၉. အပါယိမှဝဂ္ဂေါ

၈၁. အပါယိမှ အနစ္စိမှ၊ အဂါယိမှ ရုဒိမှ စ၊

ဝိသညိကရဏိံ ပိတွာ [ပီတွာ (သီ. သျာ. ပီ.)]၊ ဒိဋ္ဌာ နာဟုမှ ဝါနရာတိ.

သုရာပါနဇာတကံ ပဌမံ.

၈၂. အတိက္ကမ္မ ရမဏကံ၊ သဒါမတ္တဉ္စ ဒူဘကံ၊

သွာသိ ပါသာဏမာသီနော၊ ယသ္မာ ဇီဝံ န မောက္ခသီတိ.

မိတ္တဝိန္ဒကဇာတကံ ဒုတိယံ.

၈၃. မိတ္တော ဟဝေ သတ္တပဒေန ဟောတိ၊ သဟာယော ပန ဒွါဒသကေန ဟောတိ၊

မာသဍ္ဎမာသေန စ ဉာတိ ဟောတိ၊ တတုတ္တရိံ အတ္တသမောပိ ဟောတိ၊

သောဟံ ကထံ အတ္တသုခဿ ဟေတု၊ စိရသန္ထုတံ [စိရသန္ဓဝံ (က.)၊ စိရသတ္ထုနံ (ပီ.)] ကာဠကဏ္ဏိံ ဇဟေယျန္တိ.

ကာလကဏ္ဏိဇာတကံ တတိယံ.

၈၄. အာရောဂျမိစ္ဆေ ပရမဉ္စ လာဘံ၊ သီလဉ္စ ဝုဒ္ဓါနုမတံ သုတဉ္စ၊

ဓမ္မာနုဝတ္တီ စ အလီနတာ စ၊ အတ္ထဿ ဒွါရာ ပမုခါ ဆဠေတေတိ.

အတ္ထဿဒွါရဇာတကံ စတုတ္ထံ.

၈၅. အာယတိံ ဒေါသံ နာညာယ၊ ယော ကာမေ ပဋိသေဝတိ၊

ဝိပါကန္တေ ဟနန္တိ နံ၊ ကိံပက္ကမိဝ ဘက္ခိတန္တိ.

ကိံပက္ကဇာတကံ ပဉ္စမံ.

၈၆. သီလံ ကိရေဝ ကလျာဏံ၊ သီလံ လောကေ အနုတ္တရံ၊

ပဿ ဃောရဝိသော နာဂေါ၊ သီလဝါတိ န ဟညတီတိ.

သီလဝီမံသကဇာတကံ ဆဋ္ဌံ.

၈၇. ယဿ မင်္ဂလာ သမူဟတာသေ [သမူဟတာ (သီ. သျာ. ပီ. သု. နိ. ၃၆၂]၊ ဥပ္ပါတာ [ဥပ္ပါဒါ (ပီ.)] သုပိနာ စ လက္ခဏာ စ၊

သော [သ (သီ. ပီ. က.)] မင်္ဂလဒေါသဝီတိဝတ္တော၊ ယုဂယောဂါဓိဂတော န ဇာတုမေတီတိ.

မင်္ဂလဇာတကံ သတ္တမံ.

၈၈. ကလျာဏိမေဝ မုဉ္စေယျ၊ န ဟိ မုဉ္စေယျ ပါပိကံ၊

မောက္ခော ကလျာဏိယာ သာဓု၊ မုတွာ တပ္ပတိ ပါပိကန္တိ.

သာရမ္ဘဇာတကံ အဋ္ဌမံ.

၈၉. ဝါစာဝ ကိရ တေ အာသိ၊ သဏှာ သခိလဘာဏိနော၊

တိဏမတ္တေ အသဇ္ဇိတ္ထော၊ နော စ နိက္ခသတံ ဟရန္တိ.

ကုဟကဇာတကံ နဝမံ.

၉၀. ယော ပုဗ္ဗေ ကတကလျာဏော၊ ကတတ္ထော နာဝဗုဇ္ဈတိ၊

ပစ္ဆာ ကိစ္စေ သမုပ္ပန္နေ၊ ကတ္တာရံ နာဓိဂစ္ဆတီတိ.

အကတညုဇာတကံ ဒသမံ.

အပါယိမှဝဂ္ဂေါ နဝမော.

တဿုဒ္ဒါနံ –

အပါယိမှ စ ဒူဘကံ သတ္တပဒံ၊ ဆဠဒွရ စ အာယတိနာ စ ပုန၊

အဟိသီလဝ မင်္ဂလိ ပါပိကဿာ၊ သတံနိက္ခ ကတတ္ထဝရေန ဒသာတိ.