၄၅၈. ဥဒယဇာတကံ (၄)

၃၇. ဧကာ နိသိန္နာ သုစိ သညတူရူ၊ ပါသာဒမာရုယှ အနိန္ဒိတင်္ဂီ၊

ယာစာမိ တံ ကိန္နရနေတ္တစက္ခု၊ ဣမေကရတ္တိံ ဥဘယော ဝသေမ.

၃၈. ဩကိဏ္ဏန္တရပရိခံ၊ ဒဠှမဋ္ဋာလကောဋ္ဌကံ၊

ရက္ခိတံ ခဂ္ဂဟတ္ထေဟိ၊ ဒုပ္ပဝေသမိဒံ ပုရံ.

၃၉. ဒဟရဿ ယုဝိနော စာပိ၊ အာဂမော စ န ဝိဇ္ဇတိ၊

အထ ကေန နု ဝဏ္ဏေန၊ သင်္ဂမံ ဣစ္ဆသေ မယာ.

၄၀. ယက္ခောဟမသ္မိ ကလျာဏိ၊ အာဂတောသ္မိ တဝန္တိကေ [တဝန္တိကံ (သီ. ပီ.)]၊

တွံ မံ နန္ဒယ [နန္ဒဿု (သျာ. က.)] ဘဒ္ဒန္တေ၊ ပုဏ္ဏကံသံ ဒဒါမိ တေ.

၄၁. ဒေဝံ ဝ ယက္ခံ အထ ဝါ မနုဿံ၊ န ပတ္ထယေ ဥဒယမတိစ္စ အညံ၊

ဂစ္ဆေဝ တွံ ယက္ခ မဟာနုဘာဝ၊ မာ စဿု ဂန္တွာ ပုနရာဝဇိတ္ထ.

၄၂. ယာ သာ ရတိ ဥတ္တမာ ကာမဘောဂိနံ၊ ယံ ဟေတု သတ္တာ ဝိသမံ စရန္တိ၊

မာ တံ ရတိံ ဇီယိ တုဝံ သုစိမှိ တေ၊ ဒဒါမိ တေ ရူပိယံ ကံသပူရံ.

၄၃. နာရိံ နရော နိဇ္ဈပယံ ဓနေန၊ ဥက္ကံသတီ ယတ္ထ ကရောတိ ဆန္ဒံ၊

ဝိပစ္စနီကော တဝ ဒေဝဓမ္မော၊ ပစ္စက္ခတော ထောကတရေန ဧသိ.

၄၄. အာယု စ ဝဏ္ဏော စ [အာယုံ စ ဝဏ္ဏံ စ (က. သီ. ပီ.)] မနုဿလောကေ၊ နိဟီယတိ မနုဇာနံ သုဂ္ဂတ္တေ၊

တေနေဝ ဝဏ္ဏေန ဓနမ္ပိ တုယှံ၊ နိဟီယတိ ဇိဏ္ဏတရာသိ အဇ္ဇ.

၄၅. ဧဝံ မေ ပေက္ခမာနဿ၊ ရာဇပုတ္တိ ယသဿိနိ၊

ဟာယတေဝ တဝ [ဟာယတေ ဝတ တေ (သီ. သျာ. က.)၊ ဟာယတေဝ တတော (ပီ.)] ဝဏ္ဏော၊ အဟောရတ္တာနမစ္စယေ.

၄၆. ဣမိနာဝ တွံ ဝယသာ၊ ရာဇပုတ္တိ သုမေဓသေ၊

ဗြဟ္မစရိယံ စရေယျာသိ၊ ဘိယျော ဝဏ္ဏဝတီ သိယာ.

၄၇. ဒေဝါ န ဇီရန္တိ ယထာ မနုဿာ၊ ဂတ္တေသု တေသံ ဝလိယော န ဟောန္တိ၊

ပုစ္ဆာမိ တံ ယက္ခ မဟာနုဘာဝ၊ ကထံ နု ဒေဝါန [ကထံ န ဒေဝါနံ (ပီ.)] သရီရဒေဟော.

၄၈. ဒေဝါ န ဇီရန္တိ ယထာ မနုဿာ၊ ဂတ္တေသု တေသံ ဝလိယော န ဟောန္တိ၊

သုဝေ သုဝေ ဘိယျတရောဝ [ဘိယျတရော စ (က.)] တေသံ၊ ဒိဗ္ဗော စ ဝဏ္ဏော ဝိပုလာ စ ဘောဂါ.

