၄၆၁. ဒသရထဇာတကံ (၇)

၈၄. ဧထ လက္ခဏ သီတာ စ၊ ဥဘော ဩတရထောဒကံ၊

ဧဝါယံ ဘရတော အာဟ၊ ‘‘ရာဇာ ဒသရထော မတော’’.

၈၅. ကေန ရာမပ္ပဘာဝေန၊ သောစိတဗ္ဗံ န သောစသိ၊

ပိတရံ ကာလကတံ [ကာလင်္ကတံ (က.)] သုတွာ၊ န တံ ပသဟတေ ဒုခံ.

၈၆. ယံ န သက္ကာ နိပါလေတုံ၊ ပေါသေန လပတံ ဗဟုံ၊

သ ကိဿ ဝိညူ မေဓာဝီ၊ အတ္တာနမုပတာပယေ.

၈၇. ဒဟရာ စ ဟိ ဝုဒ္ဓါ စ [ယေ ဝုဒ္ဓါ (သီ. အဋ္ဌ.)၊ ယေ ဝုဍ္ဎာ (သျာ.)]၊ ယေ ဗာလာ ယေ စ ပဏ္ဍိတာ၊

အဍ္ဎာ စေဝ ဒလိဒ္ဒါ စ၊ သဗ္ဗေ မစ္စုပရာယဏာ.

၈၈. ဖလာနမိဝ ပက္ကာနံ၊ နိစ္စံ ပတနတော ဘယံ၊

ဧဝံ ဇာတာန မစ္စာနံ၊ နိစ္စ မရဏတော ဘယံ.

၈၉. သာယမေကေ န ဒိဿန္တိ၊ ပါတော ဒိဋ္ဌာ ဗဟုဇ္ဇနာ၊

ပါတော ဧကေ န ဒိဿန္တိ၊ သာယံ ဒိဋ္ဌာ ဗဟုဇ္ဇနာ.

၉၀. ပရိဒေဝယမာနော စေ၊ ကိဉ္စိဒတ္ထံ ဥဒဗ္ဗဟေ၊

သမ္မူဠှော ဟိံသမတ္တာနံ၊ ကယိရာ တံ ဝိစက္ခဏော.

၉၁. ကိသော ဝိဝဏ္ဏော ဘဝတိ၊ ဟိံသမတ္တာနမတ္တနော [မတ္တနာ (သီ. အဋ္ဌ. သု. နိ. ၅၉၀)]၊

န တေန ပေတာ ပါလေန္တိ၊ နိရတ္ထာ ပရိဒေဝနာ.

၉၂. ယထာ သရဏမာဒိတ္တံ၊ ဝါရိနာ ပရိနိဗ္ဗယေ [ဝါရိနာဝနိဗ္ဗာပယေ (သျာ. က.)]၊

ဧဝမ္ပိ ဓီရော သုတဝါ၊ မေဓာဝီ ပဏ္ဍိတော နရော၊

ခိပ္ပမုပ္ပတိတံ သောကံ၊ ဝါတော တူလံဝ ဓံသယေ.

၉၃. မစ္စော ဧကောဝ [ဧကောဝ မစ္စော (သီ. သျာ. ပီ.)] အစ္စေတိ၊ ဧကောဝ ဇာယတေ ကုလေ၊

သံယောဂပရမာတွေဝ၊ သမ္ဘောဂါ သဗ္ဗပါဏိနံ.

၉၄. တသ္မာ ဟိ ဓီရဿ ဗဟုဿုတဿ၊ သမ္ပဿတော လောကမိမံ ပရဉ္စ၊

အညာယ ဓမ္မံ ဟဒယံ မနဉ္စ၊ သောကာ မဟန္တာပိ န တာပယန္တိ.

၉၅. သောဟံ ဒဿဉ္စ ဘောက္ခဉ္စ၊ ဘရိဿာမိ စ [သောဟံ ယသဉ္စ ဘောဂဉ္စ၊ ဘရိယာပိ စ (သျာ. က.)] ဉာတကေ၊

သေသဉ္စ ပါလယိဿာမိ၊ ကိစ္စမေတံ [ကိစ္စမေဝံ (ပီ.)] ဝိဇာနတော.

၉၆. ဒသ ဝဿသဟဿာနိ၊ သဋ္ဌိ ဝဿသတာနိ စ၊

ကမ္ဗုဂီဝေါ မဟာဗာဟု၊ ရာမော ရဇ္ဇမကာရယီတိ.

ဒသရထဇာတကံ သတ္တမံ.