၅၂၄. သင်္ခပါလဇာတကံ (၄)

၁၄၃. ‘‘အရိယာဝကာသောသိ ပသန္နနေတ္တော၊ မညေ ဘဝံ ပဗ္ဗဇိတော ကုလမှာ၊

ကထံ နု ဝိတ္တာနိ ပဟာယ ဘောဂေ၊ ပဗ္ဗဇိ နိက္ခမ္မ ဃရာ သပည’’ [သပညော (သျာ.)၊ သပညာ (ပီ.)].

၁၄၄. ‘‘သယံ ဝိမာနံ နရဒေဝ ဒိသွာ၊ မဟာနုဘာဝဿ မဟောရဂဿ၊

ဒိသွာန ပုညာန မဟာဝိပါကံ၊ သဒ္ဓါယဟံ ပဗ္ဗဇိတောမှိ ရာဇ’’.

၁၄၅. ‘‘န ကာမကာမာ န ဘယာ န ဒေါသာ၊ ဝါစံ မုသာ ပဗ္ဗဇိတာ ဘဏန္တိ၊

အက္ခာဟိ မေ ပုစ္ဆိတော ဧတမတ္ထံ၊ သုတွာန မေ ဇာယိဟိတိပ္ပသာဒေါ’’.

၁၄၆. ‘‘ဝါဏိဇ္ဇ [ဝဏိဇ္ဇ (ပီ.)] ရဋ္ဌာဓိပ ဂစ္ဆမာနော၊ ပထေ အဒ္ဒသာသိမှိ ဘောဇပုတ္တေ [မိလာစပုတ္တေ (သီ. ပီ.)]၊

ပဝဒ္ဓကာယံ ဥရဂံ မဟန္တံ၊ အာဒါယ ဂစ္ဆန္တေ ပမောဒမာနေ’’.

၁၄၇. ‘‘သောဟံ သမာဂမ္မ ဇနိန္ဒ တေဟိ၊ ပဟဋ္ဌလောမော အဝစမှိ ဘီတော၊

ကုဟိံ အယံ နီယတိ [နိယျတိ (က.)] ဘီမကာယော၊ နာဂေန ကိံ ကာဟထ ဘောဇပုတ္တာ.

၁၄၈. ‘‘နာဂေါ အယံ နီယတိ ဘောဇနတ္ထာ [ဘောဇနတ္ထံ (သီ. သျာ. ပီ.)]၊ ပဝဒ္ဓကာယော ဥရဂေါ မဟန္တော၊

သာဒုဉ္စ ထူလဉ္စ မုဒုဉ္စ မံသံ၊ န တွံ ရသညာသိ ဝိဒေဟပုတ္တ.

၁၄၉. ‘‘ဣတော မယံ ဂန္တွာ သကံ နိကေတံ [နိကေတနံ (ပီ.)]၊ အာဒါယ သတ္ထာနိ ဝိကောပယိတွာ၊

မံသာနိ ဘောက္ခာမ [ဘက္ခာမ (သျာ.)] ပမောဒမာနာ၊ မယဉှိ ဝေ သတ္တဝေါ ပန္နဂါနံ.

၁၅၀. ‘‘သစေ အယံ နီယတိ ဘောဇနတ္ထာ၊ ပဝဒ္ဓကာယော ဥရဂေါ မဟန္တော၊

ဒဒါမိ ဝေါ ဗလိဗဒ္ဒါနိ [ဗလိဝဒ္ဒါနိ (ပီ.)] သောဠသ၊ နာဂံ ဣမံ မုဉ္စထ ဗန္ဓနသ္မာ.

၁၅၁. ‘‘အဒ္ဓါ ဟိ နော ဘက္ခော အယံ မနာပေါ၊ ဗဟူ စ နော ဥရဂါ ဘုတ္တပုဗ္ဗာ [ဗဟုံ စ နော ဥရဂေါ ဘုတ္တပုဗ္ဗော (က.)]၊

ကရောမ တေ တံ ဝစနံ အဠာရ [အာဠာရ (က.) ဧဝမုပရိပိ]၊ မိတ္တဉ္စ နော ဟောဟိ ဝိဒေဟပုတ္တ.

၁၅၂. ‘‘တဒဿု တေ ဗန္ဓနာ မောစယိံသု၊ ယံ နတ္ထုတော ပဋိမောက္ကဿ ပါသေ၊

မုတ္တော စ သော ဗန္ဓနာ နာဂရာဇာ၊ ပက္ကာမိ ပါစီနမုခေါ မုဟုတ္တံ.

