၃. သီဝလိတ္ထေရအပဒါနံ

၅၄. ‘‘ပဒုမုတ္တရော နာမ ဇိနော၊ သဗ္ဗဓမ္မေသု စက္ခုမာ၊

ဣတော သတသဟဿမှိ၊ ကပ္ပေ ဥပ္ပဇ္ဇိ နာယကော.

၅၅. ‘‘သီလံ တဿ အသင်္ခေယျံ၊ သမာဓိ ဝဇိရူပမော၊

အသင်္ခေယျံ ဉာဏဝရံ၊ ဝိမုတ္တိ စ အနောပမာ.

၅၆. ‘‘မနုဇာမရနာဂါနံ၊ ဗြဟ္မာနဉ္စ သမာဂမေ၊

သမဏဗြာဟ္မဏာကိဏ္ဏေ၊ ဓမ္မံ ဒေသေသိ နာယကော.

၅၇. ‘‘သသာဝကံ မဟာလာဘိံ၊ ပုညဝန္တံ ဇုတိန္ဓရံ၊

ဌပေသိ ဧတဒဂ္ဂမှိ၊ ပရိသာသု ဝိသာရဒေါ.

၅၈. ‘‘တဒါဟံ ခတ္တိယော အာသိံ၊ နဂရေ ဟံသသဝှယေ၊

သုတွာ ဇိနဿ တံ ဝါကျံ၊ သာဝကဿ ဂုဏံ ဗဟုံ.

၅၉. ‘‘နိမန္တယိတွာ သတ္တာဟံ၊ ဘောဇယိတွာ သသာဝကံ၊

မဟာဒါနံ ဒဒိတွာန၊ တံ ဌာနမဘိပတ္ထယိံ.

၆၀. ‘‘တဒါ မံ ဝိနတံ ပါဒေ၊ ဒိသွာန ပုရိသာသဘော၊

သရေန မဟတာ ဝီရော [သုဿရေန မဟာဝီရော (သီ. ပီ.)]၊ ဣဒံ ဝစနမဗြဝိ.

၆၁. ‘‘‘တတော ဇိနဿ ဝစနံ၊ သောတုကာမာ မဟာဇနာ၊

ဒေဝဒါနဝဂန္ဓဗ္ဗာ၊ ဗြဟ္မာနော စ မဟိဒ္ဓိကာ’.

၆၂. ‘‘သမဏဗြာဟ္မဏာ စေဝ၊ နမဿိံသု ကတဉ္ဇလီ၊

‘နမော တေ ပုရိသာဇည၊ နမော တေ ပုရိသုတ္တမ.

၆၃. ‘‘‘ခတ္တိယေန မဟာဒါနံ၊ ဒိန္နံ သတ္တာဟိကမ္ပိ ဝေါ [သတ္တဟိကံ မိ ဝေါ (သီ.)၊ သတ္တဟိကာဓိကံ (သျာ.)၊ သတ္တဟိကံ ဝိဘော (ပီ.)]၊

သောတုကာမာ ဖလံ တဿ၊ ဗျာကရောဟိ မဟာမုနေ’.

၆၄. ‘‘တတော အဝေါစ ဘဂဝါ၊ ‘သုဏာထ မမ ဘာသိတံ၊

အပ္ပမေယျမှိ ဗုဒ္ဓမှိ၊ သသံဃမှိ ပတိဋ္ဌိတာ [သံဃမှိ သုပ္ပတိဋ္ဌိတာ (သီ. ပီ.)].

၆၅. ‘‘‘ဒက္ခိဏာ တာယ [ဒက္ခိဏာဒါယ (သျာ. ပီ.)] ကော ဝတ္တာ၊ အပ္ပမေယျဖလာ ဟိ သာ၊

အပိ စေ သ မဟာဘောဂေါ၊ ဌာနံ ပတ္ထေတိ ဥတ္တမံ.

