၅. တဏှာသံယောဇနသုတ္တံ

၁၅. ဝုတ္တဉှေတံ ဘဂဝတာ၊ ဝုတ္တမရဟတာတိ မေ သုတံ –

‘‘နာဟံ၊ ဘိက္ခဝေ၊ အညံ ဧကသံယောဇနမ္ပိ သမနုပဿာမိ ယေန [ယေနေဝံ (သျာ.)] သံယောဇနေန သံယုတ္တာ သတ္တာ ဒီဃရတ္တံ သန္ဓာဝန္တိ သံသရန္တိ ယထယိဒံ၊ ဘိက္ခဝေ၊ တဏှာသံယောဇနံ [တဏှာသံယောဇနေန (?)]. တဏှာသံယောဇနေန ဟိ၊ ဘိက္ခဝေ၊ သံယုတ္တာ သတ္တာ ဒီဃရတ္တံ သန္ဓာဝန္တိ သံသရန္တီ’’တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ –

‘‘တဏှာဒုတိယော ပုရိသော၊ ဒီဃမဒ္ဓါန သံသရံ၊

ဣတ္ထဘာဝညထာဘာဝံ [ဣတ္ထမ္ဘာဝညထာဘာဝံ (သျာ.)]၊ သံသာရံ နာတိဝတ္တတိ.

‘‘ဧတမာဒီနဝံ [ဧဝမာဒီနဝံ (သီ. ပီ. က.)] ဉတွာ၊ တဏှံ [တဏှာ (သီ. က.)] ဒုက္ခဿ သမ္ဘဝံ၊

ဝီတတဏှော အနာဒါနော၊ သတော ဘိက္ခု ပရိဗ္ဗဇေ’’တိ.

အယမ္ပိ အတ္ထော ဝုတ္တော ဘဂဝတာ၊ ဣတိ မေ သုတန္တိ. ပဉ္စမံ.