အဝကိရိယ ကေဝလံ၊ ဧကံ ကဠာယံ ပတိတံ ဂဝေသတိ.
၅၂. ဧဝမေဝ မယံ ရာဇ၊ ယေ စညေ အတိလောဘိနော၊
အပ္ပေန ဗဟုံ ဇိယျာမ၊ ကဠာယေနေဝ ဝါနရောတိ.
ကဠာယမုဋ္ဌိဇာတကံ ဆဋ္ဌံ.
၁၇၇. တိန္ဒုကဇာတကံ (၂-၃-၇)
၅၃. ဓနုဟတ္ထကလာပေဟိ၊ နေတ္တိံ သဝရဓာရိဘိ၊
သမန္တာ ပရိကိဏ္ဏမှ၊ ကထံ မောက္ခော ဘဝိဿတိ.
၅၄. အပ္ပေဝ ဗဟုကိစ္စာနံ၊ အတ္ထော ဇာယေထ ကောစိ နံ၊
အတ္ထိ ရုက္ခဿ အစ္ဆိန္နံ၊ ခဇ္ဇထညေဝ တိန္ဒုကန္တိ.
တိန္ဒုကဇာတကံ သတ္တမံ.
၁၇၈. ကစ္ဆပဇာတကံ (၂-၃-၈)
၅၅. ဇနိတ္တံ မေ ဘဝိတ္တံ မေ၊ ဣတိ ပင်္ကေ အဝဿယိံ၊
တံ မံ ပင်္ကော အဇ္ဈဘဝိ၊ ယထာ ဒုဗ္ဗလကံ တထာ၊
တံ တံ ဝဒါမိ ဘဂ္ဂဝ၊ သုဏောဟိ ဝစနံ မမ.
၅၆. ဂါမေ ဝါ ယဒိ ဝါ ရညေ၊ သုခံ ယတြာဓိဂစ္ဆတိ၊
တံ ဇနိတ္တံ ဘဝိတ္တဉ္စ၊ ပုရိသဿ ပဇာနတော၊
ယမှိ ဇီဝေ တမှိ ဂစ္ဆေ၊ န နိကေတဟတော သိယာတိ.
ကစ္ဆပဇာတကံ အဋ္ဌမံ.
၁၇၉. သတဓမ္မဇာတကံ (၂-၃-၉)
၅၇. တဉ္စ အပ္ပဉ္စ ဥစ္ဆိဋ္ဌံ၊ တဉ္စ ကိစ္ဆေန နော အဒါ၊
သောဟံ ဗြာဟ္မဏဇာတိကော၊ ယံ ဘုတ္တံ တမ္ပိ ဥဂ္ဂတံ.
၅၈. ဧဝံ ဓမ္မံ နိရံကတွာ [နိရာကတွာ (?) နိ + အာ + ကရ + တွာ]၊ ယော အဓမ္မေန ဇီဝတိ၊
သတဓမ္မောဝ လာဘေန၊ လဒ္ဓေနပိ န နန္ဒတီတိ.
သတဓမ္မဇာတကံ နဝမံ.
၁၈၀. ဒုဒ္ဒဒဇာတကံ (၂-၃-၁၀)
၅၉. ဒုဒ္ဒဒံ ဒဒမာနာနံ၊ ဒုက္ကရံ ကမ္မ ကုဗ္ဗတံ၊
အသန္တော နာနုကုဗ္ဗန္တိ၊ သတံ ဓမ္မော ဒုရန္နယော.
၆၀. တသ္မာ သတဉ္စ အသတံ၊ နာနာ ဟောတိ ဣတော ဂတိ၊
အသန္တော နိရယံ ယန္တိ၊ သန္တော သဂ္ဂပရာယဏာတိ [ပရာယနာ (သျာ. က.)].
ဒုဒ္ဒဒဇာတကံ ဒသမံ.
ကလျာဏဝဂ္ဂေါ တတိယော.
တဿုဒ္ဒါနံ –
သုသမညမိဂါဓိဘူ မာဏဝကော၊ ဝါရိပဟူတရူပါဒိစ္စုပဋ္ဌာနာ၊
သကဠာယသတိန္ဒုကပင်္က ပုန၊ သတဓမ္မ သုဒုဒ္ဒဒကေန ဒသာတိ.