၁၂. ဟံစိဝဂ္ဂေါ

၁၁၁. ဟံစိ [ဟံသိ (သီ. သျာ.)၊ ဟဉ္စိ (?)] တုဝံ ဧဝမညသိ သေယျော၊ ပုတ္တေန ပိတာတိ ရာဇသေဋ္ဌ၊

ဟန္ဒဿတရဿ တေ အယံ၊ အဿတရဿ ဟိ ဂဒြဘော ပိတာတိ.

ဂဒြဘပဉှဇာတကံ ပဌမံ.

၁၁၂. ယေန သတ္တုဗိလင်္ဂါ စ၊ ဒိဂုဏပလာသော စ ပုပ္ဖိတော၊

ယေန ဒဒါမိ [ယေနာ’ဒါမိ (သီ. သျာ.)] တေန ဝဒါမိ၊ ယေန န ဒဒါမိ [ယေန နာ’ဒါမိ (သီ. သျာ.)] န တေန ဝဒါမိ၊

ဧသ မဂ္ဂေါ ယဝမဇ္ဈကဿ၊ ဧတံ ဆန္နပထံ ဝိဇာနာဟီတိ.

အမရာဒေဝီပဉှဇာတကံ ဒုတိယံ.

၁၁၃. သဒ္ဒဟာသိ သိင်္ဂါလဿ [သိဂါလဿ (သီ. သျာ. ပီ.)]၊ သုရာပီတဿ ဗြာဟ္မဏ၊

သိပ္ပိကာနံ သတံ နတ္ထိ၊ ကုတော ကံသသတာ ဒုဝေတိ.

သိင်္ဂါလဇာတကံ တတိယံ.

၁၁၄. ဗဟုစိန္တီ အပ္ပစိန္တီ၊ ဥဘော ဇာလေ အဗဇ္ဈရေ၊

မိတစိန္တီ ပမောစေသီ၊ ဥဘော တတ္ထ သမာဂတာတိ.

မိတစိန္တိဇာတကံ စတုတ္ထံ.

၁၁၅. ယာယည [ယာယညေ (က.)] မနုသာသတိ၊ သယံ လောလုပ္ပစာရိနီ၊

သာယံ ဝိပက္ခိကာ သေတိ၊ ဟတာ စက္ကေန သာသိကာတိ [သာလိကာတိ (သီ. သျာ. ပီ.)].

အနုသာသိကဇာတကံ ပဉ္စမံ.

၁၁၆. အတိကရမကရာစရိယ၊ မယှမ္ပေတံ န ရုစ္စတိ၊

စတုတ္ထေ လင်္ဃယိတွာန၊ ပဉ္စမာယသိ အာဝုတောတိ.

ဒုဗ္ဗစဇာတကံ ဆဋ္ဌံ.

၁၁၇. အစ္စုဂ္ဂတာတိလပတာ [အတိဗလတာ (သီ. သျာ. ပီ.)၊ အတိလပကာ (ကတ္ထစိ)]၊ အတိဝေလံ ပဘာသိတာ၊

ဝါစာ ဟနတိ ဒုမ္မေဓံ၊ တိတ္တိရံဝါတိဝဿိတန္တိ.

တိတ္တိရဇာတကံ သတ္တမံ.

၁၁၈. နာစိန္တယန္တော ပုရိသော၊ ဝိသေသမဓိဂစ္ဆတိ၊

စိန္တိတဿ ဖလံ ပဿ၊ မုတ္တောသ္မိ ဝဓဗန္ဓနာတိ.

ဝဋ္ဋကဇာတကံ အဋ္ဌမံ.

၁၁၉. အမာတာပိတရသံဝဒ္ဓေါ [ပိတရိ (သီ. ပီ.)၊ ပိတု (သျာ.)]၊ အနာစေရကုလေ ဝသံ၊

နာယံ ကာလံ အကာလံ ဝါ၊ အဘိဇာနာတိ ကုက္ကုဋောတိ.

အကာလရာဝိဇာတကံ နဝမံ.

၁၂၀. အဗဒ္ဓါ တတ္ထ ဗဇ္ဈန္တိ၊ ယတ္ထ ဗာလာ ပဘာသရေ၊

ဗဒ္ဓါပိ တတ္ထ မုစ္စန္တိ၊ ယတ္ထ ဓီရာ ပဘာသရေတိ.

ဗန္ဓနမောက္ခဇာတကံ ဒသမံ.

ဟံစိဝဂ္ဂေါ [ဟံသိဝဂ္ဂေါ (သီ. သျာ.)] ဒွါဒသမော.

တဿုဒ္ဒါနံ –

အထ ဂဒြဘ သတ္တုဝ ကံသသတံ၊ ဗဟုစိန္တိ သာသိကာယာတိကရ၊

အတိဝေလ ဝိသေသမနာစရိယောဝ၊ ဓီရာပဘာသရတေန ဒသာတိ.