၅၂၂. သရဘင်္ဂဇာတကံ (၂)

၅၀. ‘‘အလင်္ကတာ ကုဏ္ဍလိနော သုဝတ္ထာ၊ ဝေဠုရိယမုတ္တာထရုခဂ္ဂဗန္ဓာ [ဗဒ္ဓါ (ပီ.)]၊

ရထေသဘာ တိဋ္ဌထ ကေ နု တုမှေ၊ ကထံ ဝေါ ဇာနန္တိ မနုဿလောကေ’’.

၅၁. ‘‘အဟမဋ္ဌကော ဘီမရထော ပနာယံ၊ ကာလိင်္ဂရာဇာ ပန ဥဂ္ဂတောယံ [ဥဂ္ဂတော အယံ (ပီ.)၊ ဥဂ္ဂတာယံ (က.)]၊

သုသညတာနံ ဣသီနံ [သုသညတာနိသိနံ (ပီ.)] ဒဿနာယ၊ ဣဓာဂတာ ပုစ္ဆိတာယေမှ ပဉှေ’’.

၅၂. ‘‘ဝေဟာယသံ တိဋ္ဌသိ [တိဋ္ဌတိ (ပီ.)] အန္တလိက္ခေ၊ ပထဒ္ဓုနော ပန္နရသေဝ စန္ဒော၊

ပုစ္ဆာမိ တံ ယက္ခ မဟာနုဘာဝ၊ ကထံ တံ ဇာနန္တိ မနုဿလောကေ’’.

၅၃. ‘‘ယမာဟု ဒေဝေသု သုဇမ္ပတီတိ၊ မဃဝါတိ တံ အာဟု မနုဿလောကေ၊

သ ဒေဝရာဇာ ဣဒမဇ္ဇ ပတ္တော၊ သုသညတာနံ ဣသီနံ ဒဿနာယ’’.

၅၄. ‘‘ဒူရေ သုတာ နော ဣသယော သမာဂတာ၊ မဟိဒ္ဓိကာ ဣဒ္ဓိဂုဏူပပန္နာ၊

ဝန္ဒာမိ တေ အယိရေ ပသန္နစိတ္တော၊ ယေ ဇီဝလောကေတ္ထ မနုဿသေဋ္ဌာ’’.

၅၅. ဂန္ဓော ဣသီနံ စိရဒိက္ခိတာနံ [ဒက္ခိတာနံ (သျာ. ပီ.)]၊ ကာယာ စုတော ဂစ္ဆတိ မာလုတေန၊

ဣတော ပဋိက္ကမ္မ သဟဿနေတ္တ၊ ဂန္ဓော ဣသီနံ အသုစိ ဒေဝရာဇ’’.

၅၆. ‘‘ဂန္ဓော ဣသီနံ စိရဒိက္ခိတာနံ၊ ကာယာ စုတော ဂစ္ဆတု မာလုတေန၊

ဝိစိတြပုပ္ဖံ သုရဘိံဝ မာလံ၊ ဂန္ဓဉ္စ ဧတံ ပါဋိကင်္ခါမ ဘန္တေ၊

န ဟေတ္ထ ဒေဝါ ပဋိက္ကူလသညိနော’’.

၅၇. ‘‘ပုရိန္ဒဒေါ ဘူတပတီ ယသဿီ၊ ဒေဝါနမိန္ဒော သက္ကော [ဣဒံ ပဒံ နတ္ထိ (သီ. သျာ. ပီ. ပေါတ္ထကေသု)] မဃဝါ သုဇမ္ပတိ၊

သ ဒေဝရာဇာ အသုရဂဏပ္ပမဒ္ဒနော၊ ဩကာသမာကင်္ခတိ ပဉှ ပုစ္ဆိတုံ.

၅၈. ‘‘ကော နေဝိမေသံ ဣဓ ပဏ္ဍိတာနံ၊ ပဉှေ ပုဋ္ဌော နိပုဏေ ဗျာကရိဿတိ၊

တိဏ္ဏဉ္စ ရညံ မနုဇာဓိပါနံ၊ ဒေဝါနမိန္ဒဿ စ ဝါသဝဿ’’.