၁၅၃. ‘‘ဂန္တွာန ပါစီနမုခေါ မုဟုတ္တံ၊ ပုဏ္ဏေဟိ နေတ္တေဟိ ပလောကယီ မံ၊

တဒါဿဟံ ပိဋ္ဌိတော အနွဂစ္ဆိံ၊ ဒသင်္ဂုလိံ အဉ္ဇလိံ ပဂ္ဂဟေတွာ.

၁၅၄. ‘‘ဂစ္ဆေဝ ခေါ တွံ တရမာနရူပေါ၊ မာ တံ အမိတ္တာ ပုနရဂ္ဂဟေသုံ၊

ဒုက္ခော ဟိ လုဒ္ဒေဟိ ပုနာ သမာဂမော၊ အဒဿနံ ဘောဇပုတ္တာန ဂစ္ဆ.

၁၅၅. ‘‘အဂမာသိ သော ရဟဒံ ဝိပ္ပသန္နံ၊ နီလောဘာသံ ရမဏီယံ သုတိတ္ထံ၊

သမောတတံ [သမောနတံ (သျာ. က.)] ဇမ္ဗုဟိ ဝေတသာဟိ၊ ပါဝေက္ခိ နိတ္တိဏ္ဏဘယော ပတီတော.

၁၅၆. ‘‘သော တံ ပဝိဿ န စိရဿ နာဂေါ၊ ဒိဗ္ဗေန မေ ပါတုရဟုံ ဇနိန္ဒ၊

ဥပဋ္ဌဟီ မံ ပိတရံဝ ပုတ္တော၊ ဟဒယင်္ဂမံ ကဏ္ဏသုခံ ဘဏန္တော.

၁၅၇. ‘‘တွံ မေသိ မာတာ စ ပိတာ [ပိတာ စ (ပီ.)] အဠာရ၊ အဗ္ဘန္တရော ပါဏဒဒေါ သဟာယော၊

သကဉ္စ ဣဒ္ဓိံ ပဋိလာဘကောသ္မိ [ပဋိလာဘိတောသ္မိ (ပီ.)]၊ အဠာရ ပဿ မေ နိဝေသနာနိ၊

ပဟူတဘက္ခံ ဗဟုအန္နပါနံ၊ မသက္ကသာရံ ဝိယ ဝါသဝဿ’’.

၁၅၈. ‘‘တံ ဘူမိဘာဂေဟိ ဥပေတရူပံ၊ အသက္ခရာ စေဝ မုဒူ သုဘာ စ၊

နီစတ္တိဏာ [နီစာ တိဏာ (သျာ. ပီ.)] အပ္ပရဇာ စ ဘူမိ၊ ပါသာဒိကာ ယတ္ထ ဇဟန္တိ သောကံ.

၁၅၉. ‘‘အနာဝကုလာ ဝေဠုရိယူပနီလာ၊ စတုဒ္ဒိသံ အမ္ဗဝနံ သုရမ္မံ၊

ပက္ကာ စ ပေသီ စ ဖလာ သုဖုလ္လာ၊ နိစ္စောတုကာ ဓာရယန္တီ ဖလာနိ.

၁၆၀. ‘‘တေသံ ဝနာနံ နရဒေဝ မဇ္ဈေ၊ နိဝေသနံ ဘဿရသန္နိကာသံ၊

ရဇတဂ္ဂဠံ သောဝဏ္ဏမယံ ဥဠာရံ၊ ဩဘာသတီ ဝိဇ္ဇုရိဝန္တလိက္ခေ.

၁၆၁. ‘‘မဏီမယာ သောဏ္ဏမယာ [သောဝဏ္ဏမယာ (သီ. သျာ. ပီ.)] ဥဠာရာ၊ အနေကစိတ္တာ သတတံ သုနိမ္မိတာ၊

ပရိပူရာ ကညာဟိ အလင်္ကတာဘိ၊ သုဝဏ္ဏကာယူရဓရာဟိ ရာဇ.

၁၆၂. ‘‘သော သင်္ခပါလော တရမာနရူပေါ၊ ပါသာဒမာရုယှ အနောမဝဏ္ဏော၊

သဟဿထမ္ဘံ အတုလာနုဘာဝံ၊ ယတ္ထဿ ဘရိယာ မဟေသီ အဟောသိ.

၁၆၃. ‘‘ဧကာ စ နာရီ တရမာနရူပါ၊ အာဒါယ ဝေဠုရိယမယံ မဟဂ္ဃံ၊

သုဘံ မဏိံ ဇာတိမန္တူပပန္နံ၊ အစောဒိတာ အာသနမဗ္ဘိဟာသိ.

