၆. အာသီသဝဂ္ဂေါ

၅၁. အာသီသေထေဝ [အာသိံသေထေဝ (သီ. သျာ. ပီ.)] ပုရိသော၊ န နိဗ္ဗိန္ဒေယျ ပဏ္ဍိတော၊

ပဿာမိ ဝေါဟံ အတ္တာနံ၊ ယထာ ဣစ္ဆိံ တထာ အဟူတိ.

မဟာသီလဝဇာတကံ ပဌမံ.

၅၂. ဝါယမေထေဝ ပုရိသော၊ န နိဗ္ဗိန္ဒေယျ ပဏ္ဍိတော၊

ပဿာမိ ဝေါဟံ အတ္တာနံ၊ ဥဒကာ ထလမုဗ္ဘတန္တိ.

စူဠဇနကဇာတကံ ဒုတိယံ.

၅၃. တထေဝ ပုဏ္ဏာ ပါတိယော၊ အညာယံ ဝတ္တတေ ကထာ၊

အာကာရဏေန [အာကာရကေန (သီ. သျာ. ပီ.)] ဇာနာမိ၊ န စာယံ ဘဒ္ဒိကာ သုရာတိ.

ပုဏ္ဏပါတိဇာတကံ တတိယံ.

၅၄. နာယံ ရုက္ခော ဒုရာရုဟော၊ နပိ ဂါမတော အာရကာ၊

အာကာရဏေန ဇာနာမိ၊ နာယံ သာဒုဖလော ဒုမောတိ.

ကိံဖလဇာတကံ စတုတ္ထံ.

၅၅. ယော အလီနေန စိတ္တေန၊ အလီနမနသော နရော၊

ဘာဝေတိ ကုသလံ ဓမ္မံ၊ ယောဂက္ခေမဿ ပတ္တိယာ၊

ပါပုဏေ အနုပုဗ္ဗေန၊ သဗ္ဗသံယောဇနက္ခယန္တိ.

ပဉ္စာဝုဓဇာတကံ ပဉ္စမံ.

၅၆. ယော ပဟဋ္ဌေန စိတ္တေန၊ ပဟဋ္ဌမနသော နရော၊

ဘာဝေတိ ကုသလံ ဓမ္မံ၊ ယောဂက္ခေမဿ ပတ္တိယာ၊

ပါပုဏေ အနုပုဗ္ဗေန၊ သဗ္ဗသံယောဇနက္ခယန္တိ.

ကဉ္စနက္ခန္ဓဇာတကံ ဆဋ္ဌံ.

၅၇. ယဿေတေ စတုရော ဓမ္မာ၊ ဝါနရိန္ဒ ယထာ တဝ၊

သစ္စံ ဓမ္မော ဓိတိ [ဓိတီ (သီ. ပီ.)] စာဂေါ၊ ဒိဋ္ဌံ သော အတိဝတ္တတီတိ.

ဝါနရိန္ဒဇာတကံ သတ္တမံ.

၅၈. ယဿေတေ စ [ယဿ ဧတေ (သီ. ပီ.)] တယော ဓမ္မာ၊ ဝါနရိန္ဒ ယထာ တဝ၊

ဒက္ခိယံ သူရိယံ ပညာ၊ ဒိဋ္ဌံ သော အတိဝတ္တတီတိ.

တယောဓမ္မဇာတကံ အဋ္ဌမံ.

၅၉. ဓမေ ဓမေ နာတိဓမေ၊ အတိဓန္တဉှိ ပါပကံ၊

ဓန္တေန ဟိ သတံ လဒ္ဓံ၊ အတိဓန္တေန နာသိတန္တိ.

ဘေရိဝါဒကဇာတကံ နဝမံ.

၆၀. ဓမေ ဓမေ နာတိဓမေ၊ အတိဓန္တဉှိ ပါပကံ၊

ဓန္တေနာဓိဂတာ ဘောဂါ၊ တေ တာတော ဝိဓမီ ဓမန္တိ.

သင်္ခဓမဇာတကံ ဒသမံ.

အာသီသဝဂ္ဂေါ ဆဋ္ဌော.

တဿုဒ္ဒါနံ –

ယထာ ဣစ္ဆိံ တထာဟုဒကာ ထလာ၊ သုရ သာဒုဖလော စ အလီနမနော၊

သမ္ပဟဋ္ဌမနော စတုရော စ တယော၊ သတလဒ္ဓက ဘောဂဓနေန ဒသာတိ.