၂. သန္ထဝဝဂ္ဂေါ

၁၆၁. ဣန္ဒသမာနဂေါတ္တဇာတကံ (၂-၂-၁)

၂၁. န သန္ထဝံ [သန္ဓဝံ (က.)] ကာပုရိသေန ကယိရာ၊ အရိယော အနရိယေန ပဇာနမတ္ထံ၊

စိရာနုဝုတ္ထောပိ ကရောတိ ပါပံ၊ ဂဇော ယထာ ဣန္ဒသမာနဂေါတ္တံ.

၂၂. ယံ တွေဝ ဇညာ သဒိသော မမန္တိ၊ သီလေန ပညာယ သုတေန စာပိ၊

တေနေဝ မေတ္တိံ ကယိရာထ သဒ္ဓိံ၊ သုခေါ ဟဝေ သပ္ပုရိသေန သင်္ဂမောတိ.

ဣန္ဒသမာနဂေါတ္တဇာတကံ ပဌမံ.

၁၆၂. သန္ထဝဇာတကံ (၂-၂-၂)

၂၃. န သန္ထဝသ္မာ ပရမတ္ထိ ပါပိယော၊ ယော သန္ထဝေါ [သန္ဓဝေါ (က.)] ကာပုရိသေန ဟောတိ၊

သန္တပ္ပိတော သပ္ပိနာ ပါယသေန [ပါယာသေန (က.)]၊ ကိစ္ဆာကတံ ပဏ္ဏကုဋိံ အဒယှိ [အဒဍ္ဎဟိ (သီ. သျာ.)၊ အဒဋ္ဌဟိ (ပီ.)၊ အဒဒ္ဒဟိ (?)].

၂၄. န သန္ထဝသ္မာ ပရမတ္ထိ သေယျော၊ ယော သန္ထဝေါ သပ္ပုရိသေန ဟောတိ၊

သီဟဿ ဗျဂ္ဃဿ စ ဒီပိနော စ၊ သာမာ မုခံ လေဟတိ သန္ထဝေနာတိ.

သန္ထဝဇာတကံ ဒုတိယံ.

၁၆၃. သုသီမဇာတကံ (၂-၂-၃)

၂၅. ကာဠာ မိဂါ သေတဒန္တာ တဝီမေ [တဝ ဣမေ (သီ. သျာ. ပီ.)]၊ ပရောသတံ ဟေမဇာလာဘိဆန္နာ [ဟေမဇာလာဘိသဉ္ဆန္နာ (သီ.)]၊

တေ တေ ဒဒါမီတိ သုသီမ ဗြူသိ၊ အနုဿရံ ပေတ္တိပိတာမဟာနံ.

၂၆. ကာဠာ မိဂါ သေတဒန္တာ မမီမေ [မမ ဣမေ (သီ. ပီ.)]၊ ပရောသတံ ဟေမဇာလာဘိစ္ဆန္နာ၊

တေ တေ ဒဒါမီတိ ဝဒါမိ မာဏဝ၊ အနုဿရံ ပေတ္တိပိတာမဟာနန္တိ.

သုသီမဇာတကံ တတိယံ.

၁၆၄. ဂိဇ္ဈဇာတကံ (၂-၂-၄)

၂၇. ယံ နု ဂိဇ္ဈော ယောဇနသတံ၊ ကုဏပါနိ အဝေက္ခတိ၊

ကသ္မာ ဇာလဉ္စ ပါသဉ္စ၊ အာသဇ္ဇာပိ န ဗုဇ္ဈသိ.

၂၈. ယဒါ ပရာဘဝေါ ဟောတိ၊ ပေါသော ဇီဝိတသင်္ခယေ၊

အထ ဇာလဉ္စ ပါသဉ္စ၊ အာသဇ္ဇာပိ န ဗုဇ္ဈတီတိ.

ဂိဇ္ဈဇာတကံ စတုတ္ထံ.

၁၆၅. နကုလဇာတကံ (၂-၂-၅)

၂၉. သန္ဓိံ ကတွာ အမိတ္တေန၊ အဏ္ဍဇေန ဇလာဗုဇ၊

ဝိဝရိယ ဒါဌံ သေသိ [သယသိ (သီ. သျာ. ပီ.)]၊ ကုတော တေ ဘယမာဂတံ.