၁၆၄. ‘‘တတော မံ ဥရဂေါ ဟတ္ထေ ဂဟေတွာ၊ နိသီဒယီ ပါမုခအာသနသ္မိံ၊

ဣဒမာသနံ အတြ ဘဝံ နိသီဒတု၊ ဘဝဉှိ မေ အညတရော ဂရူနံ.

၁၆၅. ‘‘အညာ စ နာရီ တရမာနရူပါ၊ အာဒါယ ဝါရိံ ဥပသင်္ကမိတွာ၊

ပါဒါနိ ပက္ခာလယီ မေ ဇနိန္ဒ၊ ဘရိယာဝ [ဘရိယာ စ (ပီ.)] ဘတ္တူ ပတိနော ပိယဿ.

၁၆၆. ‘‘အပရာ စ နာရီ တရမာနရူပါ၊ ပဂ္ဂယှ သောဝဏ္ဏမယာယ [သောဝဏ္ဏမယာ (ပီ.)] ပါတိယာ၊

အနေကသူပံ ဝိဝိဓံ ဝိယဉ္ဇနံ၊ ဥပနာမယီ ဘတ္တ မနုညရူပံ.

၁၆၇. ‘‘တုရိယေဟိ [တူရိယေဟိ (က.)] မံ ဘာရတ ဘုတ္တဝန္တံ၊ ဥပဋ္ဌဟုံ ဘတ္တု မနော ဝိဒိတွာ၊

တတုတ္တရိံ [တဒုတ္တရိံ (က.)] မံ နိပတီ မဟန္တံ၊ ဒိဗ္ဗေဟိ ကာမေဟိ အနပ္ပကေဟိ.

၁၆၈. ‘‘ဘရိယာ မမေတာ တိသတာ အဠာရ၊ သဗ္ဗတ္တမဇ္ဈာ ပဒုမုတ္တရာဘာ၊

အဠာရ ဧတာဿု တေ ကာမကာရာ၊ ဒဒါမိ တေ တာ ပရိစာရယဿု.

၁၆၉. ‘‘သံဝစ္ဆရံ ဒိဗ္ဗရသာနုဘုတွာ၊ တဒါဿုဟံ [တဒဿဟံ (ပီ.)] ဥတ္တရိမဇ္ဈဘာသိံ [ဥတ္တရိ ပစ္စဘာသိံ (သီ. သျာ.)၊ ဥတ္တရိံ ပစ္စဘာသိံ (ပီ.)]၊

နာဂဿိဒံ ကိန္တိ ကထဉ္စ လဒ္ဓံ၊ ကထဇ္ဈဂမာသိ ဝိမာနသေဋ္ဌံ’’.

၁၇၀. ‘‘အဓိစ္စ လဒ္ဓံ ပရိဏာမဇံ တေ၊ သယံကတံ ဥဒါဟု ဒေဝေဟိ ဒိန္နံ၊

ပုစ္ဆာမိ တံ [တေ (ပီ.)] နာဂရာဇေတမတ္ထံ၊ ကထဇ္ဈဂမာသိ ဝိမာနသေဋ္ဌံ’’.

၁၇၁. ‘‘နာဓိစ္စ လဒ္ဓံ န ပရိဏာမဇံ မေ၊ န သယံကတံ နာပိ ဒေဝေဟိ ဒိန္နံ၊

သကေဟိ ကမ္မေဟိ အပါပကေဟိ၊ ပုညေဟိ မေ လဒ္ဓမိဒံ ဝိမာနံ’’.

၁၇၂. ‘‘ကိံ တေ ဝတံ ကိံ ပန ဗြဟ္မစရိယံ၊ ကိဿ သုစိဏ္ဏဿ အယံ ဝိပါကော၊

အက္ခာဟိ မေ နာဂရာဇေတမတ္ထံ၊ ကထံ နု တေ လဒ္ဓမိဒံ ဝိမာနံ’’.

၁၇၃. ‘‘ရာဇာ အဟောသိံ မဂဓာနမိဿရော၊ ဒုယျောဓနော နာမ မဟာနုဘာဝေါ၊

သော ဣတ္တရံ ဇီဝိတံ သံဝိဒိတွာ၊ အသဿတံ ဝိပရိဏာမဓမ္မံ.

