၄၉၄. သာဓိနဇာတကံ (၁၁)

၂၀၂. အဗ္ဘုတော ဝတ လောကသ္မိံ၊ ဥပ္ပဇ္ဇိ လောမဟံသနော၊

ဒိဗ္ဗော ရထော ပါတုရဟု၊ ဝေဒေဟဿ ယသဿိနော.

၂၀၃. ဒေဝပုတ္တော မဟိဒ္ဓိကော၊ မာတလိ [မာတလီ (သီ.)] ဒေဝသာရထိ၊

နိမန္တယိတ္ထ ရာဇာနံ၊ ဝေဒေဟံ မိထိလဂ္ဂဟံ.

၂၀၄. ဧဟိမံ ရထမာရုယှ၊ ရာဇသေဋ္ဌ ဒိသမ္ပတိ၊

ဒေဝါ ဒဿနကာမာ တေ၊ တာဝတိံသာ သဣန္ဒကာ၊

သရမာနာ ဟိ တေ ဒေဝါ၊ သုဓမ္မာယံ သမစ္ဆရေ.

၂၀၅. တတော စ ရာဇာ သာဓိနော [သာဓီနော (သီ. ပီ.)]၊ ဝေဒေဟော မိထိလဂ္ဂဟော [ပမုခေါ ရထမာရုဟိ (သီ. ပီ.)]၊

သဟဿယုတ္တမာရုယှ [ယုတ္တံ အဘိရုယှ (သီ.)]၊ အဂါ ဒေဝါန သန္တိကေ၊

တံ ဒေဝါ ပဋိနန္ဒိံသု၊ ဒိသွာ ရာဇာနမာဂတံ.

၂၀၆. သွာဂတံ တေ မဟာရာဇ၊ အထော တေ အဒုရာဂတံ၊

နိသီဒ ဒါနိ ရာဇီသိ [ရာဇိသိ (သီ. သျာ. ပီ.)]၊ ဒေဝရာဇဿ သန္တိကေ.

၂၀၇. သက္ကောပိ ပဋိနန္ဒိတ္ထ၊ ဝေဒေဟံ မိထိလဂ္ဂဟံ၊

နိမန္တယိတ္ထ [နိမန္တယီ စ (သီ. ပီ.)] ကာမေဟိ၊ အာသနေန စ ဝါသဝေါ.

၂၀၈. သာဓု ခေါသိ အနုပ္ပတ္တော၊ အာဝါသံ ဝသဝတ္တိနံ၊

ဝသ ဒေဝေသု ရာဇီသိ၊ သဗ္ဗကာမသမိဒ္ဓိသု၊

တာဝတိံသေသု ဒေဝေသု၊ ဘုဉ္ဇ ကာမေ အမာနုသေ.

၂၀၉. အဟံ ပုရေ သဂ္ဂဂတော ရမာမိ၊ နစ္စေဟိ ဂီတေဟိ စ ဝါဒိတေဟိ၊

သော ဒါနိ အဇ္ဇ န ရမာမိ သဂ္ဂေ၊ အာယုံ နု ခီဏော [ခီဏံ (သျာ.)] မရဏံ နု သန္တိကေ၊

ဥဒါဟု မူဠှောသ္မိ ဇနိန္ဒသေဋ္ဌ.

၂၁၀. န တာယု [န စာယု (သီ. ပီ. က.)] ခီဏံ မရဏဉ္စ [မရဏံ တေ (သီ. ပီ.)] ဒူရေ၊ န စာပိ မူဠှော နရဝီရသေဋ္ဌ၊

တုယှဉ္စ [တဝဉ္စ (သီ. ပီ.)၊ တဝ စ (က.)] ပုညာနိ ပရိတ္တကာနိ၊ ယေသံ ဝိပါကံ ဣဓ ဝေဒယိတ္ထော [ဝေဒယတော (ပီ. က.)].

