၁၀. ဒုတိယရာဂသုတ္တံ

၆၉. ဝုတ္တဉှေတံ ဘဂဝတာ၊ ဝုတ္တမရဟတာတိ မေ သုတံ –

‘‘ယဿ ကဿစိ၊ ဘိက္ခဝေ၊ ဘိက္ခုဿ ဝါ ဘိက္ခုနိယာ ဝါ ရာဂေါ အပ္ပဟီနော၊ ဒေါသော အပ္ပဟီနော၊ မောဟော အပ္ပဟီနော – အယံ ဝုစ္စတိ၊ ဘိက္ခဝေ၊ န ‘အတရိ [အတိဏ္ဏော (က. သီ. က.)] သမုဒ္ဒံ သဦမိံ သဝီစိံ သာဝဋ္ဋံ သဂဟံ သရက္ခသံ’. ယဿ ကဿစိ၊ ဘိက္ခဝေ၊ ဘိက္ခုဿ ဝါ ဘိက္ခုနိယာ ဝါ ရာဂေါ ပဟီနော၊ ဒေါသော ပဟီနော၊ မောဟော ပဟီနော – အယံ ဝုစ္စတိ၊ ဘိက္ခဝေ၊ ‘အတရိ သမုဒ္ဒံ သဦမိံ သဝီစိံ သာဝဋ္ဋံ သဂဟံ သရက္ခသံ၊ တိဏ္ဏော ပါရင်္ဂတော [ပါရဂတော (သီ. အဋ္ဌ. သျာ.)] ထလေ တိဋ္ဌတိ ဗြာဟ္မဏော’’’တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ –

‘‘ယဿ ရာဂေါ စ ဒေါသော စ၊ အဝိဇ္ဇာ စ ဝိရာဇိတာ၊

သောမံ သမုဒ္ဒံ သဂဟံ သရက္ခသံ၊ သဦမိဘယံ ဒုတ္တရံ အစ္စတာရိ.

‘‘သင်္ဂါတိဂေါ မစ္စုဇဟော နိရူပဓိ၊ ပဟာသိ ဒုက္ခံ အပုနဗ္ဘဝါယ၊

အတ္ထင်္ဂတော သော န ပမာဏမေတိ၊ အမောဟယိ မစ္စုရာဇန္တိ ဗြူမီ’’တိ.

အယမ္ပိ အတ္ထော ဝုတ္တော ဘဂဝတာ၊ ဣတိ မေ သုတန္တိ. ဒသမံ.

ဒုတိယော ဝဂ္ဂေါ နိဋ္ဌိတော.

တဿုဒ္ဒါနံ –

ပုညံ စက္ခု အထ ဣန္ဒြိယာနိ [အတ္ထိန္ဒြိယာ (သျာ.)]၊ အဒ္ဓါ စ စရိတံ ဒုဝေ သောစိ [သုစိ (သျာ.)]၊

မုနော [မုနေ (သျာ.)] အထ ရာဂဒုဝေ၊ ပုန ဝဂ္ဂမာဟု ဒုတိယမုတ္တမန္တိ.