၁၃. ကုသနာဠိဝဂ္ဂေါ

၁၂၁. ကရေ သရိက္ခော အထ ဝါပိ သေဋ္ဌော၊ နိဟီနကော ဝါပိ ကရေယျ ဧကော၊

ကရေယျုမေတေ [ကရေယျုံ တေ (သီ. ပီ.)] ဗျသနေ ဥတ္တမတ္ထံ၊ ယထာ အဟံ ကုသနာဠိ ရုစာယန္တိ.

ကုသနာဠိဇာတကံ ပဌမံ.

၁၂၂. ယသံ လဒ္ဓါန ဒုမ္မေဓော၊ အနတ္ထံ စရတိ အတ္တနော၊

အတ္တနော စ ပရေသဉ္စ၊ ဟိံသာယ ပဋိပဇ္ဇတီတိ.

ဒုမ္မေဓဇာတကံ ဒုတိယံ.

၁၂၃. အသဗ္ဗတ္ထဂါမိံ ဝါစံ၊ ဗာလော သဗ္ဗတ္ထ ဘာသတိ၊

နာယံ ဒဓိံ ဝေဒိ န [န ဝေဒိ (က.)] နင်္ဂလီသံ၊ ဒဓိပ္ပယံ [ဒဓိမ္ပယံ (သီ. ပီ.)] မညတိ နင်္ဂလီသန္တိ.

နင်္ဂလီသဇာတကံ တတိယံ.

၁၂၄. ဝါယမေထေဝ ပုရိသော၊ န နိဗ္ဗိန္ဒေယျ ပဏ္ဍိတော၊

ဝါယာမဿ ဖလံ ပဿ၊ ဘုတ္တာ အမ္ဗာ အနီတိဟန္တိ.

အမ္ဗဇာတကံ စတုတ္ထံ.

၁၂၅. ဗဟုမ္ပိ သော ဝိကတ္ထေယျ၊ အညံ ဇနပဒံ ဂတော၊

အနွာဂန္တွာန ဒူသေယျ၊ ဘုဉ္ဇ ဘောဂေ ကဋာဟကာတိ.

ကဋာဟကဇာတကံ ပဉ္စမံ.

၁၂၆. တဒေဝေကဿ [တထေဝေကဿ (သီ. သျာ. ပီ. အဋ္ဌ. မူလပါဌော)] ကလျာဏံ၊ တဒေဝေကဿ ပါပကံ၊

တသ္မာ သဗ္ဗံ န ကလျာဏံ၊ သဗ္ဗံ ဝါပိ န ပါပကန္တိ.

အသိလက္ခဏဇာတကံ ဆဋ္ဌံ.

၁၂၇. တေ ဒေသာ တာနိ ဝတ္ထူနိ၊ အဟဉ္စ ဝနဂေါစရော၊

အနုဝိစ္စ ခေါ တံ ဂဏှေယျုံ၊ ပိဝ [ပိပ (သီ. ပီ.)] ခီရံ ကလဏ္ဍုကာတိ.

ကလဏ္ဍုကဇာတကံ သတ္တမံ.

၁၂၈. ယော ဝေ ဓမ္မံ ဓဇံ [ဓမ္မဓဇံ (သျာ. ပီ. က.)] ကတွာ၊ နိဂူဠှော ပါပမာစရေ၊

ဝိဿာသယိတွာ ဘူတာနိ၊ ဗိဠာရံ နာမ တံ ဝတန္တိ.

ဗိဠာရဝတဇာတကံ အဋ္ဌမံ.

၁၂၉. နာယံ သိခါ ပုညဟေတု၊ ဃာသဟေတု အယံ သိခါ၊

နာင်္ဂုဋ္ဌဂဏနံ ယာတိ၊ အလံ တေ ဟောတု အဂ္ဂိကာတိ.

အဂ္ဂိကဘာရဒွါဇဇာတကံ နဝမံ.

၁၃၀. ယထာ ဝါစာ စ ဘုဉ္ဇဿု၊ ယထာ ဘုတ္တဉ္စ ဗျာဟရ၊

ဥဘယံ တေ န သမေတိ၊ ဝါစာ ဘုတ္တဉ္စ ကောသိယေတိ.

ကောသိယဇာတကံ ဒသမံ.

ကုသနာဠိဝဂ္ဂေါ [သရိက္ခဝဂ္ဂေါ (က.)] တေရသမော.

တဿုဒ္ဒါနံ –

ကုသနာဠိသိရိဝှယနော စ ယသံ၊ ဒဓိ မမ္ဗ ကဋာဟကပဉ္စမကော၊

အထ ပါပက ခီရ ဗိဠာရဝတံ၊ သိခိ ကောသိယသဝှယနေန ဒသာတိ.