၄၈၈. ဘိသဇာတကံ (၅)

၇၈. အဿံ ဂဝံ ရဇတံ ဇာတရူပံ၊ ဘရိယဉ္စ သော ဣဓ လဘတံ မနာပံ၊

ပုတ္တေဟိ ဒါရေဟိ သမင်္ဂိ ဟောတု၊ ဘိသာနိ တေ ဗြာဟ္မဏ ယော အဟာသိ.

၇၉. မာလဉ္စ သော ကာသိကစန္ဒနဉ္စ၊ ဓာရေတု ပုတ္တဿ ဗဟူ ဘဝန္တု၊

ကာမေသု တိဗ္ဗံ ကုရုတံ အပေက္ခံ၊ ဘိသာနိ တေ ဗြာဟ္မဏ ယော အဟာသိ.

၈၀. ပဟူတဓညော ကသိမာ ယသဿီ၊ ပုတ္တေ ဂိဟီ ဓနိမာ သဗ္ဗကာမေ၊

ဝယံ အပဿံ ဃရမာဝသာတု၊ ဘိသာနိ တေ ဗြာဟ္မဏ ယော အဟာသိ.

၈၁. သော ခတ္တိယော ဟောတု ပသယှကာရီ၊ ရာဇာဘိရာဇာ [ရာဇာဓိရာဇာ (သျာ. က.)] ဗလဝါ ယသဿီ၊

သ စာတုရန္တံ မဟိမာဝသာတု၊ ဘိသာနိ တေ ဗြာဟ္မဏ ယော အဟာသိ.

၈၂. သော ဗြာဟ္မဏော ဟောတု အဝီတရာဂေါ၊ မုဟုတ္တနက္ခတ္တပထေသု ယုတ္တော၊

ပူဇေတု နံ ရဋ္ဌပတီ ယသဿီ၊ ဘိသာနိ တေ ဗြာဟ္မဏ ယော အဟာသိ.

၈၃. အဇ္ဈာယကံ သဗ္ဗသမန္တဝေဒံ [သဗ္ဗသမတ္တဝေဒံ (သီ.)၊ သဗ္ဗသမတ္တဝေဒနံ (ပီ.)]၊ တပဿီနံ မညတု သဗ္ဗလောကော၊

ပူဇေန္တု နံ ဇာနပဒါ သမေစ္စ၊ ဘိသာနိ တေ ဗြာဟ္မဏ ယော အဟာသိ.

၈၄. စတုဿဒံ ဂါမဝရံ သမိဒ္ဓံ၊ ဒိန္နဉှိ သော ဘုဉ္ဇတု ဝါသဝေန၊

အဝီတရာဂေါ မရဏံ ဥပေတု၊ ဘိသာနိ တေ ဗြာဟ္မဏ ယော အဟာသိ.

၈၅. သော ဂါမဏီ ဟောတု သဟာယမဇ္ဈေ၊ နစ္စေဟိ ဂီတေဟိ ပမောဒမာနော၊

သော ရာဇတော ဗျသန မာလတ္ထ [မာ ရာဇတော ဝျသန’မလတ္ထ (သီ. သျာ. ပီ.)] ကိဉ္စိ၊ ဘိသာနိ တေ ဗြာဟ္မဏ ယော အဟာသိ.

၈၆. ယံ ဧကရာဇာ ပထဝိံ ဝိဇေတွာ၊ ဣတ္ထီသဟဿာန [ဣတ္ထီသဟဿဿ (သီ. ပီ.)] ဌပေတု အဂ္ဂံ၊

သီမန္တိနီနံ ပဝရာ ဘဝါတု၊ ဘိသာနိ တေ ဗြာဟ္မဏ ယာ အဟာသိ.

၈၇. ဣသီနဉှိ သာ သဗ္ဗသမာဂတာနံ၊ ဘုဉ္ဇေယျ သာဒုံ အဝိကမ္ပမာနာ၊

စရာတု လာဘေန ဝိကတ္ထမာနာ၊ ဘိသာနိ တေ ဗြာဟ္မဏ ယာ အဟာသိ.

၈၈. အာဝါသိကော ဟောတု မဟာဝိဟာရေ၊ နဝကမ္မိကော ဟောတု ဂဇင်္ဂလာယံ [ကဇင်္ဂလာယံ (သီ. သျာ. ပီ.)]၊

အာလောကသန္ဓိံ ဒိဝသံ [ဒိဝသာ (သီ. သျာ. ပီ.)] ကရောတု၊ ဘိသာနိ တေ ဗြာဟ္မဏ ယော အဟာသိ.

၈၉. သော ဗဇ္ဈတူ ပါသသတေဟိ ဆဗ္ဘိ [ဆမှိ (သီ. ပီ.)၊ ဆဿု (?)]၊ ရမ္မာ ဝနာ နိယျတု ရာဇဓာနိံ [ရာဇဌာနိံ (က.)]၊

တုတ္တေဟိ သော ဟညတု ပါစနေဟိ၊ ဘိသာနိ တေ ဗြာဟ္မဏ ယော အဟာသိ.

