၈. ဝရုဏဝဂ္ဂေါ

၇၁. ယော ပုဗ္ဗေ ကရဏီယာနိ၊ ပစ္ဆာ သော ကာတုမိစ္ဆတိ၊

ဝရုဏကဋ္ဌ [ဝရဏကဋ္ဌ (သီ. ပီ.)] ဘဉ္ဇောဝ၊ သ ပစ္ဆာ မနုတပ္ပတီတိ.

ဝရုဏဇာတကံ ပဌမံ.

၇၂. အကတညုဿ ပေါသဿ၊ နိစ္စံ ဝိဝရဒဿိနော၊

သဗ္ဗံ စေ ပထဝိံ [ပဌဝိံ (သီ. သျာ. ပီ.)] ဒဇ္ဇာ၊ နေဝ နံ အဘိရာဓယေတိ.

သီလဝဟတ္ထိဇာတကံ ဒုတိယံ.

၇၃. သစ္စံ ကိရေဝမာဟံသု၊ နရာ ဧကစ္စိယာ ဣဓ၊

ကဋ္ဌံ နိပ္လဝိတံ [ဝိပ္လာဝိတံ (သီ. ပီ.)] သေယျော၊ န တွေဝေကစ္စိယော နရောတိ.

သစ္စံကိရဇာတကံ တတိယံ.

၇၄. သာဓူ သမ္ဗဟုလာ ဉာတီ၊ အပိ ရုက္ခာ အရညဇာ၊

ဝါတော ဝဟတိ ဧကဋ္ဌံ၊ ဗြဟန္တမ္ပိ ဝနပ္ပတိန္တိ.

ရုက္ခဓမ္မဇာတကံ စတုတ္ထံ.

၇၅. အဘိတ္ထနယ ပဇ္ဇုန္န၊ နိဓိံ ကာကဿ နာသယ၊

ကာကံ သောကာယ ရန္ဓေဟိ၊ မဉ္စ သောကာ ပမောစယာတိ.

မစ္ဆဇာတကံ ပဉ္စမံ.

၇၆. အသင်္ကိယောမှိ ဂါမမှိ၊ အရညေ နတ္ထိ မေ ဘယံ၊

ဥဇုံ မဂ္ဂံ သမာရူဠှော၊ မေတ္တာယ ကရုဏာယ စာတိ.

အသင်္ကိယဇာတကံ ဆဋ္ဌံ.

၇၇. ဥသဘာ ရုက္ခာ ဂါဝိယော ဂဝါ စ၊ အဿော ကံသော သိင်္ဂါလီ [သိဂါသီ (သီ. သျာ. ပီ.)] စ ကုမ္ဘော၊

ပေါက္ခရဏီ စ အပါကစန္ဒနံ၊ လာဗူနိ သီဒန္တိ သိလာ ပ္လဝန္တိ.

မဏ္ဍူကိယော ကဏှသပ္ပေ ဂိလန္တိ၊ ကာကံ သုပဏ္ဏာ ပရိဝါရယန္တိ၊

တသာ ဝကာ ဧဠကာနံ ဘယာဟိ၊ ဝိပရိယာသော [ဝိပရိယာယော (သျာ. က.)] ဝတ္တတိ နယိဓ မတ္ထီတိ.

မဟာသုပိနဇာတကံ သတ္တမံ.

၇၈. ဥဘော ခဉ္ဇာ ဥဘော ကုဏီ၊ ဥဘော ဝိသမစက္ခုကာ [စက္ခုလာ (သီ. ပီ.)]၊

ဥဘိန္နံ ပိဠကာ [ပီဠကာ (သျာ.)] ဇာတာ၊ နာဟံ ပဿာမိ ဣလ္လိသန္တိ.

ဣလ္လိသဇာတကံ အဋ္ဌမံ.

၇၉. ယတော ဝိလုတ္တာ စ ဟတာ စ ဂါဝေါ၊ ဒဍ္ဎာနိ ဂေဟာနိ ဇနော စ နီတော၊

အထာဂမာ ပုတ္တဟတာယ ပုတ္တော၊ ခရဿရံ ဍိဏ္ဍိမံ [ဒေဏ္ဍိမံ (သီ. သျာ. ပီ.)၊ ဍိန္ဒိမံ (က.)] ဝါဒယန္တောတိ.

ခရဿရဇာတကံ နဝမံ.

၈၀. ယံ တေ ပဝိကတ္ထိတံ ပုရေ၊ အထ တေ ပူတိသရာ သဇန္တိ ပစ္ဆာ၊

ဥဘယံ န သမေတိ ဘီမသေန၊ ယုဒ္ဓကထာ စ ဣဒဉ္စ တေ ဝိဟညန္တိ.

ဘီမသေနဇာတကံ ဒသမံ.

ဝရုဏဝဂ္ဂေါ [ဝရဏဝဂ္ဂေါ (သီ. ပီ.)] အဋ္ဌမော.

တဿုဒ္ဒါနံ –

ဝရုဏာ အကတညူဝရေ တု သစ္စဝရံ၊ သဝနပ္ပတိနာ စ အဘိတ္ထနယ၊

ကရုဏာယ သိလာပ္လဝ ဣလ္လိသတော၊ ပုန ဍိဏ္ဍိမပူတိသရေန ဒသာတိ.