၃. ကုရုင်္ဂဝဂ္ဂေါ

၂၁. ဉာတမေတံ ကုရုင်္ဂဿ၊ ယံ တွံ သေပဏ္ဏိ သိယျသိ [သေယျသိ (သီ. သျာ. ပီ.)]၊

အညံ သေပဏ္ဏိ ဂစ္ဆာမိ၊ န မေ တေ ရုစ္စတေ ဖလန္တိ.

ကုရုင်္ဂမိဂဇာတကံ ပဌမံ.

၂၂. ယေ ကုက္ကုရာ ရာဇကုလမှိ ဝဒ္ဓါ၊ ကောလေယျကာ ဝဏ္ဏဗလူပပန္နာ၊

တေမေ န ဝဇ္ဈာ မယမသ္မ ဝဇ္ဈာ၊ နာယံ သဃစ္စာ ဒုဗ္ဗလဃာတိကာယန္တိ.

ကုက္ကုရဇာတကံ ဒုတိယံ.

၂၃. အပိ ပဿေန သေမာနော၊ သလ္လေဘိ သလ္လလီကတော၊

သေယျောဝ ဝဠဝါ ဂေါဇော [ဘောဇ္ဇော (သီ.)၊ ဘောဇ္ဈော (သျာ. ပီ.)]၊ ယုဉ္ဇ မညေဝ သာရထီတိ.

ဂေါဇာနီယ [ဘောဇာဇာနီယ (သီ. သျာ. ပီ.)] ဇာတကံ တတိယံ.

၂၄. ယဒါ ယဒါ ယတ္ထ ယဒါ၊ ယတ္ထ ယတ္ထ ယဒါ ယဒါ၊

အာဇညော ကုရုတေ ဝေဂံ၊ ဟာယန္တိ တတ္ထ ဝါဠဝါတိ.

အာဇညဇာတကံ စတုတ္ထံ.

၂၅. အညမညေဟိ တိတ္ထေဟိ၊ အဿံ ပါယေဟိ သာရထိ၊

အစ္စာသနဿ ပုရိသော၊ ပါယာသဿပိ တပ္ပတီတိ.

တိတ္ထဇာတကံ ပဉ္စမံ.

၂၆. ပုရာဏစောရာန ဝစော နိသမ္မ၊ မဟိဠာမုခေါ ပေါထယမနွစာရီ၊

သုသညတာနဉှိ ဝစော နိသမ္မ၊ ဂဇုတ္တမော သဗ္ဗဂုဏေသု အဋ္ဌာတိ.

မဟိဠာမုခဇာတကံ ဆဋ္ဌံ.

၂၇. နာလံ ကဗဠံ ပဒါတဝေ၊ န စ ပိဏ္ဍံ န ကုသေ န ဃံသိတုံ၊

မညာမိ အဘိဏှဒဿနာ၊ နာဂေါ သ္နေဟမကာသိ [သိနေဟမကာသိ (သီ. သျာ. ပီ.)] ကုက္ကုရေတိ.

အဘိဏှဇာတကံ သတ္တမံ.

၂၈. မနုညမေဝ ဘာသေယျ၊ နာမနုညံ ကုဒါစနံ၊

မနုညံ ဘာသမာနဿ၊ ဂရုံ ဘာရံ ဥဒဒ္ဓရိ၊

ဓနဉ္စ နံ အလာဘေသိ၊ တေန စတ္တမနော အဟူတိ.

နန္ဒိဝိသာလဇာတကံ အဋ္ဌမံ.

၂၉. ယတော ယတော ဂရု ဓုရံ၊ ယတော ဂမ္ဘီရဝတ္တနီ၊

တဒါဿု ကဏှံ ယုဉ္ဇန္တိ၊ သွာဿု တံ ဝဟတေ ဓုရန္တိ.

ကဏှဇာတကံ နဝမံ.

၃၀. မာ မုနိကဿ ပိဟယိ၊ အာတုရန္နာနိ ဘုဉ္ဇတိ၊

အပ္ပေါဿုက္ကော ဘုသံ ခါဒ၊ ဧတံ ဒီဃာယုလက္ခဏန္တိ.

မုနိကဇာတကံ ဒသမံ.

ကုရုင်္ဂဝဂ္ဂေါ တတိယော.

တဿုဒ္ဒါနံ –

ကုရုင်္ဂဿ ကုက္ကုရဂေါဇဝရော၊ ပုန ဝါဠဝဿသိရိဝှယနော [သိရိဝယနော (သဗ္ဗတ္ထ)]၊

မဟိဠာမုခနာမနုညဝရော၊ ဝဟတေ ဓုရ မုနိကေန ဒသာတိ.