၁၀. လိတ္တဝဂ္ဂေါ

၉၁. လိတ္တံ ပရမေန တေဇသာ၊ ဂိလမက္ခံ ပုရိသော န ဗုဇ္ဈတိ၊

ဂိလ ရေ ဂိလ ပါပဓုတ္တက၊ ပစ္ဆာ တေ ကဋုကံ ဘဝိဿတီတိ.

လိတ္တဇာတကံ ပဌမံ.

၉၂. ဥက္ကဋ္ဌေ သူရမိစ္ဆန္တိ၊ မန္တီသု အကုတူဟလံ၊

ပိယဉ္စ အန္နပါနမှိ၊ အတ္ထေ ဇာတေ စ ပဏ္ဍိတန္တိ.

မဟာသာရဇာတကံ ဒုတိယံ.

၉၃. န ဝိဿသေ အဝိဿတ္ထေ၊ ဝိဿတ္ထေပိ န ဝိဿသေ၊

ဝိဿာသာ ဘယမနွေတိ၊ သီဟံဝ မိဂမာတုကာတိ [မိဂမာတုယာ (က.)].

ဝိသာသဘောဇနဇာတကံ တတိယံ.

၉၄. သောတတ္တော သောသိန္ဒော [သောသီတော (သီ. သျာ. ပီ.)၊ သောသိနော (က.)] စေဝ၊ ဧကော ဘိံသနကေ ဝနေ၊

နဂ္ဂေါ န စဂ္ဂိမာသီနော၊ ဧသနာပသုတော မုနီတိ.

လောမဟံသဇာတကံ စတုတ္ထံ.

၉၅. အနိစ္စာ ဝတ သင်္ခါရာ၊ ဥပ္ပါဒဝယဓမ္မိနော၊

ဥပ္ပဇ္ဇိတွာ နိရုဇ္ဈန္တိ၊ တေသံ ဝူပသမော သုခေါတိ.

မဟာသုဒဿနဇာတကံ ပဉ္စမံ.

၉၆. သမတိတ္တိကံ အနဝသေကံ၊ တေလပတ္တံ ယထာ ပရိဟရေယျ၊

ဧဝံ သစိတ္တမနုရက္ခေ၊ ပတ္ထယာနော ဒိသံ အဂတပုဗ္ဗန္တိ.

တေလပတ္တဇာတကံ ဆဋ္ဌံ.

၉၇. ဇီဝကဉ္စ မတံ ဒိသွာ၊ ဓနပါလိဉ္စ ဒုဂ္ဂတံ၊

ပန္ထကဉ္စ ဝနေ မူဠှံ၊ ပါပကော ပုနရာဂတောတိ.

နာမသိဒ္ဓိဇာတကံ သတ္တမံ.

၉၈. သာဓု ခေါ ပဏ္ဍိတော နာမ၊ န တွေဝ အတိပဏ္ဍိတော၊

အတိပဏ္ဍိတေန ပုတ္တေန၊ မနမှိ ဥပကူဠိတောတိ [ဥပကူလိတောတိ (သီ.)၊ ဥပကုဋ္ဌိတောတိ (သျာ.)၊ ဥပကုဋိတော (က.)].

ကူဋဝါဏိဇဇာတကံ အဋ္ဌမံ.

၉၉. ပရောသဟဿမ္ပိ သမာဂတာနံ၊ ကန္ဒေယျုံ တေ ဝဿသတံ အပညာ၊

ဧကောဝ သေယျော ပုရိသော သပညော၊ ယော ဘာသိတဿ ဝိဇာနာတိ အတ္ထန္တိ.

ပရောသဟဿဇာတကံ နဝမံ.

၁၀၀. အသာတံ သာတရူပေန၊ ပိယရူပေန အပ္ပိယံ၊

ဒုက္ခံ သုခဿ ရူပေန၊ ပမတ္တမတိဝတ္တတီတိ.

အသာတရူပဇာတကံ ဒသမံ.

လိတ္တဝဂ္ဂေါ ဒသမော.

တဿုဒ္ဒါနံ –

ဂိလမက္ခကုတူဟလ မာတုကဿာ၊ မုနိနာ စ အနိစ္စတ ပတ္တဝရံ၊

ဓနပါလိဝရော အတိပဏ္ဍိတကော၊ သပရောသဟဿအသာတဒသာတိ.

မဇ္ဈိမော ပဏ္ဏာသကော.