၈. ပဋိသလ္လာနသုတ္တံ

၄၅. ဝုတ္တဉှေတံ ဘဂဝတာ၊ ဝုတ္တမရဟတာတိ မေ သုတံ –

‘‘ပဋိသလ္လာနာရာမာ [ပဋိသလ္လာနာရာမာ (က.)]၊ ဘိက္ခဝေ၊ ဝိဟရထ ပဋိသလ္လာနရတာ၊ အဇ္ဈတ္တံ စေတောသမထမနုယုတ္တာ၊ အနိရာကတဇ္ဈာနာ၊ ဝိပဿနာယ သမန္နာဂတာ၊ ဗြူဟေတာ သုညာဂါရာနံ. ပဋိသလ္လာနာရာမာနံ၊ ဘိက္ခဝေ၊ ဝိဟရတံ ပဋိသလ္လာနရတာနံ အဇ္ဈတ္တံ စေတောသမထမနုယုတ္တာနံ အနိရာကတမဇ္ဈာနာနံ ဝိပဿနာယ သမန္နာဂတာနံ ဗြူဟေတာနံ သုညာဂါရာနံ ဒွိန္နံ ဖလာနံ အညတရံ ဖလံ ပါဋိကင်္ခံ – ဒိဋ္ဌေဝ ဓမ္မေ အညာ၊ သတိ ဝါ ဥပါဒိသေသေ အနာဂါမိတာ’’တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ –

‘‘ယေ သန္တစိတ္တာ နိပကာ၊ သတိမန္တော စ [သတိမန္တောဝ (သီ. က.)] ဈာယိနော၊

သမ္မာ ဓမ္မံ ဝိပဿန္တိ၊ ကာမေသု အနပေက္ခိနော.

‘‘အပ္ပမာဒရတာ သန္တာ၊ ပမာဒေ ဘယဒဿိနော၊

အဘဗ္ဗာ ပရိဟာနာယ၊ နိဗ္ဗာနဿေဝ သန္တိကေ’’တိ.

အယမ္ပိ အတ္ထော ဝုတ္တော ဘဂဝတာ၊ ဣတိ မေ သုတန္တိ. အဋ္ဌမံ.