၇. ဣတ္ထိဝဂ္ဂေါ

၆၁. အသာ လောကိတ္ထိယော နာမ၊ ဝေလာ တာသံ န ဝိဇ္ဇတိ၊

သာရတ္တာ စ ပဂဗ္ဘာ စ၊ သိခီ သဗ္ဗဃသော ယထာ၊

တာ ဟိတွာ ပဗ္ဗဇိဿာမိ၊ ဝိဝေကမနုဗြူဟယန္တိ.

အသာတမန္တဇာတကံ ပဌမံ.

၆၂. ယံ ဗြာဟ္မဏော အဝါဒေသိ၊ ဝီဏံ သမုခဝေဌိတော၊

အဏ္ဍဘူတာ ဘတာ ဘရိယာ၊ တာသု ကော ဇာတု ဝိဿသေတိ.

အဏ္ဍဘူတဇာတကံ ဒုတိယံ.

၆၃. ကောဓနာ အကတညူ စ၊ ပိသုဏာ မိတ္တဘေဒိကာ [ပိသုဏာ စ ဝိဘေဒိကာ (သီ. သျာ. ပီ.)]၊

ဗြဟ္မစရိယံ စရ ဘိက္ခု၊ သော သုခံ န ဝိဟာဟသီတိ [ပိဟာဟိသီတိ (သီ. သျာ. ပီ.)၊ ဝိဟာယသိ (က.)].

တက္ကပဏ္ဍိတဇာတကံ [တက္ကဇာတကံ (သီ. သျာ. ပီ. အဋ္ဌ.)] တတိယံ.

၆၄. မာ သု နန္ဒိ ဣစ္ဆတိ မံ၊ မာ သု သောစိ န မိစ္ဆတိ [န ဣစ္ဆတိ (သီ. သျာ. ပီ.)]၊

ထီနံ ဘာဝေါ ဒုရာဇာနော၊ မစ္ဆဿေဝေါဒကေ ဂတန္တိ.

ဒုရာဇာနဇာတကံ စတုတ္ထံ.

၆၅. ယထာ နဒီ စ ပန္ထော စ၊ ပါနာဂါရံ သဘာ ပပါ၊

ဧဝံ လောကိတ္ထိယော နာမ၊ နာသံ ကုဇ္ဈန္တိ ပဏ္ဍိတာတိ.

အနဘိရတိဇာတကံ ပဉ္စမံ.

၆၆. ဧကာ ဣစ္ဆာ ပုရေ အာသိ၊ အလဒ္ဓါ မုဒုလက္ခဏံ၊

ယတော လဒ္ဓါ အဠာရက္ခီ၊ ဣစ္ဆာ ဣစ္ဆံ ဝိဇာယထာတိ.

မုဒုလက္ခဏဇာတကံ ဆဋ္ဌံ.

၆၇. ဥစ္ဆင်္ဂေ ဒေဝ မေ ပုတ္တော၊ ပထေ ဓာဝန္တိယာ ပတိ၊

တဉ္စ ဒေသံ န ပဿာမိ၊ ယတော သောဒရိယမာနယေတိ [သောဒရိယံ နယေ (က.)].

ဥစ္ဆင်္ဂဇာတကံ သတ္တမံ.

၆၈. ယသ္မိံ မနော နိဝိသတိ၊ စိတ္တဉ္စာပိ [စိတ္တံ ဝါပိ (ကတ္ထစိ)] ပသီဒတိ၊

အဒိဋ္ဌပုဗ္ဗကေ ပေါသေ၊ ကာမံ တသ္မိမ္ပိ ဝိဿသေတိ.

သာကေတဇာတကံ အဋ္ဌမံ.

၆၉. ဓိရတ္ထု တံ ဝိသံ ဝန္တံ၊ ယမဟံ ဇီဝိတကာရဏာ၊

ဝန္တံ ပစ္စာဝမိဿာမိ [ပစ္စာဟရိဿာမိ (က.)]၊ မတံ မေ ဇီဝိတာ ဝရန္တိ.

ဝိသဝန္တဇာတကံ နဝမံ.

၇၀. န တံ ဇိတံ သာဓု ဇိတံ၊ ယံ ဇိတံ အဝဇီယတိ၊

တံ ခေါ ဇိတံ သာဓု ဇိတံ၊ ယံ ဇိတံ နာဝဇီယတီတိ.

ကုဒ္ဒါလဇာတကံ ဒသမံ.

ဣတ္ထိဝဂ္ဂေါ သတ္တမော.

တဿုဒ္ဒါနံ –

သိခီသဗ္ဗဃသောပိ စ ဝီဏဝရော၊ ပိသုဏာ မိတ္တဘေဒိကာ နန္ဒီ နဒီ၊

မုဒုလက္ခဏ သောဒရိယာ စ မနော၊ ဝိသ သာဓုဇိတေန ဘဝန္တိ ဒသာတိ.