၄. ဝင်္ဂီသတ္ထေရအပဒါနံ

၉၆. ‘‘ပဒုမုတ္တရော နာမ ဇိနော၊ သဗ္ဗဓမ္မေသု စက္ခုမာ၊

ဣတော သတသဟဿမှိ၊ ကပ္ပေ ဥပ္ပဇ္ဇိ နာယကော.

၉၇. ‘‘ယထာပိ သာဂရေ ဦမိ၊ ဂဂနေ ဝိယ တာရကာ၊

ဧဝံ ပါဝစနံ တဿ၊ အရဟန္တေဟိ စိတ္တိတံ.

၉၈. ‘‘သဒေဝါသုရနာဂေဟိ၊ မနုဇေဟိ ပုရက္ခတော၊

သမဏဗြာဟ္မဏာကိဏ္ဏေ၊ ဇနမဇ္ဈေ ဇိနုတ္တမော.

၉၉. ‘‘ပဘာဟိ အနုရဉ္ဇန္တော၊ လောကေ [လောကံ (သီ.)] လောကန္တဂူ ဇိနော၊

ဝစနေန ဝိဗောဓေန္တော၊ ဝေနေယျပဒုမာနိ သော.

၁၀၀. ‘‘ဝေသာရဇ္ဇေဟိ သမ္ပန္နော၊ စတူဟိ ပုရိသုတ္တမော၊

ပဟီနဘယသာရဇ္ဇော၊ ခေမပ္ပတ္တော ဝိသာရဒေါ.

၁၀၁. ‘‘အာသဘံ ပဝရံ ဌာနံ၊ ဗုဒ္ဓဘူမိဉ္စ ကေဝလံ၊

ပဋိဇာနာတိ လောကဂ္ဂေါ၊ နတ္ထိ သဉ္စောဒကော ကွစိ.

၁၀၂. ‘‘သီဟနာဒမသမ္ဘီတံ၊ နဒတော တဿ တာဒိနော၊

ဒေဝေါ နရော ဝါ ဗြဟ္မာ ဝါ၊ ပဋိဝတ္တာ န ဝိဇ္ဇတိ.

၁၀၃. ‘‘ဒေသေန္တော ပဝရံ ဓမ္မံ၊ သန္တာရေန္တော သဒေဝကံ၊

ဓမ္မစက္ကံ ပဝတ္တေတိ၊ ပရိသာသု ဝိသာရဒေါ.

၁၀၄. ‘‘ပဋိဘာနဝတံ အဂ္ဂံ၊ သာဝကံ သာဓုသမ္မတံ၊

ဂုဏံ ဗဟုံ ပကိတ္တေတွာ၊ ဧတဒဂ္ဂေ ဌပေသိ တံ.

၁၀၅. ‘‘တဒါဟံ ဟံသဝတိယံ၊ ဗြာဟ္မဏော သာဓုသမ္မတော၊

သဗ္ဗဝေဒဝိဒူ ဇာတော၊ ဝါဂီသော ဝါဒိသူဒနော.

၁၀၆. ‘‘ဥပေစ္စ တံ မဟာဝီရံ၊ သုတွာဟံ ဓမ္မဒေသနံ၊

ပီတိဝရံ ပဋိလဘိံ၊ သာဝကဿ ဂုဏေ ရတော.

၁၀၇. ‘‘နိမန္တေတွာဝ သုဂတံ၊ သသံဃံ လောကနန္ဒနံ၊

သတ္တာဟံ ဘောဇယိတွာဟံ၊ ဒုဿေဟစ္ဆာဒယိံ တဒါ.

၁၀၈. ‘‘နိပစ္စ သိရသာ ပါဒေ၊ ကတောကာသော ကတဉ္ဇလီ၊

ဧကမန္တံ ဌိတော ဟဋ္ဌော၊ သန္ထဝိံ ဇိနမုတ္တမံ.

၁၀၉. ‘‘‘နမော တေ ဝါဒိမဒ္ဒန [ဝါဒိသဒ္ဒုလ (သီ. ပီ.)၊ ဝါဒိသူဒန (သျာ.)]၊ နမော တေ ဣသိသတ္တမ [ပုရိသုတ္တမ (သီ. ပီ.)]၊

နမော တေ သဗ္ဗလောကဂ္ဂ၊ နမော တေ အဘယင်္ကရ.

၁၁၀. ‘‘‘နမော တေ မာရမထန [မာရမသန (အဋ္ဌ.)]၊ နမော တေ ဒိဋ္ဌိသူဒန၊

နမော တေ သန္တိသုခဒ၊ နမော တေ သရဏင်္ကရ.

၁၁၁. ‘‘‘အနာထာနံ ဘဝံ နာထော၊ ဘီတာနံ အဘယပ္ပဒေါ၊

ဝိဿာမဘူမိ [ဝိဿာသံ ဘူမိ (သျာ.)၊ ဝိဿာနဘူမိ (ပီ.)] သန္တာနံ၊ သရဏံ သရဏေသိနံ’.