၅၉. ‘‘အယံ ဣသိ [ဣသီ (သီ. ပီ.)] သရဘင်္ဂေါ တပဿီ [ယသဿီ (သီ.)]၊ ယတော ဇာတော ဝိရတော မေထုနသ္မာ၊

အာစေရပုတ္တော [အာစရိယပုတ္တော (ပီ. က.)] သုဝိနီတရူပေါ၊ သော နေသံ ပဉှာနိ ဝိယာကရိဿတိ’’.

၆၀. ‘‘ကောဏ္ဍည ပဉှာနိ ဝိယာကရောဟိ၊ ယာစန္တိ တံ ဣသယော သာဓုရူပါ၊

ကောဏ္ဍည ဧသော မနုဇေသု ဓမ္မော၊ ယံ ဝုဒ္ဓ [ဝဒ္ဓ (ပီ.)၊ ဗုဒ္ဓ (က.)] မာဂစ္ဆတိ ဧသ ဘာရော’’.

၆၁. ‘‘ကတာဝကာသာ ပုစ္ဆန္တု ဘောန္တော၊ ယံ ကိဉ္စိ ပဉှံ မနသာဘိပတ္ထိတံ၊

အဟဉှိ တံ တံ ဝေါ ဝိယာကရိဿံ၊ ဉတွာ သယံ လောကမိမံ ပရဉ္စ’’.

၆၂. ‘‘တတော စ မဃဝါ သက္ကော၊ အတ္ထဒဿီ ပုရိန္ဒဒေါ၊

အပုစ္ဆိ ပဌမံ ပဉှံ၊ ယဉ္စာသိ အဘိပတ္ထိတံ’’.

၆၃. ‘‘ကိံ သူ ဝဓိတွာ န ကဒါစိ သောစတိ၊ ကိဿပ္ပဟာနံ ဣသယော ဝဏ္ဏယန္တိ၊

ကဿီဓ ဝုတ္တံ ဖရုသံ ခမေထ၊ အက္ခာဟိ မေ ကောဏ္ဍည ဧတမတ္ထံ’’.

၆၄. ‘‘ကောဓံ ဝဓိတွာ န ကဒါစိ သောစတိ၊ မက္ခပ္ပဟာနံ ဣသယော ဝဏ္ဏယန္တိ၊

သဗ္ဗေသံ ဝုတ္တံ ဖရုသံ ခမေထ၊ ဧတံ ခန္တိံ ဥတ္တမမာဟု သန္တော’’.

၆၅. ‘‘သက္ကာ ဥဘိန္နံ [ဟိ ဒွိန္နံ (ပီ.)] ဝစနံ တိတိက္ခိတုံ၊ သဒိသဿ ဝါ သေဋ္ဌတရဿ [သေဋ္ဌနရဿ (ပီ.)] ဝါပိ၊

ကထံ နု ဟီနဿ ဝစော ခမေထ၊ အက္ခာဟိ မေ ကောဏ္ဍည ဧတမတ္ထံ’’.

၆၆. ‘‘ဘယာ ဟိ သေဋ္ဌဿ ဝစော ခမေထ၊ သာရမ္ဘဟေတူ ပန သာဒိသဿ၊

ယော စီဓ ဟီနဿ ဝစော ခမေထ၊ ဧတံ ခန္တိံ ဥတ္တမမာဟု သန္တော’’.

၆၇. ‘‘ကထံ ဝိဇညာ စတုပတ္ထရူပံ [စတုမဋ္ဌရူပံ (သျာ. ပီ.)]၊ သေဋ္ဌံ သရိက္ခံ အထဝါပိ ဟီနံ၊

ဝိရူပရူပေန စရန္တိ သန္တော၊ တသ္မာ ဟိ သဗ္ဗေသံ ဝစော ခမေထ’’.

