၉. သိက္ခာနိသံသသုတ္တံ

၄၆. ဝုတ္တဉှေတံ ဘဂဝတာ၊ ဝုတ္တမရဟတာတိ မေ သုတံ –

‘‘သိက္ခာနိသံသာ၊ ဘိက္ခဝေ၊ ဝိဟရထ ပညုတ္တရာ ဝိမုတ္တိသာရာ သတာဓိပတေယျာ. သိက္ခာနိသံသာနံ၊ ဘိက္ခဝေ၊ ဝိဟရတံ ပညုတ္တရာနံ ဝိမုတ္တိသာရာနံ သတာဓိပတေယျာနံ ဒွိန္နံ ဖလာနံ အညတရံ ဖလံ ပါဋိကင်္ခံ – ဒိဋ္ဌေဝ ဓမ္မေ အညာ၊ သတိ ဝါ ဥပါဒိသေသေ အနာဂါမိတာ’’တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ –

‘‘ပရိပုဏ္ဏသိက္ခံ [ပရိပုဏ္ဏသေခံ (သီ.)၊ ပရိပုဏ္ဏသေက္ခံ (သျာ.)] အပဟာနဓမ္မံ၊ ပညုတ္တရံ ဇာတိခယန္တဒဿိံ၊

တံ ဝေ မုနိံ အန္တိမဒေဟဓာရိံ၊ မာရဉ္ဇဟံ ဗြူမိ ဇရာယ ပါရဂုံ.

‘‘တသ္မာ သဒါ ဈာနရတာ သမာဟိတာ၊ အာတာပိနော ဇာတိခယန္တဒဿိနော၊

မာရံ သသေနံ အဘိဘုယျ ဘိက္ခဝေါ၊ ဘဝထ ဇာတိမရဏဿ ပါရဂါ’’တိ.

အယမ္ပိ အတ္ထော ဝုတ္တော ဘဂဝတာ၊ ဣတိ မေ သုတန္တိ. နဝမံ.