၁၇၄. ‘‘အန္နဉ္စ ပါနဉ္စ ပသန္နစိတ္တော၊ သက္ကစ္စ ဒါနံ ဝိပုလံ အဒါသိံ [အဒါသိ (ပီ.)]၊

ဩပါနဘူတံ မေ ဃရံ တဒါသိ၊ သန္တပ္ပိတာ သမဏဗြာဟ္မဏာ စ.

၁၇၅. [အယံ ဂါထာ ပီ. ပေါတ္ထကေ နတ္ထိ] ‘‘မာလဉ္စ ဂန္ဓဉ္စ ဝိလေပနဉ္စ၊ ပဒီပိယံ [ပဒီပယံ (သျာ. က.)] ယာနမုပဿယဉ္စ၊

အစ္ဆာဒနံ သေယျမထန္နပါနံ၊ သက္ကစ္စ ဒါနာနိ အဒမှ တတ္ထ [အယံ ဂါထာ ပီ. ပေါတ္ထကေ နတ္ထိ].

၁၇၆. ‘‘တံ မေ ဝတံ တံ ပန ဗြဟ္မစရိယံ၊ တဿ သုစိဏ္ဏဿ အယံ ဝိပါကော၊

တေနေဝ မေ လဒ္ဓမိဒံ ဝိမာနံ၊ ပဟူတဘက္ခံ ဗဟုအန္နပါနံ’’၊

‘‘နစ္စေဟိ ဂီတေဟိ စုပေတရူပံ၊ စိရဋ္ဌိတိကံ န စ သဿတာယံ.

၁၇၇. ‘‘အပ္ပါနုဘာဝါ တံ မဟာနုဘာဝံ၊ တေဇဿိနံ ဟန္တိ အတေဇဝန္တော၊

ကိမေဝ ဒါဌာဝုဓ ကိံ ပဋိစ္စ၊ ဟတ္ထတ္တ [ဟတ္ထတ္ထ (သီ. သျာ. ပီ.)] မာဂစ္ဆိ ဝနိဗ္ဗကာနံ [ဝဏိဗ္ဗကာနံ (သီ.)].

၁၇၈. ‘‘ဘယံ နု တေ အနွဂတံ မဟန္တံ၊ တေဇော နု တေ နာနွဂံ ဒန္တမူလံ၊

ကိမေဝ ဒါဌာဝုဓ ကိံ ပဋိစ္စ၊ ကိလေသမာပဇ္ဇိ ဝနိဗ္ဗကာနံ’’.

၁၇၉. ‘‘န မေ ဘယံ အနွဂတံ မဟန္တံ၊ တေဇော န သက္ကာ မမ တေဟိ ဟန္တုံ [တေဘိဟန္တုံ (သျာ. က.)]၊

သတဉ္စ ဓမ္မာနိ သုကိတ္တိတာနိ၊ သမုဒ္ဒဝေလာဝ ဒုရစ္စယာနိ.

၁၈၀. ‘‘စာတုဒ္ဒသိံ ပဉ္စဒသိံ အဠာရ၊ ဥပေါသထံ နိစ္စမုပါဝသာမိ၊

အထာဂမုံ သောဠသ ဘောဇပုတ္တာ၊ ရဇ္ဇုံ ဂဟေတွာန ဒဠှဉ္စ ပါသံ.

၁၈၁. ‘‘ဘေတွာန နာသံ အတိကဿ [အန္တကဿ (က.)] ရဇ္ဇုံ၊ နယိံသု မံ သမ္ပရိဂယှ လုဒ္ဒါ၊

ဧတာဒိသံ ဒုက္ခမဟံ တိတိက္ခံ [တိတိက္ခိံ (ပီ.)]၊ ဥပေါသထံ အပ္ပဋိကောပယန္တော’’.

၁၈၂. ‘‘ဧကာယနေ တံ ပထေ အဒ္ဒသံသု၊ ဗလေန ဝဏ္ဏေန စုပေတရူပံ၊

သိရိယာ ပညာယ စ ဘာဝိတောသိ၊ ကိံ ပတ္ထယံ [ကိမတ္ထိယံ (သီ. သျာ. ပီ.)] နာဂ တပေါ ကရောသိ.

၁၈၃. ‘‘န ပုတ္တဟေတူ န ဓနဿ ဟေတု၊ န အာယုနော စာပိ အဠာရ ဟေတု၊

မနုဿယောနိံ အဘိပတ္ထယာနော၊ တသ္မာ ပရက္ကမ္မ တပေါ ကရောမိ’’.

