၄၆၀. ယုဓဉ္စယဇာတကံ (၆)

၇၃. မိတ္တာမစ္စပရိဗျူဠှံ [ပရိဗ္ဗူဠှံ (သီ. ပီ.)]၊ အဟံ ဝန္ဒေ ရထေသဘံ၊

ပဗ္ဗဇိဿာမဟံ ရာဇ [ပဗ္ဗဇိဿံ မဟာရာဇ (သီ. ပီ.)]၊ တံ ဒေဝေါ အနုမညတု.

၇၄. သစေ တေ ဦနံ ကာမေဟိ၊ အဟံ ပရိပူရယာမိ [အဟံဝ ပူရယာမိ (က.)] တေ၊

ယော တံ ဟိံသတိ ဝါရေမိ၊ မာ ပဗ္ဗဇ [ပဗ္ဗဇိ (ပီ.)] ယုဓဉ္စယ [ယုဓဉ္ဇယ (သီ. သျာ.)၊ ယုဝဉ္ဇယ (ပီ.)].

၇၅. န မတ္ထိ ဦနံ ကာမေဟိ၊ ဟိံသိတာ မေ န ဝိဇ္ဇတိ၊

ဒီပဉ္စ ကာတုမိစ္ဆာမိ၊ ယံ ဇရာ နာဘိကီရတိ.

၇၆. ပုတ္တော ဝါ ပိတရံ ယာစေ၊ ပိတာ ဝါ ပုတ္တမောရသံ၊

နေဂမော တံ ယာစေ [နေဂမော ယာစတေ (သီ. သျာ. ပီ.)] တာတ၊ မာ ပဗ္ဗဇ ယုဓဉ္စယ.

၇၇. မာ မံ ဒေဝ နိဝါရေဟိ၊ ပဗ္ဗဇန္တံ ရထေသဘ၊

မာဟံ ကာမေဟိ သမ္မတ္တော၊ ဇရာယ ဝသမနွဂူ.

၇၈. အဟံ တံ တာတ ယာစာမိ၊ အဟံ ပုတ္တ နိဝါရယေ၊

စိရံ တံ ဒဋ္ဌုမိစ္ဆာမိ၊ မာ ပဗ္ဗဇ ယုဓဉ္စယ.

၇၉. ဥဿာဝေါဝ တိဏဂ္ဂမှိ၊ သူရိယုဂ္ဂမနံ ပတိ၊

ဧဝမာယု မနုဿာနံ၊ မာ မံ အမ္မ နိဝါရယ.

၈၀. တရမာနော ဣမံ ယာနံ၊ အာရောပေတု [တရမာနာ ဣမံ ယာနံ၊ အာရောပေန္တု (သီ. ပီ.)] ရထေသဘ၊

မာ မေ မာတာ တရန္တဿ၊ အန္တရာယကရာ အဟု.

၈၁. အဘိဓာဝထ ဘဒ္ဒန္တေ၊ သုညံ ဟေဿတိ ရမ္မကံ၊

ယုဓဉ္စယော အနုညာတော၊ သဗ္ဗဒတ္တေန ရာဇိနာ.

၈၂. ယောဟု သေဋ္ဌော သဟဿဿ [မနုဿာနံ (သျာ.)၊ သဟဿာနံ (က.)]၊ ယုဝါ ကဉ္စနသန္နိဘော၊

သောယံ ကုမာရော ပဗ္ဗဇိတော၊ ကာသာယဝသနော ဗလီ.

၈၃. ဥဘော ကုမာရာ ပဗ္ဗဇိတာ၊ ယုဓဉ္စယော ယုဓိဋ္ဌိလော၊

ပဟာယ မာတာပိတရော၊ သင်္ဂံ ဆေတွာန မစ္စုနောတိ.

ယုဓဉ္စယဇာတကံ ဆဋ္ဌံ.