၁၀. သောမနဿသုတ္တံ

၃၇. ဝုတ္တဉှေတံ ဘဂဝတာ၊ ဝုတ္တမရဟတာတိ မေ သုတံ –

‘‘ဒွီဟိ၊ ဘိက္ခဝေ၊ ဓမ္မေဟိ သမန္နာဂတော ဘိက္ခု ဒိဋ္ဌေဝ ဓမ္မေ သုခသောမနဿဗဟုလော ဝိဟရတိ၊ ယောနိ စဿ [ယောနိသော (သီ. သျာ. ပီ.)၊ ယောနိဿ (က.)] အာရဒ္ဓါ ဟောတိ အာသဝါနံ ခယာယ. ကတမေဟိ ဒွီဟိ? သံဝေဇနီယေသု ဌာနေသု သံဝေဇနေန၊ သံဝိဂ္ဂဿ စ ယောနိသော ပဓာနေန. ဣမေဟိ ခေါ၊ ဘိက္ခဝေ၊ ဒွီဟိ ဓမ္မေဟိ သမန္နာဂတော ဘိက္ခု ဒိဋ္ဌေဝ ဓမ္မေ သုခသောမနဿဗဟုလော ဝိဟရတိ၊ ယောနိ စဿ အာရဒ္ဓါ ဟောတိ အာသဝါနံ ခယာယာ’’တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ –

‘‘သံဝေဇနီယဋ္ဌာနေသု [သံဝေဇနီယေသု ဌာနေသု (သျာ. ပီ.)]၊ သံဝိဇ္ဇေထေဝ ပဏ္ဍိတော၊

အာတာပီ နိပကော ဘိက္ခု၊ ပညာယ သမဝေက္ခိယ.

‘‘ဧဝံ ဝိဟာရီ အာတာပီ၊ သန္တဝုတ္တိ အနုဒ္ဓတော၊

စေတောသမထမနုယုတ္တော၊ ခယံ ဒုက္ခဿ ပါပုဏေ’’တိ.

အယမ္ပိ အတ္ထော ဝုတ္တော ဘဂဝတာ၊ ဣတိ မေ သုတန္တိ. ဒသမံ.

ပဌမော ဝဂ္ဂေါ နိဋ္ဌိတော.

တဿုဒ္ဒါနံ –

ဒွေ စ ဘိက္ခူ တပနီယာ၊ တပနီယာ ပရတ္ထေဟိ၊

အာတာပီ [ဒွေ ပါဒါ (က.)၊ ဒွေ အာတာပီ (သီ.)] နကုဟနာ ဒွေ [န ကုဟနာ စ (သဗ္ဗတ္ထ)]၊ သောမနဿေန တေ ဒသာတိ.