၄. ကုလာဝကဝဂ္ဂေါ

၃၁. ကုလာဝကာ မာတလိ သိမ္ဗလိသ္မိံ၊ ဤသာမုခေန ပရိဝဇ္ဇယဿု၊

ကာမံ စဇာမ အသုရေသု ပါဏံ၊ မာ မေ ဒိဇာ ဝိက္ကုလဝါ [မာယိမေ ဒိဇာ ဝိကုလာဝါ (သီ. သျာ. ပီ.)] အဟေသုန္တိ.

ကုလာဝကဇာတကံ ပဌမံ.

၃၂. ရုဒံ မနုညံ ရုစိရာ စ ပိဋ္ဌိ၊ ဝေဠုရိယဝဏ္ဏူပနိဘာ [ဝဏ္ဏူပဋိဘာ (သျာ.)၊ ဝဏ္ဏသန္နိဘာ (က.)] စ ဂီဝါ၊

ဗျာမမတ္တာနိ စ ပေခုဏာနိ၊ နစ္စေန တေ ဓီတရံ နော ဒဒါမီတိ.

နစ္စဇာတကံ ဒုတိယံ.

၃၃. သမ္မောဒမာနာ ဂစ္ဆန္တိ၊ ဇာလမာဒါယ ပက္ခိနော၊

ယဒါ တေ ဝိဝဒိဿန္တိ၊ တဒါ ဧဟိန္တိ မေ ဝသန္တိ.

သမ္မောဒမာနဇာတကံ တတိယံ.

၃၄. န မံ သီတံ န မံ ဥဏှံ၊ န မံ ဇာလသ္မိ ဗာဓနံ၊

ယဉ္စ မံ မညတေ မစ္ဆီ၊ အညံ သော ရတိယာ ဂတောတိ.

မစ္ဆဇာတကံ စတုတ္ထံ.

၃၅. သန္တိ ပက္ခာ အပတနာ၊ သန္တိ ပါဒါ အဝဉ္စနာ၊

မာတာပိတာ စ နိက္ခန္တာ၊ ဇာတဝေဒ ပဋိက္ကမာတိ.

ဝဋ္ဋကဇာတကံ ပဉ္စမံ.

၃၆. ယံ နိဿိတာ ဇဂတိရုဟံ ဝိဟင်္ဂမာ၊ သွာယံ အဂ္ဂိံ ပမုဉ္စတိ၊

ဒိသာ ဘဇထ ဝက္ကင်္ဂါ [ဝင်္ကင်္ဂါ (သျာ.)]၊ ဇာတံ သရဏတော ဘယန္တိ.

သကုဏဇာတကံ ဆဋ္ဌံ.

၃၇. ယေ ဝုဍ္ဎ [ဝဒ္ဓ (သီ. ပီ.)] မပစာယန္တိ၊ နရာ ဓမ္မဿ ကောဝိဒါ၊

ဒိဋ္ဌေဝ ဓမ္မေ ပါသံသာ၊ သမ္ပရာယေ စ သုဂ္ဂတီတိ.

တိတ္တိရဇာတကံ သတ္တမံ.

၃၈. နာစ္စန္တံ နိကတိပ္ပညော၊ နိကတျာ သုခမေဓတိ၊

အာရာဓေတိ နိကတိပ္ပညော [အာရာဓေ နိကတိပ္ပညော (ပီ.)]၊ ဗကော ကက္ကဋကာမိဝါတိ.

ဗကဇာတကံ အဋ္ဌမံ.

၃၉. မညေ သောဝဏ္ဏယော ရာသိ၊ သောဏ္ဏမာလာ စ နန္ဒကော၊

ယတ္ထ ဒါသော အာမဇာတော၊ ဌိတော ထုလ္လာနိ [ထူလာနိ (က.)] ဂဇ္ဇတီတိ.

နန္ဒဇာတကံ နဝမံ.

၄၀. ကာမံ ပတာမိ နိရယံ၊ ဥဒ္ဓံပါဒေါ အဝံသိရော၊

နာနရိယံ ကရိဿာမိ၊ ဟန္ဒ ပိဏ္ဍံ ပဋိဂ္ဂဟာတိ.

ခဒိရင်္ဂါရဇာတကံ ဒသမံ.

ကုလာဝကဝဂ္ဂေါ စတုတ္ထော.

တဿုဒ္ဒါနံ –

သိရိမာတလိ ဓီတရ ပက္ခိဝရော၊ ရတိယာဂတော မာတာပိတာ စ ပုန၊

ဇဂတီရုဟ ဝုဍ္ဎ သုကက္ကဋကော၊ တထာ နန္ဒကပိဏ္ဍဝရေန ဒသာတိ.