၁၈၄. ‘‘တွံ လောဟိတက္ခော ဝိဟတန္တရံသော၊ အလင်္ကတော ကပ္ပိတကေသမဿု၊

သုရောသိတော လောဟိတစန္ဒနေန၊ ဂန္ဓဗ္ဗရာဇာဝ ဒိသာ ပဘာသသိ [ပဘာသိ (က.)].

၁၈၅. ‘‘ဒေဝိဒ္ဓိပတ္တောသိ မဟာနုဘာဝေါ၊ သဗ္ဗေဟိ ကာမေဟိ သမင်္ဂိဘူတော၊

ပုစ္ဆာမိ တံ နာဂရာဇေတမတ္ထံ၊ သေယျော ဣတော ကေန မနုဿလောကော’’.

၁၈၆. ‘‘အဠာရ နာညတြ မနုဿလောကာ၊ သုဒ္ဓီ ဝ သံဝိဇ္ဇတိ သံယမော ဝါ၊

အဟဉ္စ လဒ္ဓါန မနုဿယောနိံ၊ ကာဟာမိ ဇာတိမရဏဿ အန္တံ’’.

၁၈၇. ‘‘သံဝစ္ဆရော မေ ဝသတော [ဝုသိတော (ပီ.)] တဝန္တိကေ၊ အန္နေန ပါနေန ဥပဋ္ဌိတောသ္မိ၊

အာမန္တယိတွာန ပလေမိ နာဂ၊ စိရပ္ပဝုဋ္ဌောသ္မိ [စိရပ္ပဝုတ္ထော အသ္မိ (ပီ.)] အဟံ ဇနိန္ဒ’’.

၁၈၈. ‘‘ပုတ္တာ စ ဒါရာ အနုဇီဝိနော စ [စ’နုဇီဝိနော (သျာ. ပီ.)]၊ နိစ္စာနုသိဋ္ဌာ ဥပတိဋ္ဌတေ တံ၊

ကစ္စိန္နု တံ နာဘိသပိတ္ထ [နာဘိသံသိတ္ထ (သျာ. ပီ.)] ကောစိ၊ ပိယဉှိ မေ ဒဿနံ တုယှံ [တုယှ (ပီ.)] အဠာရ’’.

၁၈၉. ‘‘ယထာပိ မာတူ စ ပိတူ အဂါရေ၊ ပုတ္တော ပိယော ပဋိဝိဟိတော ဝသေယျ [သေယျော (ပီ.)]၊

တတောပိ မယှံ ဣဓမေဝ သေယျော၊ စိတ္တဉှိ တေ နာဂ မယီ ပသန္နံ’’.

၁၉၀. ‘‘မဏီ မမံ ဝိဇ္ဇတိ လောဟိတင်္ကော [လောဟိတင်္ဂေါ (က.)]၊ ဓနာဟရော မဏိရတနံ ဥဠာရံ၊

အာဒါယ တွံ [တံ (ပီ.)] ဂစ္ဆ သကံ နိကေတံ၊ လဒ္ဓါ ဓနံ တံ မဏိမောဿဇဿု’’.

၁၉၁. ‘‘ဒိဋ္ဌာ မယာ မာနုသကာပိ ကာမာ၊ အသဿတာ ဝိပရိဏာမဓမ္မာ၊

အာဒီနဝံ ကာမဂုဏေသု ဒိသွာ၊ သဒ္ဓါယဟံ ပဗ္ဗဇိတောမှိ ရာဇ.

၁၉၂. ‘‘ဒုမပ္ဖလာနီဝ ပတန္တိ မာဏဝါ၊ ဒဟရာ စ ဝုဒ္ဓါ စ သရီရဘေဒါ၊

ဧတမ္ပိ ဒိသွာ ပဗ္ဗဇိတောမှိ ရာဇ၊ အပဏ္ဏကံ သာမညမေဝ သေယျော’’.

၁၉၃. ‘‘အဒ္ဓါ ဟဝေ သေဝိတဗ္ဗာ သပညာ၊ ဗဟုဿုတာ ယေ ဗဟုဌာနစိန္တိနော၊

နာဂဉ္စ သုတွာန တဝဉ္စဠာရ၊ ကာဟာမိ ပုညာနိ အနပ္ပကာနိ’’.

၁၉၄. ‘‘အဒ္ဓါ ဟဝေ သေဝိတဗ္ဗာ သပညာ၊ ဗဟုဿုတာ ယေ ဗဟုဌာနစိန္တိနော၊

နာဂဉ္စ သုတွာန မမဉ္စ ရာဇ၊ ကရောဟိ ပုညာနိ အနပ္ပကာနီ’’တိ.

သင်္ခပါလဇာတကံ စတုတ္ထံ.