၄၉၃. မဟာဝါဏိဇဇာတကံ (၁၀)
၁၈၀. ဝါဏိဇာ သမိတိံ ကတွာ၊ နာနာရဋ္ဌတော အာဂတာ၊
ဓနာဟရာ ပက္ကမိံသု၊ ဧကံ ကတွာန ဂါမဏိံ.
၁၈၁. တေ တံ ကန္တာရမာဂမ္မ၊ အပ္ပဘက္ခံ အနောဒကံ၊
မဟာနိဂြောဓမဒ္ဒက္ခုံ၊ သီတစ္ဆာယံ မနောရမံ.
၁၈၂. တေ စ တတ္ထ နိသီဒိတွာ၊ တဿ ရုက္ခဿ ဆာယယာ [ဆာဒိယာ (သီ. သျာ. ပီ.)]၊
ဝါဏိဇာ သမစိန္တေသုံ၊ ဗာလာ မောဟေန ပါရုတာ.
၁၈၃. အလ္လာယတေ [အဒ္ဒါယတေ (သီ. ပီ.)] အယံ ရုက္ခော၊ အပိ ဝါရီဝ [ဝါရိ စ (သီ. ပီ.)] သန္ဒတိ၊
ဣင်္ဃဿ ပုရိမံ သာခံ၊ မယံ ဆိန္ဒာမ ဝါဏိဇာ.
၁၈၄. သာ စ ဆိန္နာဝ ပဂ္ဃရိ၊ အစ္ဆံ ဝါရိံ အနာဝိလံ၊
တေ တတ္ထ နှတွာ ပိဝိတွာ၊ ယာဝတိစ္ဆိံသု ဝါဏိဇာ.
၁၈၅. ဒုတိယံ သမစိန္တေသုံ၊ ဗာလာ မောဟေန ပါရုတာ၊
ဣင်္ဃဿ ဒက္ခိဏံ သာခံ၊ မယံ ဆိန္ဒာမ ဝါဏိဇာ.
၁၈၆. သာ စ ဆိန္နာဝ ပဂ္ဃရိ၊ သာလိမံသောဒနံ ဗဟုံ၊
အပ္ပေါဒဝဏ္ဏေ ကုမ္မာသေ၊ သိင်္ဂိံ ဝိဒလသူပိယော [သိင်္ဂိံ ဗိဒလသူပိယော (သီ. ပီ.)၊ သိင်္ဂီဝေရံ လသူပိယော (က.) သိင်္ဂီန္တိ သိင်္ဂီဝေရာဒိကံ ဥတ္တရိဘင်္ဂံ၊ ဝိဒလသူပိယောတိ မုဂ္ဂသူပါဒယော (အဋ္ဌ.) ဝိဒလံ ကလာယာဒိမှိ ဝတ္တတီတိ သက္ကတာဘိဓာနေ].
၁၈၇. တေ တတ္ထ ဘုတွာ ခါဒိတွာ [ဘုတွာ စ ပိဝိတွာ စ (ပီ.)]၊ ယာဝတိစ္ဆိံသု ဝါဏိဇာ၊
တတိယံ သမစိန္တေသုံ၊ ဗာလာ မောဟေန ပါရုတာ၊
ဣင်္ဃဿ ပစ္ဆိမံ သာခံ၊ မယံ ဆိန္ဒာမ ဝါဏိဇာ.
၁၈၈. သာ စ ဆိန္နာဝ ပဂ္ဃရိ၊ နာရိယော သမလင်္ကတာ၊
ဝိစိတြဝတ္ထာဘရဏာ၊ အာမုတ္တမဏိကုဏ္ဍလာ.
၁၈၉. အပိ သု ဝါဏိဇာ ဧကာ၊ နာရိယော ပဏ္ဏဝီသတိ၊
သမန္တာ ပရိဝါရိံသု [ပရိကရိံသု (သီ. သျာ. ပီ.)]၊ တဿ ရုက္ခဿ ဆာယယာ [ဆာဒိယာ (သီ. သျာ. ပီ.)].
၁၉၀. တေ တာဟိ ပရိစာရေတွာ [ပရိဝါရေတွာ (သီ. သျာ. ပီ.)]၊ ယာဝတိစ္ဆိံသု ဝါဏိဇာ၊
စတုတ္ထံ သမစိန္တေသုံ၊ ဗာလာ မောဟေန ပါရုတာ၊
ဣင်္ဃဿ ဥတ္တရံ သာခံ၊ မယံ ဆိန္ဒာမ ဝါဏိဇာ.