၃၀. သင်္ကေထေဝ [သင်္ကတေဝ (က.)] အမိတ္တသ္မိံ၊ မိတ္တသ္မိမ္ပိ န ဝိဿသေ၊

အဘယာ ဘယမုပ္ပန္နံ၊ အပိ မူလာနိ ကန္တတီတိ [မူလံ နိကန္တတီတိ (သီ.)].

နကုလဇာတကံ ပဉ္စမံ.

၁၆၆. ဥပသာဠကဇာတကံ (၂-၂-၆)

၃၁. ဥပသာဠကနာမာနိ [ဥပသာဠှကနာမာနံ (သီ. သျာ. ပီ.)]၊ သဟဿာနိ စတုဒ္ဒသ၊

အသ္မိံ ပဒေသေ ဒဍ္ဎာနိ၊ နတ္ထိ လောကေ အနာမတံ.

၃၂. ယမှိ သစ္စဉ္စ ဓမ္မော စ၊ အဟိံသာ သံယမော ဒမော၊

ဧတံ အရိယာ သေဝန္တိ၊ ဧတံ လောကေ အနာမတန္တိ.

ဥပသာဠကဇာတကံ ဆဋ္ဌံ.

၁၆၇. သမိဒ္ဓိဇာတကံ (၂-၂-၇)

၃၃. အဘုတွာ ဘိက္ခသိ ဘိက္ခု၊ န ဟိ ဘုတွာန ဘိက္ခသိ၊

ဘုတွာန ဘိက္ခု ဘိက္ခဿု၊ မာ တံ ကာလော ဥပစ္စဂါ.

၃၄. ကာလံ ဝေါဟံ န ဇာနာမိ၊ ဆန္နော ကာလော န ဒိဿတိ၊

တသ္မာ အဘုတွာ ဘိက္ခာမိ၊ မာ မံ ကာလော ဥပစ္စဂါတိ.

သမိဒ္ဓိဇာတကံ သတ္တမံ.

၁၆၈. သကုဏဂ္ဃိဇာတကံ (၂-၂-၈)

၃၅. သေနော ဗလသာ ပတမာနော၊ လာပံ ဂေါစရဌာယိနံ၊

သဟသာ အဇ္ဈပ္ပတ္တောဝ၊ မရဏံ တေနုပါဂမိ.

၃၆. သောဟံ နယေန သမ္ပန္နော၊ ပေတ္တိကေ ဂေါစရေ ရတော၊

အပေတသတ္တု မောဒါမိ၊ သမ္ပဿံ အတ္ထမတ္တနောတိ.

သကုဏဂ္ဃိဇာတကံ အဋ္ဌမံ.

၁၆၉. အရကဇာတကံ (၂-၂-၉)

၃၇. ယော ဝေ မေတ္တေန စိတ္တေန၊ သဗ္ဗလောကာနုကမ္ပတိ၊

ဥဒ္ဓံ အဓော စ တိရိယံ၊ အပ္ပမာဏေန သဗ္ဗသော.

၃၈. အပ္ပမာဏံ ဟိတံ စိတ္တံ၊ ပရိပုဏ္ဏံ သုဘာဝိတံ၊

ယံ ပမာဏကတံ ကမ္မံ၊ န တံ တတြာဝသိဿတီတိ.

အရကဇာတကံ နဝမံ.

၁၇၀. ကကဏ္ဋကဇာတကံ (၂-၂-၁၀)

၃၉. နာယံ ပုရေ ဥဏ္ဏမတိ [ဥန္နမတိ (သျာ.)]၊ တောရဏဂ္ဂေ ကကဏ္ဋကော၊

မဟောသဓ ဝိဇာနာဟိ၊ ကေန ထဒ္ဓေါ ကကဏ္ဋကော.

၄၀. အလဒ္ဓပုဗ္ဗံ လဒ္ဓါန၊ အဍ္ဎမာသံ ကကဏ္ဋကော၊

အတိမညတိ ရာဇာနံ၊ ဝေဒေဟံ မိထိလဂ္ဂဟန္တိ.

ကကဏ္ဋကဇာတကံ ဒသမံ.

သန္ထဝဝဂ္ဂေါ ဒုတိယော.

တဿုဒ္ဒါနံ –

အထ ဣန္ဒသမာန သပဏ္ဏကုဋိ၊ သုသိမုတ္တမ ဂိဇ္ဈ ဇလာဗုဇကော၊

ဥပသာဠက ဘိက္ခု သလာပဝရော၊ အထ မေတ္တဝရော ဒသပုဏ္ဏမတီတိ.