၄၉. ကိံသူဓ ဘီတာ ဇနတာ အနေကာ၊ မဂ္ဂေါ စ နေကာယတနံ ပဝုတ္တော၊

ပုစ္ဆာမိ တံ ယက္ခ မဟာနုဘာဝ၊ ကတ္ထဋ္ဌိတော ပရလောကံ န ဘာယေ.

၅၀. ဝါစံ မနဉ္စ ပဏိဓာယ သမ္မာ၊ ကာယေန ပါပါနိ အကုဗ္ဗမာနော၊

ဗဟုန္နပါနံ ဃရမာဝသန္တော၊ သဒ္ဓေါ မုဒူ သံဝိဘာဂီ ဝဒညူ၊

သင်္ဂါဟကော သခိလော သဏှဝါစော၊ ဧတ္ထဋ္ဌိတော ပရလောကံ န ဘာယေ.

၅၁. အနုသာသသိ မံ ယက္ခ၊ ယထာ မာတာ ယထာ ပိတာ၊

ဥဠာရဝဏ္ဏံ ပုစ္ဆာမိ၊ ကော နု တွမသိ သုဗြဟာ.

၅၂. ဥဒယောဟမသ္မိ ကလျာဏိ၊ သင်္ကရတ္တာ ဣဓာဂတော [သင်္ဂရတ္ထာ ဣဓာဂတော (သီ. ပီ.)၊ သင်္ဂရတ္ထာယိဓာဂတော (သျာ.)]၊

အာမန္တ ခေါ တံ ဂစ္ဆာမိ၊ မုတ္တောသ္မိ တဝ သင်္ကရာ [သင်္ဂရာ (သီ. သျာ. ပီ.)].

၅၃. သစေ ခေါ တွံ ဥဒယောသိ၊ သင်္ကရတ္တာ ဣဓာဂတော၊

အနုသာသ မံ ရာဇပုတ္တ၊ ယထာဿ ပုန သင်္ဂမော.

၅၄. အတိပတတိ [အဓိပတတီ (သီ. ပီ.)] ဝယော ခဏော တထေဝ၊ ဌာနံ နတ္ထိ ဓုဝံ စဝန္တိ သတ္တာ၊

ပရိဇိယျတိ အဒ္ဓုဝံ သရီရံ၊ ဥဒယေ မာ ပမာဒ [မာ ပမာဒံ (သီ.)] စရဿု ဓမ္မံ.

၅၅. ကသိဏာ ပထဝီ ဓနဿ ပူရာ၊ ဧကဿေဝ သိယာ အနညဓေယျာ၊

တဉ္စာပိ ဇဟတိ [ဇဟာတိ (သီ. သျာ. ပီ.)၊ ဇဟာတီ (?)] အဝီတရာဂေါ၊ ဥဒယေ မာ ပမာဒ စရဿု ဓမ္မံ.

၅၆. မာတာ စ ပိတာ စ ဘာတရော စ၊ ဘရိယာ ယာပိ ဓနေန ဟောတိ ကီတာ [ဘရိယာပိ ဓနေန ဟောန္တိ အတိတ္တာ (က.)]၊

တေ စာပိ ဇဟန္တိ အညမညံ၊ ဥဒယေ မာ ပမာဒ စရဿု ဓမ္မံ.

၅၇. ကာယော ပရဘောဇနန္တိ ဉတွာ [ကာယော စ ပရဘောဇနံ ဝိဒိတွာ (က.)]၊ သံသာရေ သုဂတိဉ္စ ဒုဂ္ဂတိဉ္စ [သုဂတီ စ ဒုဂ္ဂတီ စ (သီ. သျာ. ပီ.)၊ သုဂ္ဂတိံ ဒုဂ္ဂတိဉ္စ (က.)]၊

ဣတ္တရဝါသောတိ ဇာနိယာန၊ ဥဒယေ မာ ပမာဒ စရဿု ဓမ္မံ.

၅၈. သာဓု ဘာသတိယံ [ဘာသတယံ (သီ. ပီ.)] ယက္ခော၊ အပ္ပံ မစ္စာန ဇီဝိတံ၊

ကသိရဉ္စ ပရိတ္တဉ္စ၊ တဉ္စ ဒုက္ခေန သံယုတံ၊

သာဟံ ဧကာ ပဗ္ဗဇိဿာမိ၊ ဟိတွာ ကာသိံ သုရုန္ဓနန္တိ.

ဥဒယဇာတကံ စတုတ္ထံ.