၆၆. ‘‘‘လာဘီ ဝိပုလလာဘာနံ၊ ယထာ ဘိက္ခု သုဒဿနော၊

တထာဟမ္ပိ ဘဝေယျန္တိ၊ လစ္ဆသေ တံ အနာဂတေ.

၆၇. ‘‘‘သတသဟဿိတော ကပ္ပေ၊ ဩက္ကာကကုလသမ္ဘဝေါ၊

ဂေါတမော နာမ ဂေါတ္တေန၊ သတ္ထာ လောကေ ဘဝိဿတိ.

၆၈. ‘‘‘တဿ ဓမ္မေသု ဒါယာဒေါ၊ ဩရသော ဓမ္မနိမ္မိတော၊

သီဝလိ နာမ နာမေန၊ ဟေဿတိ သတ္ထု သာဝကော’.

၆၉. ‘‘တေန ကမ္မေန သုကတေန၊ စေတနာပဏိဓီဟိ စ၊

ဇဟိတွာ မာနုသံ ဒေဟံ၊ တာဝတိံသူပဂေါ အဟံ.

၇၀. ‘‘ဧကနဝုတိတော ကပ္ပေ၊ ဝိပဿီ လောကနာယကော၊

ဥပ္ပဇ္ဇိ စာရုဒဿနော၊ သဗ္ဗဓမ္မဝိပဿကော.

၇၁. ‘‘တဒါဟံ ဗန္ဓုမတိယံ၊ ကုလဿညတရဿ စ၊

ဒယိတော ပဿိတော စေဝ၊ အာသိံ ကမ္မန္တဝါဝဋော [ကမ္မန္တဗျာဝဋော (သီ. သျာ. က.)].

၇၂. ‘‘တဒါ အညတရော ပူဂေါ၊ ဝိပဿိဿ မဟေသိနော၊

ပရိဝေသံ အကာရယိ၊ မဟန္တမတိဝိဿုတံ.

၇၃. ‘‘နိဋ္ဌိတေ စ မဟာဒါနေ၊ ဒဒုံ ခဇ္ဇကသဉှိတံ၊

နဝံ ဒဓိံ မဓုဉ္စေဝ၊ ဝိစိနံ နေဝ အဒ္ဒသုံ.

၇၄. ‘‘တဒါဟံ တံ ဂဟေတွာန၊ နဝံ ဒဓိံ မဓုမ္ပိ စ၊

ကမ္မဿာမိဃရံ ဂစ္ဆိံ၊ တမေသန္တာ မမဒ္ဒသုံ.

၇၅. ‘‘သဟဿမပိ ဒတွာန၊ နာလဘိံသု စ တံ ဒွယံ၊

တတောဟံ ဧဝံ စိန္တေသိံ၊ ‘နေတံ ဟေဿတိ ဩရကံ.

၇၆. ‘‘‘ယထာ ဣမေ ဇနာ သဗ္ဗေ၊ သက္ကရောန္တိ တထာဂတံ၊

အဟမ္ပိ ကာရံ ကဿာမိ၊ သသံဃေ လောကနာယကေ’.

၇၇. ‘‘တဒါဟမေဝံ စိန္တေတွာ၊ ဒဓိံ မဓုဉ္စ ဧကတော၊

မဒ္ဒိတွာ လောကနာထဿ၊ သသံဃဿ အဒါသဟံ.

၇၈. ‘‘တေန ကမ္မေန သုကတေန၊ စေတနာပဏိဓီဟိ စ၊

ဇဟိတွာ မာနုသံ ဒေဟံ၊ တာဝတိံသမဂစ္ဆဟံ.

၇၉. ‘‘ပုနာဟံ ဗာရာဏသိယံ၊ ရာဇာ ဟုတွာ မဟာယသော၊

သတ္တုကဿ တဒါ ဒုဋ္ဌော၊ ဒွါရရောဓမကာရယိံ.