၆၈. ‘‘န ဟေတမတ္ထံ မဟတီပိ သေနာ၊ သရာဇိကာ ယုဇ္ဈမာနာ လဘေထ၊

ယံ ခန္တိမာ သပ္ပုရိသော လဘေထ၊ ခန္တီ ဗလဿူပသမန္တိ ဝေရာ’’.

၆၉. ‘‘သုဘာသိတံ တေ အနုမောဒိယာန၊ အညံ တံ ပုစ္ဆာမိ တဒိင်္ဃ ဗြူဟိ၊

ယထာ အဟုံ [အဟူ (သီ. သျာ. ပီ.)] ဒဏ္ဍကီ နာဠိကေရော [နာဠိကီရော (သီ. သျာ. ပီ.)]၊ အထဇ္ဇုနော ကလာဗု စာပိ ရာဇာ၊

တေသံ ဂတိံ ဗြူဟိ သုပါပကမ္မိနံ၊ ကတ္ထူပပန္နာ ဣသိနံ ဝိဟေဌကာ’’.

၇၀. ‘‘ကိသဉှိ [ကိသံပိ (ပီ.)] ဝစ္ဆံ အဝကိရိယ ဒဏ္ဍကီ၊ ဥစ္ဆိန္နမူလော သဇနော သရဋ္ဌော၊

ကုက္ကုဠနာမေ နိရယမှိ ပစ္စတိ၊ တဿ ဖုလိင်္ဂါနိ ပတန္တိ ကာယေ.

၇၁. ‘‘ယော သညတေ ပဗ္ဗဇိတေ အဟေဌယိ [အဝဉ္စသိ (ပီ.)]၊ ဓမ္မံ ဘဏန္တေ သမဏေ အဒူသကေ၊

တံ နာဠိကေရံ သုနခါ ပရတ္ထ၊ သင်္ဂမ္မ ခါဒန္တိ ဝိဖန္ဒမာနံ.

၇၂. ‘‘အထဇ္ဇုနော နိရယေ သတ္တိသူလေ၊ အဝံသိရော ပတိတော ဥဒ္ဓံပါဒေါ [ဥဒ္ဓပါဒေါ (သျာ.)၊ အဒ္ဓပါဒေါ (ပီ.)]၊

အင်္ဂီရသံ ဂေါတမံ ဟေဌယိတွာ၊ ခန္တိံ တပဿိံ စိရဗြဟ္မစာရိံ.

၇၃. ‘‘ယော ခဏ္ဍသော ပဗ္ဗဇိတံ အဆေဒယိ၊ ခန္တိံ ဝဒန္တံ သမဏံ အဒူသကံ၊

ကလာဗုဝီစိံ ဥပပဇ္ဇ ပစ္စတိ၊ မဟာပတာပံ [မဟာဘိတာပံ (ပီ.)] ကဋုကံ ဘယာနကံ.

၇၄. ‘‘ဧတာနိ သုတွာ နိရယာနိ ပဏ္ဍိတော၊ အညာနိ ပါပိဋ္ဌတရာနိ စေတ္ထ၊

ဓမ္မံ စရေ သမဏဗြာဟ္မဏေသု၊ ဧဝင်္ကရော သဂ္ဂမုပေတိ ဌာနံ’’.

၇၅. ‘‘သုဘာသိတံ တေ အနုမောဒိယာန၊ အညံ တံ ပုစ္ဆာမိ တဒိင်္ဃ ဗြူဟိ၊

ကထံဝိဓံ သီလဝန္တံ ဝဒန္တိ၊ ကထံဝိဓံ ပညဝန္တံ ဝဒန္တိ၊

ကထံဝိဓံ သပ္ပုရိသံ ဝဒန္တိ၊ ကထံဝိဓံ နော သိရိ နော ဇဟာတိ’’.

၇၆. ‘‘ကာယေန ဝါစာယ စ ယော’ဓ [ယော စ (ပီ.)] သညတော၊ မနသာ စ ကိဉ္စိ န ကရောတိ ပါပံ၊

န အတ္တဟေတူ အလိကံ ဘဏေတိ [ဘဏာတိ (သီ. သျာ. ပီ.)]၊ တထာဝိဓံ သီလဝန္တံ ဝဒန္တိ.