၁၁၂. ‘‘ဧဝမာဒီဟိ သမ္ဗုဒ္ဓံ၊ သန္ထဝိတွာ မဟာဂုဏံ၊

အဝေါစံ ဝါဒိသူဒဿ [ဝါဒိသူရဿ (သီ. သျာ. ပီ.)]၊ ဂတိံ ပပ္ပေါမိ ဘိက္ခုနော.

၁၁၃. ‘‘တဒါ အဝေါစ ဘဂဝါ၊ အနန္တပဋိဘာနဝါ၊

‘ယော သော ဗုဒ္ဓံ အဘောဇေသိ၊ သတ္တာဟံ သဟသာဝကံ.

၁၁၄. ‘‘‘ဂုဏဉ္စ မေ ပကိတ္တေသိ၊ ပသန္နော သေဟိ ပါဏိဘိ၊

ဧသော ပတ္ထယတေ ဌာနံ၊ ဝါဒိသူဒဿ ဘိက္ခုနော.

၁၁၅. ‘‘‘အနာဂတမှိ အဒ္ဓါနေ၊ လစ္ဆသေ တံ မနောရထံ၊

ဒေဝမာနုသသမ္ပတ္တိံ၊ အနုဘောတွာ အနပ္ပကံ.

၁၁၆. ‘‘‘သတသဟဿိတော ကပ္ပေ၊ ဩက္ကာကကုလသမ္ဘဝေါ၊

ဂေါတမော နာမ ဂေါတ္တေန၊ သတ္ထာ လောကေ ဘဝိဿတိ.

၁၁၇. ‘‘‘တဿ ဓမ္မေသု ဒါယာဒေါ၊ ဩရသော ဓမ္မနိမ္မိတော၊

ဝင်္ဂီသော နာမ နာမေန၊ ဟေဿတိ သတ္ထု သာဝကော’.

၁၁၈. ‘‘တံ သုတွာ မုဒိတော ဟုတွာ၊ ယာဝဇီဝံ တဒါ ဇိနံ၊

ပစ္စယေဟိ ဥပဋ္ဌာသိံ၊ မေတ္တစိတ္တော တထာဂတံ.

၁၁၉. ‘‘တေန ကမ္မေန သုကတေန၊ စေတနာပဏိဓီဟိ စ၊

ဇဟိတွာ မာနုသံ ဒေဟံ၊ တုသိတံ [တာဝတိံသံ (သျာ.)] အဂမာသဟံ.

၁၂၀. ‘‘ပစ္ဆိမေ စ ဘဝေ ဒါနိ၊ ဇာတော ဝိပ္ပကုလေ [ပရိဗ္ဗာဇကုလေ (သီ. သျာ. ပီ.)] အဟံ၊

ပစ္စာဇာတော [သမ္ပတ္တော စ (က.)] ယဒါ အာသိံ၊ ဇာတိယာ သတ္တဝဿိကော.

၁၂၁. ‘‘သဗ္ဗဝေဒဝိဒူ ဇာတော၊ ဝါဒသတ္ထဝိသာရဒေါ၊

ဝါဒိဿရော [ဝဂ္ဂုဿရော (သျာ. ပီ.)] စိတ္တကထီ၊ ပရဝါဒပ္ပမဒ္ဒနော.

၁၂၂. ‘‘ဝင်္ဂေ ဇာတောတိ ဝင်္ဂီသော၊ ဝစနေ ဣဿရောတိ ဝါ၊

ဝင်္ဂီသော ဣတိ မေ နာမံ၊ အဘဝီ လောကသမ္မတံ.

၁၂၃. ‘‘ယဒါဟံ ဝိညုတံ ပတ္တော၊ ဌိတော ပဌမယောဗ္ဗနေ၊

တဒါ ရာဇဂဟေ ရမ္မေ၊ သာရိပုတ္တမဟဒ္ဒသံ [မထဒ္ဒသံ (သီ. ပီ.)၊ စ အဒ္ဒသံ (သျာ.)].

ပဉ္စဝီသတိမံ ဘာဏဝါရံ.

၁၂၄. ‘‘ပိဏ္ဍာယ ဝိစရန္တံ တံ၊ ပတ္တပါဏိံ သုသံဝုတံ၊

အလောလက္ခိံ မိတဘာဏိံ၊ ယုဂမတ္တံ နိဒက္ခိတံ [နိရိက္ခတံ (သီ. ပီ.)၊ ဥဒိက္ခတံ (သျာ.)].

၁၂၅. ‘‘တံ ဒိသွာ ဝိမှိတော ဟုတွာ၊ အဝေါစံ မမနုစ္ဆဝံ [မနနုစ္ဆဝံ (သီ. သျာ.)]၊

ကဏိကာရံဝ နိစိတံ [ကဏိကာရပရိစိတံ (ပီ.)၊ ခဏိကံ ဌာနရစိတံ (သီ.)]၊ စိတ္တံ ဂါထာပဒံ အဟံ.