၁၉၁. သာ စ ဆိန္နာဝ ပဂ္ဃရိ၊ မုတ္တာ ဝေဠုရိယာ ဗဟူ၊
ရဇတံ ဇာတရူပဉ္စ၊ ကုတ္တိယော ပဋိယာနိ စ.
၁၉၂. ကာသိကာနိ စ ဝတ္ထာနိ၊ ဥဒ္ဒိယာနိ စ ကမ္ဗလာ [ဥဒ္ဒိယာနေ စ ကမ္ဗလေ (သီ. ပီ.)]၊
တေ တတ္ထ ဘာရေ ဗန္ဓိတွာ၊ ယာဝတိစ္ဆိံသု ဝါဏိဇာ.
၁၉၃. ပဉ္စမံ သမစိန္တေသုံ၊ ဗာလာ မောဟေန ပါရုတာ၊
ဣင်္ဃဿ မူလေ [မူလံ (သီ. ပီ. က.)] ဆိန္ဒာမ၊ အပိ ဘိယျော လဘာမသေ.
၁၉၄. အထုဋ္ဌဟိ သတ္ထဝါဟော၊ ယာစမာနော ကတဉ္ဇလီ၊
နိဂြောဓော ကိံ ပရဇ္ဈတိ [အပရဇ္ဈထ (သီ.)၊ အပရဇ္ဈတိ (သျာ. ပီ.)]၊ ဝါဏိဇာ ဘဒ္ဒမတ္ထု တေ.
၁၉၅. ဝါရိဒါ ပုရိမာ သာခါ၊ အန္နပါနဉ္စ ဒက္ခိဏာ၊
နာရိဒါ ပစ္ဆိမာ သာခါ၊ သဗ္ဗကာမေ စ ဥတ္တရာ၊
နိဂြောဓော ကိံ ပရဇ္ဈတိ၊ ဝါဏိဇာ ဘဒ္ဒမတ္ထု တေ.
၁၉၆. ယဿ ရုက္ခဿ ဆာယာယ၊ နိသီဒေယျ သယေယျ ဝါ၊
န တဿ သာခံ ဘဉ္ဇေယျ၊ မိတ္တဒုဗ္ဘော ဟိ ပါပကော.
၁၉၇. တေ စ တဿာနာဒိယိတွာ [တဿ အနာဒိတွာ (သီ. သျာ.)]၊ ဧကဿ ဝစနံ ဗဟူ၊
နိသိတာဟိ ကုဌာရီဟိ [ကုဓာရီဟိ (က.)]၊ မူလတော နံ ဥပက္ကမုံ.
၁၉၈. တတော နာဂါ နိက္ခမိံသု၊ သန္နဒ္ဓါ ပဏ္ဏဝီသတိ၊
ဓနုဂ္ဂဟာနံ တိသတာ၊ ဆသဟဿာ စ ဝမ္မိနော.
၁၉၉. ဧတေ ဟနထ ဗန္ဓထ၊ မာ ဝေါ မုဉ္စိတ္ထ [မုစ္စိတ္ထ (ပီ.)] ဇီဝိတံ၊
ဌပေတွာ သတ္ထဝါဟံဝ၊ သဗ္ဗေ ဘသ္မံ [ဘသ္မီ (သီ.)] ကရောထ နေ.
၂၀၀. တသ္မာ ဟိ ပဏ္ဍိတော ပေါသော၊ သမ္ပဿံ အတ္ထမတ္တနော၊
လောဘဿ န ဝသံ ဂစ္ဆေ၊ ဟနေယျာရိသကံ [ဟနေယျ ဒိသတံ (သီ.)၊ ဟနေယျ ဒိသကံ (သျာ.)] မနံ.
၂၀၁. ဧဝ [ဧတ (သီ. ပီ.)] မာဒီနဝံ ဉတွာ၊ တဏှာ ဒုက္ခဿ သမ္ဘဝံ၊
ဝီတတဏှော အနာဒါနော၊ သတော ဘိက္ခု ပရိဗ္ဗဇေတိ.
မဟာဝါဏိဇဇာတကံ ဒသမံ.