၄၈၉. သုရုစိဇာတကံ (၆)

၁၀၂. မဟေသီ သုရုစိနော [ရုစိနော (သီ. သျာ. ပီ.)] ဘရိယာ၊ အာနီတာ ပဌမံ အဟံ၊

ဒသ ဝဿသဟဿာနိ၊ ယံ မံ သုရုစိမာနယိ.

၁၀၃. သာဟံ ဗြာဟ္မဏ ရာဇာနံ၊ ဝေဒေဟံ မိထိလဂ္ဂဟံ၊

နာဘိဇာနာမိ ကာယေန၊ ဝါစာယ ဥဒ စေတသာ၊

သုရုစိံ အတိမညိတ္ထ [အတိမညိတ္ထော (သီ. ပီ.)၊ အတိမညိတာ (?)]၊ အာဝိ [အာဝိံ (သီ. ပီ.)] ဝါ ယဒိ ဝါ ရဟော.

၁၀၄. ဧတေန သစ္စဝဇ္ဇေန၊ ပုတ္တော ဥပ္ပဇ္ဇတံ ဣသေ၊

မုသာ မေ ဘဏမာနာယ၊ မုဒ္ဓါ ဖလတု သတ္တဓာ.

၁၀၅. ဘတ္တု မမ သဿု မာတာ၊ ပိတာ စာပိ စ သဿုရော၊

တေ မံ ဗြဟ္မေ ဝိနေတာရော၊ ယာဝ အဋ္ဌံသု ဇီဝိတံ.

၁၀၆. သာဟံ အဟိံသာရတိနီ၊ ကာမသာ [ကာမသော (သီ.)] ဓမ္မစာရိနီ [ဓမ္မစာရိဏီ (သီ.)]၊

သက္ကစ္စံ တေ ဥပဋ္ဌာသိံ၊ ရတ္တိန္ဒိဝမတန္ဒိတာ.

၁၀၇. ဧတေန သစ္စဝဇ္ဇေန၊ ပုတ္တော ဥပ္ပဇ္ဇတံ ဣသေ၊

မုသာ မေ ဘဏမာနာယ၊ မုဒ္ဓါ ဖလတု သတ္တဓာ.

၁၀၈. သောဠသိတ္ထိသဟဿာနိ၊ သဟဘရိယာနိ ဗြာဟ္မဏ၊

တာသု ဣဿာ ဝါ ကောဓော ဝါ၊ နာဟု မယှံ ကုဒါစနံ.

၁၀၉. ဟိတေန တာသံ နန္ဒာမိ၊ န စ မေ ကာစိ အပ္ပိယာ၊

အတ္တာနံဝါနုကမ္ပာမိ၊ သဒါ သဗ္ဗာ သပတ္တိယော.

၁၁၀. ဧတေန သစ္စဝဇ္ဇေန၊ ပုတ္တော ဥပ္ပဇ္ဇတံ ဣသေ၊

မုသာ မေ ဘဏမာနာယ၊ မုဒ္ဓါ ဖလတု သတ္တဓာ.

၁၁၁. ဒါသေ ကမ္မကရေ ပေဿေ [ပေါသေ (သျာ. က.)]၊ ယေ စညေ အနုဇီဝိနော၊

ပေသေမိ [ပေါသေမိ (သီ. သျာ. ပီ.)] သဟဓမ္မေန၊ သဒါ ပမုဒိတိန္ဒြိယာ.

၁၁၂. ဧတေန သစ္စဝဇ္ဇေန၊ ပုတ္တော ဥပ္ပဇ္ဇတံ ဣသေ၊

မုသာ မေ ဘဏမာနာယ၊ မုဒ္ဓါ ဖလတု သတ္တဓာ.

၁၁၃. သမဏေ ဗြာဟ္မဏေ စာပိ၊ အညေ စာပိ ဝနိဗ္ဗကေ၊

တပ္ပေမိ အန္နပါနေန၊ သဒါ ပယတပါဏိနီ.

၁၁၄. ဧတေန သစ္စဝဇ္ဇေန၊ ပုတ္တော ဥပ္ပဇ္ဇတံ ဣသေ၊

မုသာ မေ ဘဏမာနာယ၊ မုဒ္ဓါ ဖလတု သတ္တဓာ.

