၁၄. အသမ္ပဒါနဝဂ္ဂေါ

၁၃၁. အသမ္ပဒါနေနိတရီတရဿ၊ ဗာလဿ မိတ္တာနိ ကလီ ဘဝန္တိ၊

တသ္မာ ဟရာမိ ဘုသံ အဍ္ဎမာနံ၊ မာ မေ မိတ္တိ ဇီယိတ္ထ သဿတာယန္တိ.

အသမ္ပဒါနဇာတကံ ပဌမံ.

၁၃၂. ကုသလူပဒေသေ ဓိတိယာ ဒဠှာယ စ၊ အနိဝတ္တိတတ္တာဘယဘီရုတာယ [အဝတ္ထိတတ္တာဘယဘီရုတာယ (သီ. သျာ. ပီ.)] စ၊

န ရက္ခသီနံ ဝသမာဂမိမှသေ၊ သ သောတ္ထိဘာဝေါ မဟတာ ဘယေန မေတိ.

ဘီရုက [ပဉ္စဂရုက (သီ. ပီ.)၊ ပဉ္စဘီရုက (သျာ.)၊ အဘယဘီရုတ§(?)] ဇာတကံ ဒုတိယံ.

၁၃၃. ခေမံ ယဟိံ တတ္ထ အရီ ဥဒီရိတော [အရိ ဥဒ္ဓရိတော (က.)]၊ ဒကဿ မဇ္ဈေ ဇလတေ ဃတာသနော၊

န အဇ္ဇ ဝါသော မဟိယာ မဟီရုဟေ၊ ဒိသာ ဘဇဝှေါ သရဏာဇ္ဇ နော ဘယန္တိ.

ဃတာသနဇာတကံ တတိယံ.

၁၃၄. ယေ သညိနော တေပိ ဒုဂ္ဂတာ၊ ယေပိ အသညိနော တေပိ ဒုဂ္ဂတာ၊

ဧတံ ဥဘယံ ဝိဝဇ္ဇယ၊ တံ သမာပတ္တိသုခံ အနင်္ဂဏန္တိ.

ဈာနသောဓနဇာတကံ စတုတ္ထံ.

၁၃၅. စန္ဒာဘံ သူရိယာဘဉ္စ၊ ယောဓ ပညာယ ဂါဓတိ.

အဝိတက္ကေန ဈာနေန၊ ဟောတိ အာဘဿရူပဂေါတိ.

စန္ဒာဘဇာတကံ ပဉ္စမံ.

၁၃၆. ယံ လဒ္ဓံ တေန တုဋ္ဌဗ္ဗံ၊ အတိလောဘော ဟိ ပါပကော၊

ဟံသရာဇံ ဂဟေတွာန၊ သုဝဏ္ဏာ ပရိဟာယထာတိ.

သုဝဏ္ဏဟံသဇာတကံ ဆဋ္ဌံ.

၁၃၇. ယတ္ထေကော လဘတေ ဗဗ္ဗု၊ ဒုတိယော တတ္ထ ဇာယတိ၊

တတိယော စ စတုတ္ထော စ၊ ဣဒံ တေ ဗဗ္ဗုကာ ဗိလန္တိ.

ဗဗ္ဗုဇာတကံ သတ္တမံ.

၁၃၈. ကိံ တေ ဇဋာဟိ ဒုမ္မေဓ၊ ကိံ တေ အဇိနသာဋိယာ၊

အဗ္ဘန္တရံ တေ ဂဟနံ၊ ဗာဟိရံ ပရိမဇ္ဇသီတိ.

ဂေါဓဇာတကံ အဋ္ဌမံ.

၁၃၉. အက္ခီ ဘိန္နာ ပဋော နဋ္ဌော၊ သခိဂေဟေ စ ဘဏ္ဍနံ၊

ဥဘတော ပဒုဋ္ဌာ ကမ္မန္တာ [ပဒုဋ္ဌကမ္မန္တော (သီ.)၊ ပဒုဋ္ဌော ကမ္မန္တော (ပီ.)]၊ ဥဒကမှိ ထလမှိ စာတိ.

ဥဘတောဘဋ္ဌဇာတကံ နဝမံ.

၁၄၀. နိစ္စံ ဥဗ္ဗိဂ္ဂဟဒယာ၊ သဗ္ဗလောကဝိဟေသကာ၊

တသ္မာ နေသံ ဝသာ နတ္ထိ၊ ကာကာနမှာက [ကာကာနသ္မာက (သီ. သျာ. ပီ.)] ဉာတိနန္တိ.

ကာကဇာတကံ ဒသမံ.

အသမ္ပဒါနဝဂ္ဂေါ စုဒ္ဒသမော.

တဿုဒ္ဒါနံ –

ဣတရီတရ ရက္ခသိ ခေမိယော စ၊ ပရောသတပဉှေန အာဘဿရော ပုန၊

အထ ဟံသဝရုတ္တမဗဗ္ဗုဇဋံ၊ ပဋနဋ္ဌက ကာကဝရေန ဒသာတိ.