၂၁၁. ဝသ ဒေဝါနုဘာဝေန၊ ရာဇသေဋ္ဌ ဒိသမ္ပတိ၊

တာဝတိံသေသု ဒေဝေသု၊ ဘုဉ္ဇ ကာမေ အမာနုသေ.

၂၁၂. ယထာ ယာစိတကံ ယာနံ၊ ယထာ ယာစိတကံ ဓနံ၊

ဧဝံ သမ္ပဒမေဝေတံ၊ ယံ ပရတော ဒါနပစ္စယာ.

၂၁၃. န စာဟမေတမိစ္ဆာမိ၊ ယံ ပရတော ဒါနပစ္စယာ၊

သယံကတာနိ ပုညာနိ၊ တံ မေ အာဝေဏိကံ [အာဝေဏိယံ (သီ. သျာ. ပီ.)၊ အာဝေနိကံ (က.)] ဓနံ.

၂၁၄. သောဟံ ဂန္တွာ မနုဿေသု၊ ကာဟာမိ ကုသလံ ဗဟုံ၊

ဒါနေန သမစရိယာယ၊ သံယမေန ဒမေန စ၊

ယံ ကတွာ သုခိတော ဟောတိ၊ န စ ပစ္ဆာနုတပ္ပတိ.

၂၁၅. ဣမာနိ တာနိ ခေတ္တာနိ၊ ဣမံ နိက္ခံ သုကုဏ္ဍလံ၊

ဣမာ တာ ဟရိတာနူပါ၊ ဣမာ နဇ္ဇော သဝန္တိယော.

၂၁၆. ဣမာ တာ ပေါက္ခရဏီ ရမ္မာ၊ စက္ကဝါကပကူဇိတာ [စက္ကဝါကူပကူဇိတာ (သီ. ပီ.)]၊

မန္ဒာလကေဟိ သဉ္ဆန္နာ၊ ပဒုမုပ္ပလကေဟိ စ၊

ယဿိမာနိ မမာယိံသု၊ ကိံ နု တေ ဒိသတံ ဂတာ.

၂၁၇. တာနီဓ ခေတ္တာနိ သော ဘူမိဘာဂေါ၊ တေယေဝ အာရာမဝနုပစာရာ [တေ အာရာမာ တေ ဝန’မေ ပစာရာ (သီ. ပီ.)၊ တေ ယေဝ အာရာမဝနာနိ သဉ္စရာ (က.)]၊

တမေဝ မယှံ ဇနတံ အပဿတော၊ သုညံဝ မေ နာရဒ ခါယတေ ဒိသာ.

၂၁၈. ဒိဋ္ဌာ မယာ ဝိမာနာနိ၊ ဩဘာသေန္တာ စတုဒ္ဒိသာ၊

သမ္မုခါ ဒေဝရာဇဿ၊ တိဒသာနဉ္စ သမ္မုခါ.

၂၁၉. ဝုတ္ထံ မေ ဘဝနံ ဒိဗျံ [ဒိဗ္ဗံ (သီ. ပီ.)]၊ ဘုတ္တာ ကာမာ အမာနုသာ၊

တာဝတိံသေသု ဒေဝေသု၊ သဗ္ဗကာမသမိဒ္ဓိသု.

၂၂၀. သောဟံ ဧတာဒိသံ ဟိတွာ၊ ပုညာယမှိ ဣဓာဂတော၊

ဓမ္မမေဝ စရိဿာမိ၊ နာဟံ ရဇ္ဇေန အတ္ထိကော.

၂၂၁. အဒဏ္ဍာဝစရံ မဂ္ဂံ၊ သမ္မာသမ္ဗုဒ္ဓဒေသိတံ၊

တံ မဂ္ဂံ ပဋိပဇ္ဇိဿံ၊ ယေန ဂစ္ဆန္တိ သုဗ္ဗတာတိ.

သာဓိနဇာတကံ [သာဓိနရာဇဇာတကံ (သျာ.)] ဧကာဒသမံ.