၁၁၅. စာတုဒ္ဒသိံ ပဉ္စဒ္ဒသိံ [ပန္နရသိံ (သီ. ပီ.)]၊ ယာ စ ပက္ခဿ အဋ္ဌမီ [အဋ္ဌမိံ (သီ. ပီ.)]၊

ပါဋိဟာရိယပက္ခဉ္စ၊ အဋ္ဌင်္ဂသုသမာဂတံ [အဋ္ဌင်္ဂသုသမာဟိတံ (သဗ္ဗတ္ထ) ဝိ. ဝ. ၁၂၉ ပါဠိယာ အဋ္ဌကထာ ပဿိတဗ္ဗာ]၊

ဥပေါသထံ ဥပဝသာမိ [ဥပဝသိံ (က.)]၊ သဒါ သီလေသု သံဝုတာ.

၁၁၆. ဧတေန သစ္စဝဇ္ဇေန၊ ပုတ္တော ဥပ္ပဇ္ဇတံ ဣသေ၊

မုသာ မေ ဘဏမာနာယ၊ မုဒ္ဓါ ဖလတု သတ္တဓာ.

၁၁၇. သဗ္ဗေဝ တေ ဓမ္မဂုဏာ၊ ရာဇပုတ္တိ ယသဿိနိ၊

သံဝိဇ္ဇန္တိ တယိ ဘဒ္ဒေ၊ ယေ တွံ ကိတ္တေသိ အတ္တနိ.

၁၁၈. ခတ္တိယော ဇာတိသမ္ပန္နော၊ အဘိဇာတော ယသဿိမာ၊

ဓမ္မရာဇာ ဝိဒေဟာနံ၊ ပုတ္တော ဥပ္ပဇ္ဇတေ တဝ [တဝံ (သီ. ပီ.)].

၁၁၉. ဒုမ္မီ [ရုမ္မီ (သီ. ပီ.)] ရဇောဇလ္လဓရော၊ အဃေ ဝေဟာယသံ ဌိတော၊

မနုညံ ဘာသသေ ဝါစံ၊ ယံ မယှံ ဟဒယင်္ဂမံ.

၁၂၀. ဒေဝတာနုသိ သဂ္ဂမှာ၊ ဣသိ ဝါသိ [စာပိ (က.)] မဟိဒ္ဓိကော၊

ကော ဝါသိ တွံ အနုပ္ပတ္တော၊ အတ္တာနံ မေ ပဝေဒယ.

၁၂၁. ယံ ဒေဝသံဃာ ဝန္ဒန္တိ၊ သုဓမ္မာယံ သမာဂတာ၊

သောဟံ သက္ကော သဟဿက္ခော၊ အာဂတောသ္မိ တဝန္တိကေ.

၁၂၂. ဣတ္ထိယော [ဣတ္ထိယာ (ပီ.)] ဇီဝလောကသ္မိံ၊ ယာ ဟောတိ [ဟောန္တိ (သီ. သျာ.)] သမစာရိနီ [သမစာရိဏီ (သီ.)]၊

မေဓာဝိနီ သီလဝတီ၊ သဿုဒေဝါ ပတိဗ္ဗတာ.

၁၂၃. တာဒိသာယ သုမေဓာယ၊ သုစိကမ္မာယ နာရိယာ၊

ဒေဝါ ဒဿနမာယန္တိ၊ မာနုသိယာ အမာနုသာ.

၁၂၄. တွဉ္စ ဘဒ္ဒေ သုစိဏ္ဏေန၊ ပုဗ္ဗေ သုစရိတေန စ၊

ဣဓ ရာဇကုလေ ဇာတာ၊ သဗ္ဗကာမသမိဒ္ဓိနီ.

၁၂၅. အယဉ္စ တေ ရာဇပုတ္တိ၊ ဥဘယတ္ထ ကဋဂ္ဂဟော၊

ဒေဝလောကူပပတ္တီ စ၊ ကိတ္တီ စ ဣဓ ဇီဝိတေ.

၁၂၆. စိရံ သုမေဓေ သုခိနီ၊ ဓမ္မမတ္တနိ ပါလယ၊

ဧသာဟံ တိဒိဝံ ယာမိ၊ ပိယံ မေ တဝ ဒဿနန္တိ.

သုရုစိဇာတကံ ဆဋ္ဌံ.