၄၅၇. ဓမ္မဒေဝပုတ္တဇာတကံ (၃)

၂၆. ယသောကရော ပုညကရောဟမသ္မိ၊ သဒါတ္ထုတော သမဏဗြာဟ္မဏာနံ၊

မဂ္ဂါရဟော ဒေဝမနုဿပူဇိတော၊ ဓမ္မော အဟံ ဒေဟိ အဓမ္မ မဂ္ဂံ.

၂၇. အဓမ္မယာနံ ဒဠှမာရုဟိတွာ၊ အသန္တသန္တော ဗလဝါဟမသ္မိ၊

သ ကိဿ ဟေတုမှိ တဝဇ္ဇ ဒဇ္ဇံ၊ မဂ္ဂံ အဟံ ဓမ္မ အဒိန္နပုဗ္ဗံ.

၂၈. ဓမ္မော ဟဝေ ပါတုရဟောသိ ပုဗ္ဗေ၊ ပစ္ဆာ အဓမ္မော ဥဒပါဒိ လောကေ၊

ဇေဋ္ဌော စ သေဋ္ဌော စ သနန္တနော စ၊ ဥယျာဟိ ဇေဋ္ဌဿ ကနိဋ္ဌ မဂ္ဂါ.

၂၉. န ယာစနာယ နပိ ပါတိရူပါ၊ န အရဟတာ [န အရဟတိ (သီ. ပီ.)၊ အရဟတိ (က.)] တေဟံ ဒဒေယျံ မဂ္ဂံ၊

ယုဒ္ဓဉ္စ နော ဟောတု ဥဘိန္နမဇ္ဇ၊ ယုဒ္ဓမှိ ယော ဇေဿတိ တဿ မဂ္ဂေါ.

၃၀. သဗ္ဗာ ဒိသာ အနုဝိသဋောဟမသ္မိ၊ မဟဗ္ဗလော အမိတယသော အတုလျော၊

ဂုဏေဟိ သဗ္ဗေဟိ ဥပေတရူပေါ၊ ဓမ္မော အဓမ္မ တွံ ကထံ ဝိဇေဿသိ.

၃၁. လောဟေန ဝေ ဟညတိ ဇာတရူပံ၊ န ဇာတရူပေန ဟနန္တိ လောဟံ၊

သစေ အဓမ္မော ဟဉ္ဆတိ [ဟညတိ (သီ. သျာ.)၊ ဟညိတိ (ကတ္ထစိ)] ဓမ္မမဇ္ဇ၊ အယော သုဝဏ္ဏံ ဝိယ ဒဿနေယျံ.

၃၂. သစေ တုဝံ ယုဒ္ဓဗလော အဓမ္မ [ယုဒ္ဓဗလော’သိ’ဓမ္မ (က. သီ.)၊ ယုဒ္ဓဗလော’သ’ဓမ္မ (ပီ.)]၊ န တုယှ ဝုဍ္ဎာ [ဝဒ္ဓါ (သီ. ပီ.)] စ ဂရူ စ အတ္ထိ၊

မဂ္ဂဉ္စ တေ ဒမ္မိ ပိယာပ္ပိယေန၊ ဝါစာဒုရုတ္တာနိပိ တေ ခမာမိ.

၃၃. ဣဒဉ္စ သုတွာ ဝစနံ အဓမ္မော၊ အဝံသိရော ပတိတော ဥဒ္ဓပါဒေါ၊

‘‘ယုဒ္ဓတ္ထိကော စေ န လဘာမိ ယုဒ္ဓံ’’၊ ဧတ္တာဝတာ ဟောတိ ဟတော အဓမ္မော.

၃၄. ခန္တီဗလော ယုဒ္ဓဗလံ ဝိဇေတွာ၊ ဟန္တွာ အဓမ္မံ နိဟနိတွ [ဝိဟနိတွာ (က.)] ဘူမျာ၊

ပါယာသိ ဝိတ္တော [စိတ္တော (သျာ.)] အဘိရုယှ သန္ဒနံ၊ မဂ္ဂေနေဝ အတိဗလော သစ္စနိက္ကမော.

၃၅. မာတာ ပိတာ သမဏဗြာဟ္မဏာ စ၊ အသမ္မာနိတာ ယဿ သကေ အဂါရေ၊

ဣဓေဝ နိက္ခိပ္ပ သရီရဒေဟံ၊ ကာယဿ ဘေဒါ နိရယံ ဝဇန္တိ တေ [ဝဇန္တိ (သီ. ပီ.)]၊

ယထာ အဓမ္မော ပတိတော အဝံသိရော.

၃၆. မာတာ ပိတာ သမဏဗြာဟ္မဏာ စ၊ သုသမ္မာနိတာ ယဿ သကေ အဂါရေ၊

ဣဓေဝ နိက္ခိပ္ပ သရီရဒေဟံ၊ ကာယဿ ဘေဒါ သုဂတိံ ဝဇန္တိ တေ၊

ယထာပိ ဓမ္မော အဘိရုယှ သန္ဒနန္တိ.

ဓမ္မဒေဝပုတ္တဇာတကံ [ဓမ္မဇာတကံ (သီ. ပီ.)] တတိယံ.