၅၂၃. အလမ္ဗုသာဇာတကံ (၃)

၉၅. ‘‘အထ ဗြဝိ ဗြဟာ ဣန္ဒော၊ ဝတြဘူ ဇယတံ ပိတာ၊

ဒေဝကညံ ပရာဘေတွာ၊ သုဓမ္မာယံ အလမ္ဗုသံ.

၉၆. ‘‘မိဿေ ဒေဝါ တံ ယာစန္တိ၊ တာဝတိံသာ သဣန္ဒကာ၊

ဣသိပ္ပလောဘနေ [ဣသိပလောဘိကေ (သီ. သျာ.)၊ ဣသိံ ပလောဘိကေ (ပီ.)] ဂစ္ဆ၊ ဣသိသိင်္ဂံ အလမ္ဗုသေ.

၉၇. ‘‘ပုရာယံ အမှေ အစ္စေတိ [နာစ္စေတိ (သျာ. က.)]၊ ဝတ္တဝါ [ဝတဝါ (သီ. သျာ. ပီ.)] ဗြဟ္မစရိယဝါ၊

နိဗ္ဗာနာဘိရတော ဝုဒ္ဓေါ [ဝဒ္ဓေါ (ပီ.)၊ ဗုဒ္ဓေါ (သျာ. က.)]၊ တဿ မဂ္ဂါနိ အာဝရ’’.

၉၈. ‘‘ဒေဝရာဇ ကိမေဝ တွံ၊ မမေဝ တုဝံ သိက္ခသိ၊

ဣသိပ္ပလောဘနေ [ဣသိပလောဘိကေ (သီ. သျာ.)၊ ဣသိံ ပလောဘိကေ (ပီ.)] ဂစ္ဆ၊ သန္တိ အညာပိ အစ္ဆရာ.

၉၉. ‘‘မာဒိသိယော ပဝရာ စေဝ၊ အသောကေ နန္ဒနေ ဝနေ၊

တာသမ္ပိ ဟောတု ပရိယာယော၊ တာပိ ယန္တု ပလောဘနာ’’ [ပလောဘိကာ (သျာ. ပီ.)].

၁၀၀. ‘‘အဒ္ဓါ ဟိ သစ္စံ ဘဏသိ၊ သန္တိ အညာပိ အစ္ဆရာ၊

တာဒိသိယော ပဝရာ စေဝ၊ အသောကေ နန္ဒနေ ဝနေ.

၁၀၁. ‘‘န တာ ဧဝံ ပဇာနန္တိ၊ ပါရိစရိယံ ပုမံ ဂတာ၊

ယာဒိသံ တွံ ပဇာနာသိ၊ နာရိ သဗ္ဗင်္ဂသောဘနေ.

၁၀၂. ‘‘တွမေဝ ဂစ္ဆ ကလျာဏိ၊ ဣတ္ထီနံ ပဝရာ စသိ၊

တဝေဝ ဝဏ္ဏရူပေန၊ သဝသမာနယိဿသိ’’ [ဝသမာနာပယိဿသိ (သျာ.)၊ ဝသမာနာမယိဿသိ (ပီ.)၊ တံ ဝသမာနယိဿသိ (က.)].

၁၀၃. ‘‘န ဝါဟံ န ဂမိဿာမိ၊ ဒေဝရာဇေန ပေသိတာ၊

ဝိဘေမိ စေတံ အာသာဒုံ၊ ဥဂ္ဂတေဇော ဟိ ဗြာဟ္မဏော.

၁၀၄. ‘‘အနေကေ နိရယံ ပတ္တာ၊ ဣသိမာသာဒိယာ ဇနာ၊

အာပန္နာ မောဟသံသာရံ၊ တသ္မာ လောမာနိ ဟံသယေ’’.

၁၀၅. ‘‘ဣဒံ ဝတွာန ပက္ကာမိ၊ အစ္ဆရာ ကာမဝဏ္ဏိနီ၊

မိဿာ မိဿိတု [မိဿေတု (သီ. သျာ. ပီ.)] မိစ္ဆန္တီ၊ ဣသိသိင်္ဂံ အလမ္ဗုသာ.

၁၀၆. ‘‘သာ စ တံ ဝနမောဂယှ၊ ဣသိသိင်္ဂေန ရက္ခိတံ၊

ဗိမ္ဗဇာလကသဉ္ဆန္နံ၊ သမန္တာ အဍ္ဎယောဇနံ.

