၃. စမ္ပေယျနာဂစရိယာ

၂၀. ‘‘ပုနာပရံ ယဒါ ဟောမိ၊ စမ္ပေယျကော မဟိဒ္ဓိကော၊

တဒါပိ ဓမ္မိကော အာသိံ၊ သီလဗ္ဗတသမပ္ပိတော.

၂၁. ‘‘တဒါပိ မံ ဓမ္မစာရိံ၊ ဥပဝုတ္ထံ ဥပေါသထံ၊

အဟိတုဏ္ဍိကော ဂဟေတွာန၊ ရာဇဒွါရမှိ ကီဠတိ.

၂၂. ‘‘ယံ ယံ သော ဝဏ္ဏံ စိန္တယိ၊ နီလံဝ ပီတလောဟိတံ၊

တဿ စိတ္တာနုဝတ္တန္တော၊ ဟောမိ စိန္တိတသန္နိဘော.

၂၃. ‘‘ထလံ ကရေယျမုဒကံ၊ ဥဒကမ္ပိ ထလံ ကရေ၊

ယဒိဟံ တဿ ပကုပ္ပေယျံ၊ ခဏေန ဆာရိကံ ကရေ.

၂၄. ‘‘ယဒိ စိတ္တဝသီ ဟေဿံ၊ ပရိဟာယိဿာမိ သီလတော၊

သီလေန ပရိဟီနဿ၊ ဥတ္တမတ္ထော န သိဇ္ဈတိ.

၂၅. ‘‘ကာမံ ဘိဇ္ဇတုယံ ကာယော၊ ဣဓေဝ ဝိကိရီယတု၊

နေဝ သီလံ ပဘိန္ဒေယျံ၊ ဝိကိရန္တေ ဘုသံ ဝိယာ’’တိ.

စမ္ပေယျနာဂစရိယံ တတိယံ.