၄၉၂. တစ္ဆသူကရဇာတကံ (၉)

၁၆၀. ယဒေသမာနာ ဝိစရိမှ၊ ပဗ္ဗတာနိ ဝနာနိ စ၊

အနွေသံ ဝိစရိံ [ဝိပုလေ (သျာ. က.)] ဉာတီ၊ တေမေ အဓိဂတာ မယာ.

၁၆၁. ဗဟုဉ္စိဒံ မူလဖလံ၊ ဘက္ခော စာယံ အနပ္ပကော၊

ရမ္မာ စိမာ ဂိရီနဇ္ဇော [ဂိရိနဒိယော (သီ. ပီ.)]၊ ဖာသုဝါသော ဘဝိဿတိ.

၁၆၂. ဣဓေဝါဟံ ဝသိဿာမိ၊ သဟ သဗ္ဗေဟိ ဉာတိဘိ၊

အပ္ပေါဿုက္ကော နိရာသင်္ကီ၊ အသောကော အကုတောဘယော.

၁၆၃. အညမ္ပိ [အညံ ဟိ (သီ. ပီ.)] လေဏံ ပရိယေသ၊ သတ္တု နော ဣဓ ဝိဇ္ဇတိ၊

သော တစ္ဆ သူကရေ ဟန္တိ၊ ဣဓာဂန္တွာ ဝရံ ဝရံ.

၁၆၄. ကော နုမှာကံ [ကော နမှာကံ (သီ. ပီ.)] ဣဓ သတ္တု၊ ကော ဉာတီ သုသမာဂတေ၊

ဒုပ္ပဓံသေ [အပ္ပဓံသေ (သီ. ပီ.)] ပဓံသေတိ၊ တံ မေ အက္ခာထ ပုစ္ဆိတာ.

၁၆၅. ဥဒ္ဓဂ္ဂရာဇီ မိဂရာဇာ၊ ဗလီ ဒါဌာဝုဓော မိဂေါ၊

သော တစ္ဆ သူကရေ ဟန္တိ၊ ဣဓာဂန္တွာ ဝရံ ဝရံ.

၁၆၆. န နော ဒါဌာ န ဝိဇ္ဇန္တိ [နု ဝိဇ္ဇန္တိ (က.)]၊ ဗလံ ကာယေ သမောဟိတံ၊

သဗ္ဗေ သမဂ္ဂါ ဟုတွာန၊ ဝသံ ကာဟာမ ဧကကံ.

၁၆၇. ဟဒယင်္ဂမံ ကဏ္ဏသုခံ၊ ဝါစံ ဘာသသိ တစ္ဆက၊

ယောပိ ယုဒ္ဓေ ပလာယေယျ၊ တမ္ပိ ပစ္ဆာ ဟနာမသေ.

၁၆၈. ပါဏာတိပါတာ ဝိရတော နု အဇ္ဇ၊ အဘယံ နု တေ သဗ္ဗဘူတေသု ဒိန္နံ၊

ဒါဌာ နု တေ မိဂဝဓာယ [မိဂ ဝိရိယံ (သီ. သျာ. ပီ.)] န သန္တိ၊ ယော သံဃပတ္တော ကပဏောဝ ဈာယသိ.

၁၆၉. န မေ ဒါဌာ န ဝိဇ္ဇန္တိ၊ ဗလံ ကာယေ သမောဟိတံ၊

ဉာတီ စ ဒိသွာန သာမဂ္ဂီ ဧကတော၊ တသ္မာ စ ဈာယာမိ ဝနမှိ ဧကကော.

၁၇၀. ဣမဿုဒံ ယန္တိ ဒိသောဒိသံ ပုရေ၊ ဘယဋ္ဋိတာ လေဏဂဝေသိနော ပုထု၊

တေ ဒါနိ သင်္ဂမ္မ ဝသန္တိ ဧကတော၊ ယတ္ထဋ္ဌိတာ ဒုပ္ပသဟဇ္ဇ တေ မယာ.

၁၇၁. ပရိဏာယကသမ္ပန္နာ၊ သဟိတာ ဧကဝါဒိနော၊

တေ မံ သမဂ္ဂါ ဟိံသေယျုံ၊ တသ္မာ နေသံ န ပတ္ထယေ [အပတ္ထဝေ (ပီ.)].

၁၇၂. ဧကောဝ ဣန္ဒော အသုရေ ဇိနာတိ၊ ဧကောဝ သေနော ဟန္တိ ဒိဇေ ပသယှ၊

ဧကောဝ ဗျဂ္ဃေါ မိဂသံဃပတ္တော၊ ဝရံ ဝရံ ဟန္တိ ဗလဉှိ တာဒိသံ.

၁၇၃. န ဟေဝ ဣန္ဒော န သေနော၊ နပိ ဗျဂ္ဃေါ မိဂါဓိပေါ၊

သမဂ္ဂေ သဟိတေ ဉာတီ၊ န ဗျဂ္ဃေ [ဗျဂ္ဃေ စ (သီ. ပီ.)၊ ဗျဂ္ဃေါ န (သျာ.)] ကုရုတေ ဝသေ.

၁၇၄. ကုမ္ဘီလကာ သကုဏကာ၊ သံဃိနော ဂဏစာရိနော၊

သမ္မောဒမာနာ ဧကဇ္ဈံ၊ ဥပ္ပတန္တိ ဍယန္တိ စ.

၁၇၅. တေသဉ္စ ဍယမာနာနံ၊ ဧကေတ္ထ အပသက္ကတိ [အပဝတ္တတိ (သီ. ပီ.)]၊

တဉ္စ သေနော နိတာဠေတိ၊ ဝေယျဂ္ဃိယေဝ သာ ဂတိ.

၁၇၆. ဥဿာဟိတော ဇဋိလေန၊ လုဒ္ဒေနာမိသစက္ခုနာ၊

ဒါဌီ ဒါဌီသု ပက္ခန္ဒိ၊ မညမာနော ယထာ ပုရေ.

၁၇၇. သာဓု သမ္ဗဟုလာ ဉာတီ၊ အပိ ရုက္ခာ အရညဇာ၊

သူကရေဟိ သမဂ္ဂေဟိ၊ ဗျဂ္ဃေါ ဧကာယနေ ဟတော.

၁၇၈. ဗြာဟ္မဏဉ္စေဝ ဗျဂ္ဃဉ္စ၊ ဥဘော ဟန္တွာန သူကရာ.

အာနန္ဒိနော ပမုဒိတာ၊ မဟာနာဒံ ပနာဒိသုံ.

၁၇၉. တေ သု ဥဒုမ္ဗရမူလသ္မိံ၊ သူကရာ သုသမာဂတာ၊

တစ္ဆကံ အဘိသိဉ္စိံသု၊ ‘‘တွံ နော ရာဇာသိ ဣဿရော’’တိ.

တစ္ဆသူကရဇာတကံ နဝမံ.