၂. သီလဝဂ္ဂေါ

၁၁. ဟောတိ သီလဝတံ အတ္ထော၊ ပဋိသန္ထာရ [ပဋိသန္ဓာရ (က.)] ဝုတ္တိနံ၊

လက္ခဏံ ပဿ အာယန္တံ၊ ဉာတိသံဃပုရက္ခတံ [ပုရက္ခိတံ (သျာ.)၊ ပုရေက္ခိတံ (က.)]၊

အထ ပဿသိမံ ကာဠံ၊ သုဝိဟီနံဝ ဉာတိဘီတိ.

လက္ခဏမိဂဇာတကံ ပဌမံ.

၁၂. နိဂြောဓမေဝ သေဝေယျ၊ န သာခမုပသံဝသေ၊

နိဂြောဓသ္မိံ မတံ သေယျော၊ ယဉ္စေ သာခသ္မိ [သာခသ္မိံ (သီ. ပီ.)] ဇီဝိတန္တိ.

နိဂြောဓမိဂဇာတကံ ဒုတိယံ.

၁၃. ဓိရတ္ထု ကဏ္ဍိနံ သလ္လံ၊ ပုရိသံ ဂါဠှဝေဓိနံ၊

ဓိရတ္ထု တံ ဇနပဒံ၊ ယတ္ထိတ္ထီ ပရိဏာယိကာ၊

တေ စာပိ ဓိက္ကိတာ [ဓိက္ကတာ (?)] သတ္တာ၊ ယေ ဣတ္ထီနံ ဝသံဂတာတိ.

ကဏ္ဍိဇာတကံ တတိယံ.

၁၄. န ကိရတ္ထိ ရသေဟိ ပါပိယော၊ အာဝါသေဟိ ဝ [ဝါ (သဗ္ဗတ္ထ)] သန္ထဝေဟိ ဝါ၊

ဝါတမိဂံ ဂဟနနိဿိတံ [ဂေဟနိဿိတံ (သီ. ပီ.)]၊ ဝသမာနေသိ ရသေဟိ သဉ္ဇယောတိ.

ဝါတမိဂဇာတကံ စတုတ္ထံ.

၁၅. အဋ္ဌက္ခုရံ ခရာဒိယေ၊ မိဂံ ဝင်္ကာတိဝင်္ကိနံ၊

သတ္တဟိ ကာလာတိက္ကန္တံ [သတ္တဟိ ကလာဟ’တိက္ကန္တံ (သီ.)၊ သတ္တကာလေဟ’တိက္ကန္တံ (သျာ.)၊ သတ္တဟိ ကာလာဟ’တိက္ကန္တံ (ပီ.)]၊ န နံ ဩဝဒိတုဿဟေတိ.

ခရာဒိယဇာတကံ ပဉ္စမံ.

၁၆. မိဂံ တိပလ္လတ္ထ [တိပလ္လတ္တ (က.)] မနေကမာယံ၊ အဋ္ဌက္ခုရံ အဍ္ဎရတ္တာပပါယိံ [အဍ္ဎရတ္တာဝပါယိံ (သီ. ပီ.)]၊

ဧကေန သောတေန ဆမာဿသန္တော၊ ဆဟိ ကလာဟိတိဘောတိ [ကလာဟတိဘောတိ (သီ. သျာ. ပီ.)] ဘာဂိနေယျောတိ.

တိပလ္လတ္ထမိဂဇာတကံ ဆဋ္ဌံ.

၁၇. ကာဠေ ဝါ ယဒိ ဝါ ဇုဏှေ၊ ယဒါ ဝါယတိ မာလုတော၊

ဝါတဇာနိ ဟိ သီတာနိ၊ ဥဘောတ္ထမပရာဇိတာတိ.

မာလုတဇာတကံ သတ္တမံ.

၁၈. ဧဝံ စေ သတ္တာ ဇာနေယျုံ၊ ဒုက္ခာယံ ဇာတိသမ္ဘဝေါ၊

န ပါဏော ပါဏိနံ ဟညေ၊ ပါဏဃာတီ ဟိ သောစတီတိ.

မတကဘတ္တဇာတကံ အဋ္ဌမံ.

၁၉. သစေ မုစ္စေ [မုဉ္စေ (သီ. သျာ. ပီ.)] ပေစ္စ မုစ္စေ [မုဉ္စေ (သီ. သျာ. ပီ.)]၊ မုစ္စမာနော ဟိ ဗဇ္ဈတိ၊

န ဟေဝံ ဓီရာ မုစ္စန္တိ၊ မုတ္တိ ဗာလဿ ဗန္ဓနန္တိ.

အာယာစိတဘတ္တဇာတကံ နဝမံ.

၂၀. ဒိသွာ ပဒမနုတ္တိဏ္ဏံ၊ ဒိသွာနောတရိတံ ပဒံ၊

နဠေန ဝါရိံ ပိဿာမ [ပိဝိဿာမ (သီ. သျာ. ပီ.)]၊ နေဝ [န စ (က.)] မံ တွံ ဝဓိဿသီတိ.

နဠပါနဇာတကံ ဒသမံ.

သီလဝဂ္ဂေါ ဒုတိယော.

တဿုဒ္ဒါနံ –

အထ လက္ခဏ သာခ ဓိရတ္ထု ပုန၊ န ကိရတ္ထိ ရသေဟိ ခရာဒိယာ၊

အတိဘောတိ ဝရ [ရသ (သဗ္ဗတ္ထ)] မာလုတ ပါဏ၊ မုစ္စေန နဠအဝှယနေန ဘဝန္တိ ဒသာတိ.