၈၀. ‘‘တဒါ တပဿိနော ရုဒ္ဓါ၊ ဧကာဟံ ရက္ခိတာ အဟုံ၊

တတော တဿ ဝိပါကေန၊ ပါပတိံ [ပါပိဋ္ဌံ (သျာ.) ပါပတ္တံ (က.)] နိရယံ ဘုသံ.

၈၁. ‘‘ပစ္ဆိမေ စ ဘဝေ ဒါနိ၊ ဇာတောဟံ ကောလိယေ ပုရေ၊

သုပ္ပဝါသာ စ မေ မာတာ၊ မဟာလိ လိစ္ဆဝီ ပိတာ.

၈၂. ‘‘ခတ္တိယေ ပုညကမ္မေန၊ ဒွါရရောဓဿ ဝါဟသာ၊

သတ္တ ဝဿာနိ နိဝသိံ၊ မာတုကုစ္ဆိမှိ ဒုက္ခိတော.

၈၃. ‘‘သတ္တာဟံ ဒွါရမူဠှောဟံ၊ မဟာဒုက္ခသမပ္ပိတော၊

မာတာ မေ ဆန္ဒဒါနေန၊ ဧဝံ အာသိ သုဒုက္ခိတာ.

၈၄. ‘‘သုဝတ္ထိတောဟံ နိက္ခန္တော၊ ဗုဒ္ဓေန အနုကမ္ပိတော၊

နိက္ခန္တဒိဝသေယေဝ၊ ပဗ္ဗဇိံ အနဂါရိယံ.

၈၅. ‘‘ဥပဇ္ဈာ သာရိပုတ္တော မေ၊ မောဂ္ဂလ္လာနော မဟိဒ္ဓိကော၊

ကေသေ ဩရောပယန္တော မေ၊ အနုသာသိ မဟာမတိ.

၈၆. ‘‘ကေသေသု ဆိဇ္ဇမာနေသု၊ အရဟတ္တမပါပုဏိံ၊

ဒေဝါ နာဂါ မနုဿာ စ၊ ပစ္စယေ ဥပနေန္တိ မေ.

၈၇. ‘‘ပဒုမုတ္တရနာထဉ္စ၊ ဝိပဿိဉ္စ ဝိနာယကံ၊

ယံ ပူဇယိံ ပမုဒိတော၊ ပစ္စယေဟိ ဝိသေသတော.

၈၈. ‘‘တတော တေသံ ဝိသေသေန၊ ကမ္မာနံ ဝိပုလုတ္တမံ၊

လာဘံ လဘာမိ သဗ္ဗတ္ထ၊ ဝနေ ဂါမေ ဇလေ ထလေ.

၈၉. ‘‘ရေဝတံ ဒဿနတ္ထာယ၊ ယဒါ ယာတိ ဝိနာယကော၊

တိံသဘိက္ခုသဟဿေဟိ၊ သဟ လောကဂ္ဂနာယကော.

၉၀. ‘‘တဒါ ဒေဝေါပဏီတေဟိ၊ မမတ္ထာယ မဟာမတိ၊

ပစ္စယေဟိ မဟာဝီရော၊ သသံဃော လောကနာယကော.

၉၁. ‘‘ဥပဋ္ဌိတော မယာ ဗုဒ္ဓေါ၊ ဂန္တွာ ရေဝတမဒ္ဒသ၊

တတော ဇေတဝနံ ဂန္တွာ၊ ဧတဒဂ္ဂေ ဌပေသိ မံ.

၉၂. ‘‘‘လာဘီနံ သီဝလိ အဂ္ဂေါ၊ မမ သိဿေသု ဘိက္ခဝေါ’၊

သဗ္ဗလောကဟိတော သတ္ထာ၊ ကိတ္တယီ ပရိသာသု မံ.

၉၃. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝေါ.

၉၄. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.

၉၅. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ သီဝလိထေရော ဣမာ ဂါထာယော

အဘာသိတ္ထာတိ.

သီဝလိတ္ထေရဿာပဒါနံ တတိယံ.