၄၅၅. မာတုပေါသကဇာတကံ (၁)

၁. တဿ နာဂဿ ဝိပ္ပဝါသေန၊ ဝိရူဠှာ သလ္လကီ စ ကုဋဇာ စ၊

ကုရုဝိန္ဒကရဝီရာ [ကရဝရာ (သီ. သျာ.)] တိသသာမာ စ၊ နိဝါတေ ပုပ္ဖိတာ စ ကဏိကာရာ.

၂. ကောစိဒေဝ သုဝဏ္ဏကာယုရာ၊ နာဂရာဇံ ဘရန္တိ ပိဏ္ဍေန၊

ယတ္ထ ရာဇာ ရာဇကုမာရော ဝါ၊ ကဝစမဘိဟေဿတိ အဆမ္ဘိတော [အသမ္ဘီတော (သီ. သျာ. ပီ.)].

၃. ဂဏှာဟိ နာဂ ကဗဠံ၊ မာ နာဂ ကိသကော ဘဝ၊

ဗဟူနိ ရာဇကိစ္စာနိ၊ တာနိ [ယာနိ (သီ. ပီ.)] နာဂ ကရိဿသိ.

၄. သာ နူနသာ ကပဏိကာ၊ အန္ဓာ အပရိဏာယိကာ၊

ခါဏုံ ပါဒေန ဃဋ္ဋေတိ၊ ဂိရိံ စဏ္ဍောရဏံ ပတိ.

၅. ကာ နု တေ သာ မဟာနာဂ၊ အန္ဓာ အပရိဏာယိကာ၊

ခါဏုံ ပါဒေန ဃဋ္ဋေတိ၊ ဂိရိံ စဏ္ဍောရဏံ ပတိ.

၆. မာတာ မေ သာ မဟာရာဇ၊ အန္ဓာ အပရိဏာယိကာ၊

ခါဏုံ ပါဒေန ဃဋ္ဋေတိ၊ ဂိရိံ စဏ္ဍောရဏံ ပတိ.

၇. မုဉ္စထေတံ မဟာနာဂံ၊ ယောယံ ဘရတိ မာတရံ၊

သမေတု မာတရာ နာဂေါ၊ သဟ သဗ္ဗေဟိ ဉာတိဘိ.

၈. မုတ္တော စ ဗန္ဓနာ နာဂေါ၊ မုတ္တမာဒါယ ကုဉ္ဇရော [ကာသိရာဇေန ပေသိတော (သီ. သျာ.)၊ မုတ္တော ဒါမာတော ကုဉ္ဇရော (ပီ. သီ. နိယျ)]၊

မုဟုတ္တံ အဿာသယိတွာ [ဝိဿမိတွာန (သီ.)]၊ အဂမာ ယေန ပဗ္ဗတော.

၉. တတော သော နဠိနိံ [နိလိနံ (သျာ.)] ဂန္တွာ၊ သီတံ ကုဉ္ဇရသေဝိတံ၊

သောဏ္ဍာယူဒကမာဟတွာ [မာဟိတွာ (သျာ. က.)]၊ မာတရံ အဘိသိဉ္စထ.

၁၀. ကောယ အနရိယော ဒေဝေါ၊ အကာလေနပိ ဝဿတိ [အကာလေန ပဝဿတိ (သီ. သျာ.)၊ အကာလေန’တိဝဿတိ (ပီ.)]၊

ဂတော မေ အတြဇော ပုတ္တော၊ ယော မယှံ ပရိစာရကော.

၁၁. ဥဋ္ဌေဟိ အမ္မ ကိံ သေသိ၊ အာဂတော တျာဟမတြဇော၊

မုတ္တောမှိ ကာသိရာဇေန၊ ဝေဒေဟေန ယသဿိနာ.

၁၂. စိရံ ဇီဝတု သော ရာဇာ၊ ကာသီနံ ရဋ္ဌဝဍ္ဎနော၊

ယော မေ ပုတ္တံ ပမောစေသိ၊ သဒါ ဝုဒ္ဓါပစာယိကန္တိ.

မာတုပေါသကဇာတကံ ပဌမံ.