၇၇. ‘‘ဂမ္ဘီရပဉှံ မနသာဘိစိန္တယံ [မနသာ ဝိစိန္တယံ (သီ.)]၊ နာစ္စာဟိတံ ကမ္မ ကရောတိ လုဒ္ဒံ၊

ကာလာဂတံ [ကာလာဘတံ (ပီ.)] အတ္ထပဒံ န ရိဉ္စတိ၊ တထာဝိဓံ ပညဝန္တံ ဝဒန္တိ.

၇၈. ‘‘ယော ဝေ ကတညူ ကတဝေဒိ ဓီရော၊ ကလျာဏမိတ္တော ဒဠှဘတ္တိ စ ဟောတိ၊

ဒုခိတဿ သက္ကစ္စ ကရောတိ ကိစ္စံ၊ တထာဝိဓံ သပ္ပုရိသံ ဝဒန္တိ.

၇၉. ‘‘ဧတေဟိ သဗ္ဗေဟိ ဂုဏေဟုပေတော၊ သဒ္ဓေါ မုဒူ သံဝိဘာဂီ ဝဒညူ၊

သင်္ဂါဟကံ သခိလံ သဏှဝါစံ၊ တထာဝိဓံ နော သိရိ နော ဇဟာတိ’’.

၈၀. ‘‘သုဘာသိတံ တေ အနုမောဒိယာန၊ အညံ တံ ပုစ္ဆာမိ တဒိင်္ဃ ဗြူဟိ၊

သီလံ သိရိဉ္စာပိ သတဉ္စ ဓမ္မံ၊ ပညဉ္စ ကံ သေဋ္ဌတရံ ဝဒန္တိ’’.

၈၁. ‘‘ပညာ ဟိ သေဋ္ဌာ ကုသလာ ဝဒန္တိ၊ နက္ခတ္တရာဇာရိဝ တာရကာနံ၊

သီလံ သီရီ စာပိ သတဉ္စ ဓမ္မော [ဓမ္မာ (ပီ.)]၊ အနွာယိကာ ပညဝတော ဘဝန္တိ’’.

၈၂. ‘‘သုဘာသိတံ တေ အနုမောဒိယာန၊ အညံ တံ ပုစ္ဆာမိ တဒိင်္ဃ ဗြူဟိ၊

ကထံကရော ကိန္တိကရော ကိမာစရံ၊ ကိံ သေဝမာနော လဘတီဓ ပညံ၊

ပညာယ ဒါနိပ္ပဋိပံ [ဒါနိ ပဋိပဒံ (သီ. သျာ. ပီ.)] ဝဒေဟိ၊ ကထံကရော ပညဝါ ဟောတိ မစ္စော’’.

၈၃. ‘‘သေဝေထ ဝုဒ္ဓေ နိပုဏေ ဗဟုဿုတေ၊ ဥဂ္ဂါဟကော စ ပရိပုစ္ဆကော သိယာ၊

သုဏေယျ သက္ကစ္စ သုဘာသိတာနိ၊ ဧဝံကရော ပညဝါ ဟောတိ မစ္စော.

၈၄. ‘‘ ပညဝါ ကာမဂုဏေ အဝေက္ခတိ၊ အနိစ္စတော ဒုက္ခတော ရောဂတော စ၊

ဧဝံ ဝိပဿီ ပဇဟာတိ ဆန္ဒံ၊ ဒုက္ခေသု ကာမေသု မဟဗ္ဘယေသု.

၈၅. ‘‘သ ဝီတရာဂေါ ပဝိနေယျ ဒေါသံ၊ မေတ္တံ [မေတ္တ (သျာ. က.)] စိတ္တံ ဘာဝယေ [ဘာဝေယျ (သီ. သျာ. က.)] အပ္ပမာဏံ၊

သဗ္ဗေသု ဘူတေသု နိဓာယ ဒဏ္ဍံ၊ အနိန္ဒိတော ဗြဟ္မမုပေတိ ဌာနံ’’.