၁၀၇. ‘‘ပါတောဝ ပါတရာသမှိ၊ ဥဒဏှသမယံ [ဥဒယသမယံ (သျာ.)၊ ဥဒန္တသမယံ (က.)] ပတိ၊

အဂ္ဂိဋ္ဌံ ပရိမဇ္ဇန္တံ၊ ဣသိသိင်္ဂံ ဥပါဂမိ’’.

၁၀၈. ‘‘ကာ နု ဝိဇ္ဇုရိဝါဘာသိ၊ ဩသဓီ ဝိယ တာရကာ၊

ဝိစိတ္တဟတ္ထာဘရဏာ [ဝိစိတ္တဝတ္ထာဘရဏာ (သီ.)]၊ အာမုတ္တမဏိကုဏ္ဍလာ [အာမုက္ကမဏိကုဏ္ဍလာ (?)].

၁၀၉. ‘‘အာဒိစ္စဝဏ္ဏသင်္ကာသာ၊ ဟေမစန္ဒနဂန္ဓိနီ၊

သညတူရူ မဟာမာယာ၊ ကုမာရီ စာရုဒဿနာ.

၁၁၀. ‘‘ဝိလဂ္ဂါ [ဝိလာကာ (သီ. သျာ. ပီ.)] မုဒုကာ သုဒ္ဓါ၊ ပါဒါ တေ သုပ္ပတိဋ္ဌိတာ၊

ဂမနာ ကာမနီယာ [ကမနာ ကမနီယာ (သီ. ပီ.)] တေ၊ ဟရန္တိယေဝ မေ မနော.

၁၁၁. ‘‘အနုပုဗ္ဗာဝ တေ ဦရူ၊ နာဂနာသသမူပမာ၊

ဝိမဋ္ဌာ တုယှံ သုဿောဏီ၊ အက္ခဿ ဖလကံ ယထာ.

၁၁၂. ‘‘ဥပ္ပလဿေဝ ကိဉ္ဇက္ခာ၊ နာဘိ တေ သာဓု သဏ္ဌိတာ၊

ပူရာ ကဏှဉ္ဇနဿေဝ၊ ဒူရတော ပဋိဒိဿတိ.

၁၁၃. ‘‘ဒုဝိဓာ ဇာတာ ဥရဇာ၊ အဝဏ္ဋာ သာဓု ပစ္စုဒါ၊

ပယောဓရာ အပတိတာ [အပ္ပတီတာ (သီ. သျာ. ပီ.)]၊ အဍ္ဎလာဗုသမာ ထနာ.

၁၁၄. ‘‘ဒီဃာ ကမ္ဗုတလာဘာသာ၊ ဂီဝါ ဧဏေယျကာ ယထာ၊

ပဏ္ဍရာဝရဏာ ဝဂ္ဂု၊ စတုတ္ထမနသန္နိဘာ.

၁၁၅. ‘‘ဥဒ္ဓဂ္ဂါ စ အဓဂ္ဂါ စ၊ ဒုမဂ္ဂပရိမဇ္ဇိတာ၊

ဒုဝိဇာ နေလသမ္ဘူတာ၊ ဒန္တာ တဝ သုဒဿနာ.

၁၁၆. ‘‘အပဏ္ဍရာ လောဟိတန္တာ၊ ဇိဉ္ဇူက [ဇိဉ္ဇုက (သီ. သျာ. ပီ.)] ဖလသန္နိဘာ၊

အာယတာ စ ဝိသာလာ စ၊ နေတ္တာ တဝ သုဒဿနာ.

၁၁၇. ‘‘နာတိဒီဃာ သုသမ္မဋ္ဌာ၊ ကနကဗျာ [ကနကဂ္ဂါ (ပီ.)] သမောစိတာ၊

ဥတ္တမင်္ဂရုဟာ တုယှံ၊ ကေသာ စန္ဒနဂန္ဓိကာ.

၁၁၈. ‘‘ယာဝတာ ကသိဂေါရက္ခာ၊ ဝါဏိဇာနံ [ဝဏိဇာနံ (ပီ.)] စ ယာ ဂတိ၊

ဣသီနဉ္စ ပရက္ကန္တံ၊ သညတာနံ တပဿိနံ.