၉၀. အလက္ကမာလီ တိပုကဏ္ဏဝိဒ္ဓေါ၊ လဋ္ဌီဟတော သပ္ပမုခံ ဥပေတု၊

သကစ္ဆဗန္ဓော [သက္ကစ္စဗဒ္ဓေါ (သီ. ပီ.)၊ သံကစ္စဗန္ဓော (နိယျ)] ဝိသိခံ စရာတု၊ ဘိသာနိ တေ ဗြာဟ္မဏ ယော အဟာသိ.

၉၁. ယော ဝေ အနဋ္ဌံဝ [အနဋ္ဌံ (သီ. သျာ. ပီ.)] နဋ္ဌန္တိ စာဟ၊ ကာမေဝ သော လဘတံ ဘုဉ္ဇတဉ္စ [လဘတု ဘုဉ္ဇတု စ (သျာ.)]၊

အဂါရမဇ္ဈေ မရဏံ ဥပေတု၊ ယော ဝါ ဘောန္တော သင်္ကတိ ကဉ္စိဒေဝ [ကိဉ္စိဒေဝ (က.)].

၉၂. ယဒေသမာနာ ဝိစရန္တိ လောကေ၊ ဣဋ္ဌဉ္စ ကန္တဉ္စ ဗဟူနမေတံ၊

ပိယံ မနုညံ စိဓ ဇီဝလောကေ၊ ကသ္မာ ဣသယော နပ္ပသံသန္တိ ကာမေ.

၉၃. ကာမေသု ဝေ ဟညရေ ဗဇ္ဈရေ စ၊ ကာမေသု ဒုက္ခဉ္စ ဘယဉ္စ ဇာတံ၊

ကာမေသု ဘူတာဓိပတီ ပမတ္တာ၊ ပါပါနိ ကမ္မာနိ ကရောန္တိ မောဟာ.

၉၄. တေ ပါပဓမ္မာ ပသဝေတွ ပါပံ၊ ကာယဿ ဘေဒါ နိရယံ ဝဇန္တိ၊

အာဒီနဝံ ကာမဂုဏေသု ဒိသွာ၊ တသ္မာ ဣသယော နပ္ပသံသန္တိ ကာမေ.

၉၅. ဝီမံသမာနော ဣသိနော ဘိသာနိ၊ တီရေ ဂဟေတွာန ထလေ နိဓေသိံ၊

သုဒ္ဓါ အပါပါ ဣသယော ဝသန္တိ၊ ဧတာနိ တေ ဗြဟ္မစာရီ ဘိသာနိ.

၉၆. န တေ နဋာ နော ပန ကီဠနေယျာ၊ န ဗန္ဓဝါ နော ပန တေ သဟာယာ၊

ကိသ္မိံ ဝုပတ္ထမ္ဘ သဟဿနေတ္တ၊ ဣသီဟိ တွံ ကီဠသိ ဒေဝရာဇ.

၉၇. အာစရိယော မေသိ ပိတာ စ မယှံ၊ ဧသာ ပတိဋ္ဌာ ခလိတဿ ဗြဟ္မေ၊

ဧကာပရာဓံ ခမ ဘူရိပည၊ န ပဏ္ဍိတာ ကောဓဗလာ ဘဝန္တိ.

၉၈. သုဝါသိတံ ဣသိနံ ဧကရတ္တံ၊ ယံ ဝါသဝံ ဘူတပတိဒ္ဒသာမ၊

သဗ္ဗေဝ ဘောန္တော သုမနာ ဘဝန္တု၊ ယံ ဗြာဟ္မဏော ပစ္စုပါဒီ ဘိသာနိ.

၉၉. အဟဉ္စ သာရိပုတ္တော စ၊ မောဂ္ဂလ္လာနော စ ကဿပေါ၊

အနုရုဒ္ဓေါ ပုဏ္ဏော အာနန္ဒော၊ တဒါသုံ သတ္တ ဘာတရော.

၁၀၀. ဘဂိနီ ဥပ္ပလဝဏ္ဏာ စ၊ ဒါသီ ခုဇ္ဇုတ္တရာ တဒါ၊

စိတ္တော ဂဟပတိ ဒါသော၊ ယက္ခော သာတာဂိရော တဒါ.

၁၀၁. ပါလိလေယျော [ပါရိလေယျော (သီ. ပီ.)] တဒါ နာဂေါ၊ မဓုဒေါ [မဓုဝါ (သီ. ပီ.)] သေဋ္ဌဝါနရော၊

ကာဠုဒါယီ တဒါ သက္ကော၊ ဧဝံ ဓာရေထ ဇာတကန္တိ.

ဘိသဇာတကံ ပဉ္စမံ.