၁၁. ပရောသတဝဂ္ဂေါ

၁၀၁. ပရောသတံ စေပိ သမာဂတာနံ၊ ဈာယေယျုံ တေ ဝဿသတံ အပညာ၊

ဧကောဝ သေယျော ပုရိသော သပညော၊ ယော ဘာသိတဿ ဝိဇာနာတိ အတ္ထန္တိ.

ပရောသတဇာတကံ ပဌမံ.

၁၀၂. ယော ဒုက္ခဖုဋ္ဌာယ ဘဝေယျ တာဏံ၊ သော မေ ပိတာ ဒုဗ္ဘိ [ဒူဘိ (သီ. ပီ.)] ဝနေ ကရောတိ၊

သာ ကဿ ကန္ဒာမိ ဝနဿ မဇ္ဈေ၊ ယော တာယိတာ သော သဟသံ [သဟသာ (သီ. သျာ. ပီ.)] ကရောတီတိ.

ပဏ္ဏိကဇာတကံ ဒုတိယံ.

၁၀၃. ယတ္ထ ဝေရီ နိဝိသတိ [နိဝသတိ (သီ. က.)]၊ န ဝသေ တတ္ထ ပဏ္ဍိတော၊

ဧကရတ္တံ ဒိရတ္တံ ဝါ၊ ဒုက္ခံ ဝသတိ ဝေရိသူတိ.

ဝေရိဇာတကံ တတိယံ.

၁၀၄. စတုဗ္ဘိ အဋ္ဌဇ္ဈဂမာ၊ အဋ္ဌာဟိပိ စ သောဠသ၊

သောဠသာဟိ စ ဗာတ္တိံသ [ဗတ္တိံသ (သီ. သျာ. ပီ.)]၊ အတြိစ္ဆံ စက္ကမာသဒေါ၊

ဣစ္ဆာဟတဿ ပေါသဿ၊ စက္ကံ ဘမတိ မတ္ထကေတိ.

မိတ္တဝိန္ဒကဇာတကံ စတုတ္ထံ.

၁၀၅. ဗဟုမ္ပေတံ ဝနေ ကဋ္ဌံ၊ ဝါတော ဘဉ္ဇတိ ဒုဗ္ဗလံ၊

တဿ စေ ဘာယသီ နာဂ၊ ကိသော နူန ဘဝိဿသီတိ.

ဒုဗ္ဗလကဋ္ဌဇာတကံ ပဉ္စမံ.

၁၀၆. သုခံ ဝတ မံ ဇီဝန္တံ [သုခကံ ဝတ ဇီဝံ (က.)]၊ ပစမာနာ ဥဒဉ္စနီ၊

စောရီ ဇာယပ္ပဝါဒေန၊ တေလံ လောဏဉ္စ ယာစတီတိ.

ဥဒဉ္စနီဇာတကံ ဆဋ္ဌံ.

၁၀၇. သာဓု ခေါ သိပ္ပကံ နာမ၊ အပိ ယာဒိသ ကီဒိသံ၊

ပဿ ခဉ္ဇပ္ပဟာရေန၊ လဒ္ဓါ ဂါမာ စတုဒ္ဒိသာတိ.

သာလိတ္တကဇာတကံ သတ္တမံ.

၁၀၈. သိက္ခေယျ သိက္ခိတဗ္ဗာနိ၊ သန္တိ တစ္ဆန္ဒိနော [သစ္ဆန္ဒိနော (သီ. ပီ.)] ဇနာ၊

ဗာဟိယာ ဟိ [ပိ (သီ. သျာ. ပီ.)] သုဟန္နေန၊ ရာဇာနမဘိရာဓယီတိ.

ဗာဟိယဇာတကံ အဋ္ဌမံ.

၁၀၉. ယထန္နော ပုရိသော ဟောတိ၊ တထန္နာ တဿ ဒေဝတာ၊

အာဟရေတံ ကုဏ္ဍပူဝံ [ကဏံ ပူဝံ (သီ. ပီ.)]၊ မာ မေ ဘာဂံ ဝိနာသယာတိ.

ကုဏ္ဍပူဝဇာတကံ နဝမံ.

၁၁၀. သဗ္ဗသံဟာရကော [သဗ္ဗသာဟာရကော (က.)] နတ္ထိ၊ သုဒ္ဓံ ကင်္ဂု ပဝါယတိ၊

အလိကံ ဘာယတိယံ ဓုတ္တီ၊ သစ္စမာဟ မဟလ္လိကာတိ.

သဗ္ဗသံဟာရကပဉှဇာတကံ ဒသမံ.

ပရောသတဝဂ္ဂေါ ဧကာဒသမော.

တဿုဒ္ဒါနံ –

သပရောသတ တာယိတ ဝေရီ ပုန၊ ဘမစက္ကထ နာဂသိရိဝှယနော၊

သုခကဉ္စ ဝတ သိပ္ပက ဗာဟိယာ၊ ကုဏ္ဍပူဝ မဟလ္လိကကာ စ ဒသာတိ.