၁၁၉. ‘‘န တေ သမသမံ ပဿေ၊ အသ္မိံ ပထဝိ [ပုထုဝိ (ပီ.)] မဏ္ဍလေ၊

ကော ဝါ တွံ ကဿ ဝါ ပုတ္တော၊ ကထံ ဇာနေမု တံ မယံ’’.

၁၂၀. ‘‘န ပဉှကာလော ဘဒ္ဒန္တေ၊ ကဿပေဝံ ဂတေ သတိ၊

ဧဟိ သမ္မ ရမိဿာမ၊ ဥဘော အသ္မာကမဿမေ၊

ဧဟိ တံ ဥပဂူဟိဿံ [ဥပဂုယှိဿံ (သျာ.)]၊ ရတီနံ ကုသလော ဘဝ’’.

၁၂၁. ‘‘ဣဒံ ဝတွာန ပက္ကာမိ၊ အစ္ဆရာ ကာမဝဏ္ဏိနီ၊

မိဿာ မိဿိတုမိစ္ဆန္တီ၊ ဣသိသိင်္ဂံ အလမ္ဗုသာ’’.

၁၂၂. ‘‘သော စ ဝေဂေန နိက္ခမ္မ၊ ဆေတွာ ဒန္ဓပရက္ကမံ [ဒန္ဓပဒက္ကမံ (က.)]၊

တမုတ္တမာသု ဝေဏီသု၊ အဇ္ဈပ္ပတ္တော [အဇ္ဈာပတ္တော (ပီ.)] ပရာမသိ၊

၁၂၃. ‘‘တမုဒါဝတ္တ ကလျာဏီ၊ ပလိဿဇိ သုသောဘနာ [သုသောဘဏီ (သျာ. က.)]၊

စဝိတမှိ [စဝိ တမှာ (သျာ. က.)] ဗြဟ္မစရိယာ၊ ယထာ တံ အထ တောသိတာ.

၁၂၄. ‘‘မနသာ အဂမာ ဣန္ဒံ၊ ဝသန္တံ နန္ဒနေ ဝနေ၊

တဿာ သင်္ကပ္ပမညာယ၊ မဃဝါ ဒေဝကုဉ္ဇရော.

၁၂၅. ‘‘ပလ္လင်္ကံ ပဟိဏီ ခိပ္ပံ၊ သောဝဏ္ဏံ သောပဝါဟနံ၊

သဥတ္တရစ္ဆဒပညာသံ၊ သဟဿပဋိယတ္ထတံ [ပဋိကတ္ထတံ (သီ.)].

၁၂၆. ‘‘တမေနံ တတ္ထ ဓာရေသိ၊ ဥရေ ကတွာန သောဘနာ၊

ယထာ ဧကမုဟုတ္တံဝ၊ တီဏိ ဝဿာနိ ဓာရယိ.

၁၂၇. ‘‘ဝိမဒေါ တီဟိ ဝဿေဟိ၊ ပဗုဇ္ဈိတွာန ဗြာဟ္မဏော၊

အဒ္ဒသာသိ ဟရိတ [ဟရီ (ပီ.)] ရုက္ခေ၊ သမန္တာ အဂ္ဂိယာယနံ.

၁၂၈. ‘‘နဝပတ္တဝနံ ဖုလ္လံ၊ ကောကိလဂ္ဂဏဃောသိတံ၊

သမန္တာ ပဝိလောကေတွာ၊ ရုဒံ အဿူနိ ဝတ္တယိ.

၁၂၉. ‘‘န ဇုဟေ န ဇပေ [ဇပ္ပေ (က.)] မန္တေ၊ အဂ္ဂိဟုတ္တံ ပဟာပိတံ၊

ကော နု မေ ပါရိစရိယာယ၊ ပုဗ္ဗေ စိတ္တံ ပလောဘယိ.

၁၃၀. ‘‘အရညေ မေ ဝိဟရတော၊ ယော မေ တေဇာ ဟ သမ္ဘုတံ [သမ္ဘတံ (ပီ.)]၊

နာနာရတ္နပရိပူရံ၊ နာဝံဝ ဂဏှိ အဏ္ဏဝေ’’.

၁၃၁. ‘‘အဟံ တေ ပါရိစရိယာယ၊ ဒေဝရာဇေန ပေသိတာ၊

အဝဓိံ [အဝဓီ (သျာ. ပီ. က.)] စိတ္တံ စိတ္တေန၊ ပမာဒေါ [ပမာဒါ (သျာ. ပီ.)] တွံ န ဗုဇ္ဈသိ’’.

