၄၉၀. ပဉ္စုပေါသထိကဇာတကံ (၇)

၁၂၇. အပ္ပေါဿုက္ကော ဒါနိ တုဝံ ကပေါတ၊ ဝိဟင်္ဂမ န တဝ ဘောဇနတ္ထော၊

ခုဒံ [ခုဒ္ဒံ (သျာ. က.)၊ ခုဓံ (သက္ကတ-ပါကတာနုရူပံ)] ပိပါသံ အဓိဝါသယန္တော၊ ကသ္မာ ဘဝံပေါသထိကော ကပေါတ [ကပေါတော (သီ. ပီ.)].

၁၂၈. အဟံ ပုရေ ဂိဒ္ဓိဂတော ကပေါတိယာ၊ အသ္မိံ ပဒေသသ္မိမုဘော ရမာမ၊

အထဂ္ဂဟီ သာကုဏိကော ကပေါတိံ၊ အကာမကော တာယ ဝိနာ အဟောသိံ.

၁၂၉. နာနာဘဝါ ဝိပ္ပယောဂေန တဿာ၊ မနောမယံ ဝေဒန ဝေဒယာမိ [ဝေဒနံ ဝေဒိယာမိ (သီ. ပီ.)]၊

တသ္မာ အဟံပေါသထံ ပါလယာမိ၊ ရာဂေါ မမံ မာ ပုနရာဂမာသိ.

၁၃၀. အနုဇ္ဇုဂါမီ ဥရဂါ ဒုဇိဝှ [ဥရဂ ဒွိဇိဝှ (သီ.)]၊ ဒါဌာဝုဓော ဃောရဝိသောသိ သပ္ပ၊

ခုဒံ ပိပါသံ အဓိဝါသယန္တော၊ ကသ္မာ ဘဝံပေါသထိကော နု ဒီဃ [ဒီဃော (သီ. ပီ.)].

၁၃၁. ဥသဘော အဟူ ဗလဝါ ဂါမိကဿ၊ စလက္ကကူ ဝဏ္ဏဗလူပပန္နော၊

သော မံ အက္ကမိ တံ ကုပိတော အဍံသိ၊ ဒုက္ခာဘိတုဏ္ဏော မရဏံ ဥပါဂါ [ဥပါဂမိ (သီ. ပီ.)].

၁၃၂. တတော ဇနာ နိက္ခမိတွာန ဂါမာ၊ ကန္ဒိတွာ ရောဒိတွာ [ကန္ဒိတွ ရောဒိတွ (သီ.)] အပက္ကမိံသု၊

တသ္မာ အဟံပေါသထံ ပါလယာမိ၊ ကောဓော မမံ မာ ပုနရာဂမာသိ.

၁၃၃. မတာန မံသာနိ ဗဟူ သုသာနေ၊ မနုညရူပံ တဝ ဘောဇနေ တံ၊

ခုဒံ ပိပါသံ အဓိဝါသယန္တော၊ ကသ္မာ ဘဝံပေါသထိကော သိင်္ဂါလ [သိဂါလော (သီ. ပီ.)].

၁၃၄. ပဝိသိ [ပဝိဿံ (သီ. ပီ.)၊ ပဝိဿ (သျာ.)] ကုစ္ဆိံ မဟတော ဂဇဿ၊ ကုဏပေ ရတော ဟတ္ထိမံသေသု ဂိဒ္ဓေါ [ဟတ္ထိမံသေ ပဂိဒ္ဓေါ (သီ. ပီ.)]၊

ဥဏှော စ ဝါတော တိခိဏာ စ ရသ္မိယော၊ တေ သောသယုံ တဿ ကရီသမဂ္ဂံ.

၁၃၅. ကိသော စ ပဏ္ဍူ စ အဟံ ဘဒန္တေ၊ န မေ အဟူ နိက္ခမနာယ မဂ္ဂေါ၊

မဟာ စ မေဃော သဟသာ ပဝဿိ၊ သော တေမယီ တဿ ကရီသမဂ္ဂံ.

၁၃၆. တတော အဟံ နိက္ခမိသံ ဘဒန္တေ၊ စန္ဒော ယထာ ရာဟုမုခါ ပမုတ္တော၊

တသ္မာ အဟံပေါသထံ ပါလယာမိ၊ လောဘော မမံ မာ ပုနရာဂမာသိ.

၁၃၇. ဝမ္မီကထူပသ္မိံ ကိပိလ္လိကာနိ၊ နိပ္ပေါထယန္တော တုဝံ ပုရေ စရာသိ၊

ခုဒံ ပိပါသံ အဓိဝါသယန္တော၊ ကသ္မာ ဘဝံပေါသထိကော နု အစ္ဆ [အစ္ဆော (သီ. ပီ.)].

၁၃၈. သကံ နိကေတံ အတိဟီဠယာနော [အတိဟေဠယာနော (သျာ. က.)]၊ အတြိစ္ဆတာ [အတြိစ္ဆတာယ (သီ. သျာ. ပီ.)] မလ္လဂါမံ [မလတံ (သီ. ပီ.)၊ မလ္လယတံ (က.)] အဂစ္ဆိံ၊

တတော ဇနာ နိက္ခမိတွာန ဂါမာ၊ ကောဒဏ္ဍကေန ပရိပေါထယိံသု မံ.

၁၃၉. သော ဘိန္နသီသော ရုဟိရမက္ခိတင်္ဂေါ၊ ပစ္စာဂမာသိံ သကံ [သ သကံ (သျာ. က.)၊’ထ သကံ (?)] နိကေတံ၊

တသ္မာ အဟံပေါသထံ ပါလယာမိ၊ အတြိစ္ဆတာ မာ ပုနရာဂမာသိ.

၁၄၀. ယံ နော အပုစ္ဆိတ္ထ တုဝံ ဘဒန္တေ၊ သဗ္ဗေဝ ဗျာကရိမှ ယထာ ပဇာနံ၊

မယမ္ပိ ပုစ္ဆာမ တုဝံ ဘဒန္တေ၊ ကသ္မာ ဘဝံပေါသထိကော နု ဗြဟ္မေ.

၁၄၁. အနူပလိတ္တော မမ အဿမမှိ၊ ပစ္စေကဗုဒ္ဓေါ မုဟုတ္တံ နိသီဒိ၊

သော မံ အဝေဒီ ဂတိမာဂတိဉ္စ၊ နာမဉ္စ ဂေါတ္တံ စရဏဉ္စ သဗ္ဗံ.

၁၄၂. ဧဝမ္ပဟံ ဝန္ဒိ န [ဧဝမ္ပဟံ နဂ္ဂဟေ (သီ. ပီ.)] တဿ ပါဒေ၊ န စာပိ နံ မာနဂတေန ပုစ္ဆိံ၊

တသ္မာ အဟံပေါသထံ ပါလယာမိ၊ မာနော မမံ မာ ပုနရာဂမာသီတိ.

ပဉ္စုပေါသထိကဇာတကံ သတ္တမံ.