၅. အတ္ထကာမဝဂ္ဂေါ

၄၁. ယော အတ္ထကာမဿ ဟိတာနုကမ္ပိနော၊ ဩဝဇ္ဇမာနော န ကရောတိ သာသနံ၊

အဇိယာ ပါဒမောလမ္ဗ [ပါဒမောလုမ္ဗ (သီ. သျာ. ပီ.)]၊ မိတ္တကော ဝိယ သောစတီတိ.

လောသကဇာတကံ ပဌမံ.

၄၂. ယော အတ္ထကာမဿ ဟိတာနုကမ္ပိနော၊ ဩဝဇ္ဇမာနော န ကရောတိ သာသနံ၊

ကပေါတကဿ ဝစနံ အကတွာ၊ အမိတ္တဟတ္ထတ္ထဂတောဝ သေတီတိ.

ကပေါတဇာတကံ ဒုတိယံ.

၄၃. ယော အတ္ထကာမဿ ဟိတာနုကမ္ပိနော၊ ဩဝဇ္ဇမာနော န ကရောတိ သာသနံ၊

ဧဝံ သော နိဟတော သေတိ၊ ဝေဠုကဿ ယထာ ပိတာတိ.

ဝေဠုကဇာတကံ တတိယံ.

၄၄. သေယျော အမိတ္တော မတိယာ ဥပေတော၊ န တွေဝ မိတ္တော မတိဝိပ္ပဟီနော၊

မကသံ ဝဓိဿန္တိ ဟိ ဧဠမူဂေါ၊ ပုတ္တော ပိတု အဗ္ဘိဒါ ဥတ္တမင်္ဂန္တိ.

မကသဇာတကံ စတုတ္ထံ.

၄၅. သေယျော အမိတ္တော မေဓာဝီ၊ ယဉ္စေ ဗာလာနုကမ္ပကော၊

ပဿ ရောဟိဏိကံ ဇမ္မိံ၊ မာတရံ ဟန္တွာန သောစတီတိ.

ရောဟိဏိဇာတကံ ပဉ္စမံ.

၄၆. န ဝေ အနတ္ထကုသလေန၊ အတ္ထစရိယာ သုခါဝဟာ၊

ဟာပေတိ အတ္ထံ ဒုမ္မေဓော၊ ကပိ အာရာမိကော ယထာတိ.

အာရာမဒူသကဇာတကံ ဆဋ္ဌံ.

၄၇. န ဝေ အနတ္ထကုသလေန၊ အတ္ထစရိယာ သုခါဝဟာ၊

ဟာပေတိ အတ္ထံ ဒုမ္မေဓော၊ ကောဏ္ဍညော ဝါရုဏိံ ယထာတိ.

ဝါရုဏိဒူသကဇာတကံ သတ္တမံ.

၄၈. အနုပါယေန ယော အတ္ထံ၊ ဣစ္ဆတိ သော ဝိဟညတိ၊

စေတာ ဟနိံသု ဝေဒဗ္ဗံ [ဝေဒဗ္ဘံ (သီ. ပီ.)]၊ သဗ္ဗေ တေ ဗျသနမဇ္ဈဂူတိ.

ဝေဒဗ္ဗ [ဝေဒဗ္ဘ (သီ. ပီ.)] ဇာတကံ အဋ္ဌမံ.

၄၉. နက္ခတ္တံ ပဋိမာနေန္တံ၊ အတ္ထော ဗာလံ ဥပစ္စဂါ၊

အတ္ထော အတ္ထဿ နက္ခတ္တံ၊ ကိံ ကရိဿန္တိ တာရကာတိ.

နက္ခတ္တဇာတကံ နဝမံ.

၅၀. ဒုမ္မေဓာနံ သဟဿေန၊ ယညော မေ ဥပယာစိတော၊

ဣဒါနိ ခေါဟံ ယဇိဿာမိ၊ ဗဟု [ဗဟူ (သီ. ပီ.)၊ ဗဟုံ (က.)] အဓမ္မိကော ဇနောတိ.

ဒုမ္မေဓဇာတကံ ဒသမံ.

အတ္ထကာမဝဂ္ဂေါ ပဉ္စမော.

တဿုဒ္ဒါနံ –

အထ မိတ္တက မာတု ကပေါတဝရော၊ တထာ ဝေဠူက ဧဠမူဂေါ ရောဟိဏီ၊

ကပိ ဝါရုဏိ စေတစရာ စ ပုန၊ တထာ တာရက ယညဝရေန ဒသာတိ.

ပဌမော ပဏ္ဏာသကော.