၁၃၂. ‘‘ဣမာနိ ကိရ မံ တာတော၊ ကဿပေါ အနုသာသတိ၊

ကမလာသဒိသိတ္ထိယော [သရိသိတ္ထိယော (သျာ. ပီ.)]၊ တာယော ဗုဇ္ဈေသိ မာဏဝ.

၁၃၃. ‘‘ဥရေ ဂဏ္ဍာယော ဗုဇ္ဈေသိ၊ တာယော ဗုဇ္ဈေသိ မာဏဝ၊

ဣစ္စာနုသာသိ မံ တာတော၊ ယထာ မံ အနုကမ္ပကော.

၁၃၄. ‘‘တဿာဟံ ဝစနံ နာကံ၊ ပိတု ဝုဒ္ဓဿ သာသနံ၊

အရညေ နိမ္မနုဿမှိ၊ သွဇ္ဇ ဈာယာမိ [သွာဇ္ဇဇ္ဈာယာမိ (သီ. ပီ.)] ဧကကော.

၁၃၅. ‘‘သောဟံ တထာ ကရိဿာမိ၊ ဓိရတ္ထု ဇီဝိတေန မေ၊

ပုန ဝါ တာဒိသော ဟေဿံ၊ မရဏံ မေ ဘဝိဿတိ’’.

၁၃၆. ‘‘တဿ တေဇံ [တေဇဉ္စ (သီ. ပီ.)] ဝီရိယဉ္စ၊ ဓိတိံ [ဓိတိဉ္စ (ပီ.)] ဉတွာ အဝဋ္ဌိတံ [သုဝဍ္ဎိတံ (သီ.)]၊

သိရသာ အဂ္ဂဟီ ပါဒေ၊ ဣသိသိင်္ဂံ အလမ္ဗုသာ.

၁၃၇. ‘‘မာ မေ ကုဇ္ဈ [ကုဇ္ဈိ (ပီ.)] မဟာဝီရ၊ မာ မေ ကုဇ္ဈ [ကုဇ္ဈိ (ပီ.)] မဟာဣသေ၊

မဟာ အတ္ထော မယာ စိဏ္ဏော၊ တိဒသာနံ ယသဿိနံ၊

တယာ သံကမ္ပိတံ အာသိ၊ သဗ္ဗံ ဒေဝပုရံ တဒါ’’.

၁၃၈. ‘‘တာဝတိံသာ စ ယေ ဒေဝါ၊ တိဒသာနဉ္စ ဝါသဝေါ၊

တွဉ္စ ဘဒ္ဒေ သုခီ ဟောဟိ၊ ဂစ္ဆ ကညေ ယထာသုခံ’’.

၁၃၉. ‘‘တဿ ပါဒေ ဂဟေတွာန၊ ကတွာ စ နံ ပဒက္ခိဏံ၊

အဉ္ဇလိံ ပဂ္ဂဟေတွာန၊ တမှာ ဌာနာ အပက္ကမိ.

၁၄၀. ‘‘ယော စ တဿာသိ ပလ္လင်္ကော၊ သောဝဏ္ဏော သောပဝါဟနော၊

သဥတ္တရစ္ဆဒပညာသော၊ သဟဿပဋိယတ္ထတော၊

တမေဝ ပလ္လင်္ကမာရုယှ၊ အဂါ ဒေဝါန သန္တိကေ.

၁၄၁. ‘‘တမောက္ကမိဝ အာယန္တိံ၊ ဇလန္တိံ ဝိဇ္ဇုတံ ယထာ၊

ပတီတော သုမနော ဝိတ္တော၊ ဒေဝိန္ဒော အဒဒါ ဝရံ’’.

၁၄၂. ‘‘ဝရဉ္စေ မေ အဒေါ သက္က၊ သဗ္ဗဘူတာနမိဿရ၊

နိသိပ္ပလောဘိကာ [န ဣသိပလောဘိကာ (သျာ.)၊ န ဣသိပလောဘိယံ (ပီ.)] ဂစ္ဆေ၊ ဧတံ သက္က ဝရံ ဝရေ’’တိ.

အလမ္ဗုသာဇာတကံ တတိယံ.