၁၂၆. ‘‘အာစိက္ခိ သော မေ သတ္ထာရံ၊ သမ္ဗုဒ္ဓံ လောကနာယကံ၊

တဒါ သော ပဏ္ဍိတော ဝီရော၊ ဥတ္တရိံ [ဥတ္တရံ (သီ. ပီ.)] သမဝေါစ မေ.

၁၂၇. ‘‘ဝိရာဂသံဟိတံ ဝါကျံ၊ ကတွာ ဒုဒ္ဒသမုတ္တမံ၊

ဝိစိတ္တပဋိဘာနေဟိ၊ တောသိတော တေန တာဒိနာ.

၁၂၈. ‘‘နိပစ္စ သိရသာ ပါဒေ၊ ‘ပဗ္ဗာဇေဟီ’တိ မံ ဗြဝိ၊

တတော မံ သ မဟာပညော၊ ဗုဒ္ဓသေဋ္ဌမုပါနယိ.

၁၂၉. ‘‘နိပစ္စ သိရသာ ပါဒေ၊ နိသီဒိံ သတ္ထု သန္တိကေ၊

မမာဟ ဝဒတံ သေဋ္ဌော၊ ကစ္စိ ဝင်္ဂီသ ဇာနာသိ [သစ္စံ ဝင်္ဂီသ ကစ္စိ တေ (သျာ.)].

၁၃၀. ‘‘ကိဉ္စိ သိပ္ပန္တိ တဿာဟံ၊ ‘ဇာနာမီ’တိ စ အဗြဝိံ၊

မတသီသံ ဝနစ္ဆုဒ္ဓံ၊ အပိ ဗာရသဝဿိကံ၊

တဝ ဝိဇ္ဇာဝိသေသေန၊ သစေ သက္ကောသိ ဝါစယ [ဘာသယ (သီ. ပီ.)].

၁၃၁. ‘‘အာမောတိ မေ ပဋိညာတေ၊ တီဏိ သီသာနိ ဒဿယိ၊

နိရယနရဒေဝေသု၊ ဥပပန္နေ အဝါစယိံ.

၁၃၂. ‘‘တဒါ ခီဏာသဝဿေဝ [ပစ္စေကဗုဒ္ဓဿ (သီ. ပီ.)]၊ သီသံ ဒဿေသိ နာယကော၊

တတောဟံ ဝိဟတာရဗ္ဘော၊ ပဗ္ဗဇ္ဇံ သမယာစိသံ.

၁၃၃. ‘‘ပဗ္ဗဇိတွာန သုဂတံ၊ သန္ထဝါမိ တဟိံ တဟိံ၊

တတော မံ ကဗ္ဗဝိတ္တောသိ [ကဝိစိတ္တောတိ (သျာ. ပီ.)]၊ ဥဇ္ဈာယန္တိဟ ဘိက္ခဝေါ.

၁၃၄. ‘‘တတော ဝီမံသနတ္ထံ မေ၊ အာဟ ဗုဒ္ဓေါ ဝိနာယကော၊

တက္ကိကာ ပနိမာ ဂါထာ၊ ဌာနသော ပဋိဘန္တိ တံ.

၁၃၅. ‘‘န ကဗ္ဗဝိတ္တောဟံ ဝီရ၊ ဌာနသော ပဋိဘန္တိ မံ၊

တေန ဟိ ဒါနိ ဝင်္ဂီသ၊ ဌာနသော သန္ထဝါဟိ မံ.

၁၃၆. ‘‘တဒါဟံ သန္ထဝိံ ဝီရံ၊ ဂါထာဟိ ဣသိသတ္တမံ၊

ဌာနသော မေ တဒါ တုဋ္ဌော၊ ဇိနော အဂ္ဂေ ဌပေသိ မံ.

၁၃၇. ‘‘ပဋိဘာနေန စိတ္တေန၊ အညေသမတိမညဟံ၊

ပေသလေ တေန သံဝိဂ္ဂေါ၊ အရဟတ္တမပါပုဏိံ.

၁၃၈. ‘‘‘ပဋိဘာနဝတံ အဂ္ဂေါ၊ အညော ကောစိ န ဝိဇ္ဇတိ၊

ယထာယံ ဘိက္ခု ဝင်္ဂီသော၊ ဧဝံ ဓာရေထ ဘိက္ခဝေါ’.

၁၃၉. ‘‘သတသဟဿေ ကတံ ကမ္မံ၊ ဖလံ ဒဿေသိ မေ ဣဓ၊

သုမုတ္တော သရဝေဂေါဝ ကိလေသေ ဈာပယိံ မမ.

၁၄၀. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝေါ.

၁၄၁. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.

၁၄၂. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဝင်္ဂီသော ထေရော ဣမာ ဂါထာယော

အဘာသိတ္ထာတိ.

ဝင်္ဂီသတ္ထေရဿာပဒါနံ စတုတ္ထံ.