၈၆. ‘‘မဟတ္ထိယံ [မဟိဒ္ဓိယံ (သီ. သျာ. ပီ.)] အာဂမနံ အဟောသိ၊ တဝမဋ္ဌကာ [မဋ္ဌက (သီ. သျာ. က.)] ဘီမရထဿ စာပိ၊

ကာလိင်္ဂရာဇဿ စ ဥဂ္ဂတဿ၊ သဗ္ဗေသ ဝေါ ကာမရာဂေါ ပဟီနော’’.

၈၇. ‘‘ဧဝမေတံ ပရစိတ္တဝေဒိ၊ သဗ္ဗေသ နော ကာမရာဂေါ ပဟီနော၊

ကရောဟိ ဩကာသမနုဂ္ဂဟာယ၊ ယထာ ဂတိံ တေ အဘိသမ္ဘဝေမ’’.

၈၈. ‘‘ကရောမိ ဩကာသမနုဂ္ဂဟာယ၊ တထာ ဟိ ဝေါ ကာမရာဂေါ ပဟီနော၊

ဖရာထ ကာယံ ဝိပုလာယ ပီတိယာ၊ ယထာ ဂတိံ မေ အဘိသမ္ဘဝေထ’’.

၈၉. ‘‘သဗ္ဗံ ကရိဿာမ တဝါနုသာသနိံ၊ ယံ ယံ တုဝံ ဝက္ခသိ ဘူရိပည၊

ဖရာမ ကာယံ ဝိပုလာယ ပီတိယာ၊ ယထာ ဂတိံ တေ အဘိသမ္ဘဝေမ’’.

၉၀. ‘‘ကတာယ [ကတာယံ (သီ. ပီ.)] ဝစ္ဆဿ ကိသဿ ပူဇာ၊ ဂစ္ဆန္တု ဘောန္တော ဣသယော သာဓုရူပါ၊

ဈာနေ ရတာ ဟောထ သဒါ သမာဟိတာ၊ ဧသာ ရတီ ပဗ္ဗဇိတဿ သေဋ္ဌာ’’.

၉၁. ‘‘သုတွာန ဂါထာ ပရမတ္ထသံဟိတာ၊ သုဘာသိတာ ဣသိနာ ပဏ္ဍိတေန၊

တေ ဝေဒဇာတာ အနုမောဒမာနာ၊ ပက္ကာမု [ပက္ကမု (က.)] ဒေဝါ ဒေဝပုရံ ယသဿိနော.

၉၂. ‘‘ဂါထာ ဣမာ အတ္ထဝတီ သုဗျဉ္ဇနာ၊ သုဘာသိတာ ဣသိနာ ပဏ္ဍိတေန၊

ယော ကောစိမာ အဋ္ဌိကတွာ [အဋ္ဌိံ ကတွာ (က.)] သုဏေယျ၊ လဘေထ ပုဗ္ဗာပရိယံ ဝိသေသံ၊

လဒ္ဓါန ပုဗ္ဗာပရိယံ ဝိသေသံ၊ အဒဿနံ မစ္စုရာဇဿ ဂစ္ဆေ’’.

၉၃. ‘‘သာလိဿရော သာရိပုတ္တော၊ မေဏ္ဍိဿရော စ ကဿပေါ၊

ပဗ္ဗတော အနုရုဒ္ဓေါ စ၊ ကစ္စာယနော စ ဒေဝလော [ဒေဝိလော (သျာ. က.)].

၉၄. ‘‘အနုသိဿော စ အာနန္ဒော၊ ကိသဝစ္ဆော စ ကောလိတော၊

နာရဒေါ ဥဒါယီ ထေရော [နာရဒေါ ပုဏ္ဏော မန္တာနီပုတ္တော (သီ.)]၊ ပရိသာ ဗုဒ္ဓပရိသာ၊

သရဘင်္ဂေါ လောကနာထော၊ ဧဝံ ဓာရေထ ဇာတက’’န္တိ.

သရဘင်္ဂဇာတကံ ဒုတိယံ.