၄၅၆. ဇုဏှဇာတကံ (၂)

၁၃. သုဏောဟိ မယှံ ဝစနံ ဇနိန္ဒ၊ အတ္ထေန ဇုဏှမှိ ဣဓာနုပတ္တော၊

န ဗြာဟ္မဏေ အဒ္ဓိကေ တိဋ္ဌမာနေ၊ ဂန္တဗ္ဗ [ဂန္တဗျ (က.)] မာဟု ဒွိပဒိန္ဒ [ဒိပဒါန (သီ. ပီ.)၊ ဒွိပဒါန (သျာ.)] သေဋ္ဌ.

၁၄. သုဏောမိ တိဋ္ဌာမိ ဝဒေဟိ ဗြဟ္မေ၊ ယေနာသိ [ယေနာပိ (သျာ. က.)] အတ္ထေန ဣဓာနုပတ္တော၊

ကံ ဝါ တွမတ္ထံ မယိ ပတ္ထယာနော၊ ဣဓာဂမာ ဗြဟ္မေ တဒိင်္ဃ ဗြူဟိ.

၁၅. ဒဒါဟိ မေ ဂါမဝရာနိ ပဉ္စ၊ ဒါသီသတံ သတ္တ ဂဝံသတာနိ၊

ပရောသဟဿဉ္စ သုဝဏ္ဏနိက္ခေ၊ ဘရိယာ စ မေ သာဒိသီ ဒွေ ဒဒါဟိ.

၁၆. တပေါ နု တေ ဗြာဟ္မဏ ဘိံသရူပေါ၊ မန္တာ နု တေ ဗြာဟ္မဏ စိတ္တရူပါ၊

ယက္ခာ နု [ယက္ခာ ဝ (သီ. ပီ.)] တေ အဿဝါ သန္တိ ကေစိ၊ အတ္ထံ ဝါ မေ အဘိဇာနာသိ ကတ္တံ.

၁၇. န မေ တပေါ အတ္ထိ န စာပိ မန္တာ၊ ယက္ခာပိ မေ အဿဝါ နတ္ထိ ကေစိ၊

အတ္ထမ္ပိ တေ နာဘိဇာနာမိ ကတ္တံ၊ ပုဗ္ဗေ စ ခေါ [ပုဗ္ဗေဝ ခေါ (သျာ. က.)] သင်္ဂတိမတ္တမာသိ.

၁၈. ပဌမံ ဣဒံ ဒဿနံ ဇာနတော မေ၊ န တာဘိဇာနာမိ ဣတော ပုရတ္ထာ၊

အက္ခာဟိ မေ ပုစ္ဆိတော ဧတမတ္ထံ၊ ကဒါ ကုဟိံ ဝါ အဟု သင်္ဂမော နော.

၁၉. ဂန္ဓာရရာဇဿ ပုရမှိ ရမ္မေ၊ အဝသိမှသေ တက္ကသီလာယံ ဒေဝ၊

တတ္ထန္ဓကာရမှိ တိမီသိကာယံ [တိမိဿိကာယံ (သီ. အဋ္ဌ.)၊ တိမိဿကာယံ (သျာ.)]၊ အံသေန အံသံ သမဃဋ္ဋယိမှ.

၂၀. တေ တတ္ထ ဌတွာန ဥဘော ဇနိန္ဒ၊ သာရာဏိယံ [သာရဏီယံ (က.)] ဝီတိသာရယိမှ [ဝီတိသာရိမှ (သီ. သျာ. ပီ.)] တတ္ထ၊

သာယေဝ နော သင်္ဂတိမတ္တမာသိ၊ တတော န ပစ္ဆာ န ပုရေ အဟောသိ.

၂၁. ယဒါ ကဒါစိ မနုဇေသု ဗြဟ္မေ၊ သမာဂမော သပ္ပုရိသေန ဟောတိ၊

န ပဏ္ဍိတာ သင်္ဂတိသန္ထဝါနိ၊ ပုဗ္ဗေ ကတံ ဝါပိ ဝိနာသယန္တိ.

၂၂. ဗာလာဝ [ဗာလာ စ (သီ. သျာ. ပီ.)] ခေါ သင်္ဂတိသန္ထဝါနိ၊ ပုဗ္ဗေ ကတံ ဝါပိ ဝိနာသယန္တိ၊

ဗဟုမ္ပိ ဗာလေသု ကတံ ဝိနဿတိ၊ တထာ ဟိ ဗာလာ အကတညုရူပါ.

၂၃. ဓီရာ စ ခေါ သင်္ဂတိသန္ထဝါနိ၊ ပုဗ္ဗေ ကတံ ဝါပိ န နာသယန္တိ၊

အပ္ပမ္ပိ ဓီရေသု ကတံ န နဿတိ၊ တထာ ဟိ ဓီရာ သုကတညုရူပါ.

၂၄. ဒဒါမိ တေ ဂါမဝရာနိ ပဉ္စ၊ ဒါသီသတံ သတ္တ ဂဝံသတာနိ၊

ပရောသဟဿဉ္စ သုဝဏ္ဏနိက္ခေ၊ ဘရိယာ စ တေ သာဒိသီ ဒွေ ဒဒါမိ.

၂၅. ဧဝံ သတံ ဟောတိ သမေစ္စ ရာဇ၊ နက္ခတ္တရာဇာရိဝ တာရကာနံ၊

အာပူရတီ ကာသိပတီ တထာဟံ၊ တယာပိ မေ သင်္ဂမော အဇ္ဇ လဒ္ဓေါတိ.

ဇုဏှဇာတကံ ဒုတိယံ.