၄၅၉. ပါနီယဇာတကံ (၅)

၅၉. မိတ္တော မိတ္တဿ ပါနီယံ၊ အဒိန္နံ ပရိဘုဉ္ဇိသံ၊

တေန ပစ္ဆာ ဝိဇိဂုစ္ဆိံ၊ တံ ပါပံ ပကတံ မယာ၊

မာ ပုန အကရံ ပါပံ၊ တသ္မာ ပဗ္ဗဇိတော အဟံ.

၆၀. ပရဒါရဉ္စ ဒိသွာန၊ ဆန္ဒော မေ ဥဒပဇ္ဇထ [ဥပပဇ္ဇထ (သျာ. က.)]၊

တေန ပစ္ဆာ ဝိဇိဂုစ္ဆိံ၊ တံ ပါပံ ပကတံ မယာ၊

မာ ပုန အကရံ ပါပံ၊ တသ္မာ ပဗ္ဗဇိတော အဟံ.

၆၁. ပိတရံ မေ မဟာရာဇ၊ စောရာ အဂဏှု [အဂဏှုံ (သီ. ပီ.)၊ အဂဏှိ (က.)] ကာနနေ၊

တေသာဟံ ပုစ္ဆိတော ဇာနံ၊ အညထာ နံ ဝိယာကရိံ.

၆၂. တေန ပစ္ဆာ ဝိဇိဂုစ္ဆိံ၊ တံ ပါပံ ပကတံ မယာ၊

မာ ပုန အကရံ ပါပံ၊ တသ္မာ ပဗ္ဗဇိတော အဟံ.

၆၃. ပါဏာတိပါတမကရုံ၊ သောမယာဂေ ဥပဋ္ဌိတေ၊

တေသာဟံ သမနုညာသိံ၊ တေန ပစ္ဆာ ဝိဇိဂုစ္ဆိံ.

၆၄. တံ ပါပံ ပကတံ မယာ၊ မာ ပုန အကရံ ပါပံ၊

တသ္မာ ပဗ္ဗဇိတော အဟံ.

၆၅. သုရာမေရယမာဓုကာ [မဓုကာ (သီ. သျာ. ပီ.)]၊ ယေ ဇနာ ပဌမာသု နော၊

ဗဟူနံ တေ အနတ္ထာယ၊ မဇ္ဇပါနမကပ္ပယုံ.

၆၆. တေသာဟံ သမနုညာသိံ၊ တေန ပစ္ဆာ ဝိဇိဂုစ္ဆိံ၊

တံ ပါပံ ပကတံ မယာ၊ မာ ပုန အကရံ ပါပံ၊

တသ္မာ ပဗ္ဗဇိတော အဟံ.

၆၇. ဓိရတ္ထု သုဗဟူ ကာမေ၊ ဒုဂ္ဂန္ဓေ ဗဟုကဏ္ဋကေ၊

ယေ အဟံ ပဋိသေဝန္တော၊ နာလဘိံ တာဒိသံ သုခံ.

၆၈. မဟဿာဒါ သုခါ ကာမာ၊ နတ္ထိ ကာမာ ပရံ [ကာမပရံ (သီ. ပီ.)] သုခံ၊

ယေ ကာမေ ပဋိသေဝန္တိ၊ သဂ္ဂံ တေ ဥပပဇ္ဇရေ.

၆၉. အပ္ပဿာဒါ ဒုခါ ကာမာ၊ နတ္ထိ ကာမာ ပရံ ဒုခံ၊

ယေ ကာမေ ပဋိသေဝန္တိ၊ နိရယံ တေ ဥပပဇ္ဇရေ.

၇၀. အသီ ယထာ သုနိသိတော၊ နေတ္တိံသောဝ သုပါယိကော [သုပါသိတော (က. သီ. နိယျ)၊ သုပါယိတော (က. အဋ္ဌ.)]၊

သတ္တီဝ ဥရသိ ခိတ္တာ၊ ကာမာ ဒုက္ခတရာ တတော.

၇၁. အင်္ဂါရာနံဝ ဇလိတံ၊ ကာသုံ သာဓိကပေါရိသံ၊

ဖာလံဝ ဒိဝသံတတ္တံ၊ ကာမာ ဒုက္ခတရာ တတော.

၇၂. ဝိသံ ယထာ ဟလာဟလံ၊ တေလံ ပက္ကုထိတံ [ဥက္ကဋ္ဌိတံ (သီ. ပီ.)၊ ပက္ကုဋ္ဌိတံ (သျာ.)] ယထာ၊

တမ္ဗလောဟ [တမ္ပလောဟံ (သျာ.)] ဝိလီနံဝ၊ ကာမာ ဒုက္ခတရာ တတောတိ.

ပါနီယဇာတကံ ပဉ္စမံ.