၄. အဝိဇ္ဇာနီဝရဏသုတ္တံ

၁၄. ဝုတ္တဉှေတံ ဘဂဝတာ၊ ဝုတ္တမရဟတာတိ မေ သုတံ –

‘‘နာဟံ၊ ဘိက္ခဝေ၊ အညံ ဧကနီဝရဏမ္ပိ သမနုပဿာမိ ယေန [ယေနေဝံ (?)] နီဝရဏေန နိဝုတာ ပဇာ ဒီဃရတ္တံ သန္ဓာဝန္တိ သံသရန္တိ ယထယိဒံ၊ ဘိက္ခဝေ၊ အဝိဇ္ဇာနီဝရဏံ [အဝိဇ္ဇာနီဝရဏေန (?)]. အဝိဇ္ဇာနီဝရဏေန ဟိ၊ ဘိက္ခဝေ၊ နိဝုတာ ပဇာ ဒီဃရတ္တံ သန္ဓာဝန္တိ သံသရန္တီ’’တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ –

‘‘နတ္ထညော ဧကဓမ္မောပိ၊ ယေနေဝံ [ယေနေဝ (သီ. ပီ. က.)] နိဝုတာ ပဇာ၊

သံသရန္တိ အဟောရတ္တံ၊ ယထာ မောဟေန အာဝုတာ.

‘‘ယေ စ မောဟံ ပဟန္တွာန၊ တမောခန္ဓံ [တမောက္ခန္ဓံ (သီ. သျာ. ပီ.)] ပဒါလယုံ၊

န တေ ပုန သံသရန္တိ၊ ဟေတု တေသံ န ဝိဇ္ဇတီ’’တိ.

အယမ္ပိ အတ္ထော ဝုတ္တော ဘဂဝတာ၊ ဣတိ မေ သုတန္တိ. စတုတ္ထံ.