၄. စူဠဗောဓိစရိယာ

၂၆. ‘‘ပုနာပရံ ယဒါ ဟောမိ၊ စူဠဗောဓိ သုသီလဝါ၊

ဘဝံ ဒိသွာန ဘယတော၊ နေက္ခမ္မံ အဘိနိက္ခမိံ.

၂၇. ‘‘ယာ မေ ဒုတိယိကာ အာသိ၊ ဗြာဟ္မဏီ ကနကသန္နိဘာ၊

သာပိ ဝဋ္ဋေ အနပေက္ခာ၊ နေက္ခမ္မံ အဘိနိက္ခမိ.

၂၈. ‘‘နိရာလယာ ဆိန္နဗန္ဓူ၊ အနပေက္ခာ ကုလေ ဂဏေ၊

စရန္တာ ဂါမနိဂမံ၊ ဗာရာဏသိမုပါဂမုံ.

၂၉. ‘‘တတ္ထ ဝသာမ နိပကာ၊ အသံသဋ္ဌာ ကုလေ ဂဏေ၊

နိရာကုလေ အပ္ပသဒ္ဒေ၊ ရာဇုယျာနေ ဝသာမုဘော.

၃၀. ‘‘ဥယျာနဒဿနံ ဂန္တွာ၊ ရာဇာ အဒ္ဒသ ဗြာဟ္မဏိံ၊

ဥပဂမ္မ မမံ ပုစ္ဆိ၊ ‘တုယှေသာ ကာ ကဿ ဘရိယာ’.

၃၁. ‘‘ဧဝံ ဝုတ္တေ အဟံ တဿ၊ ဣဒံ ဝစနမဗြဝိံ၊

‘န မယှံ ဘရိယာ ဧသာ၊ သဟဓမ္မာ ဧကသာသနီ’.

၃၂. ‘‘တိဿာ [တဿာ (သီ.)] သာရတ္တဂဓိတော၊ ဂါဟာပေတွာန စေဋကေ၊

နိပ္ပီဠယန္တော ဗလသာ၊ အန္တေပုရံ ပဝေသယိ.

၃၃. ‘‘ဩဒပတ္တကိယာ မယှံ၊ သဟဇာ ဧကသာသနီ၊

အာကဍ္ဎိတွာ နယန္တိယာ၊ ကောပေါ မေ ဥပပဇ္ဇထ.

၃၄. ‘‘သဟ ကောပေ သမုပ္ပန္နေ၊ သီလဗ္ဗတမနုဿရိံ၊

တတ္ထေဝ ကောပံ နိဂ္ဂဏှိံ၊ နာဒါသိံ ဝဍ္ဎိတူပရိ.

၃၅. ‘‘ယဒိ နံ ဗြာဟ္မဏိံ ကောစိ၊ ကောဋ္ဋေယျ တိဏှသတ္တိယာ၊

နေဝ သီလံ ပဘိန္ဒေယျံ၊ ဗောဓိယာယေဝ ကာရဏာ.

၃၆. ‘‘န မေသာ ဗြာဟ္မဏီ ဒေဿာ၊ နပိ မေ ဗလံ န ဝိဇ္ဇတိ၊

သဗ္ဗညုတံ ပိယံ မယှံ၊ တသ္မာ သီလာနုရက္ခိသ’’န္တိ.

စူဠဗောဓိစရိယံ စတုတ္ထံ.