၂. ကင်္ခါရေဝတတ္ထေရအပဒါနံ

၃၄. ‘‘ပဒုမုတ္တရော နာမ ဇိနော၊ သဗ္ဗဓမ္မေသု စက္ခုမာ၊

ဣတော သတသဟဿမှိ၊ ကပ္ပေ ဥပ္ပဇ္ဇိ နာယကော.

၃၅. ‘‘သီဟဟနု ဗြဟ္မဂိရော၊ ဟံသဒုန္ဒုဘိနိဿနော [ဟံသဒုန္ဒုဘိနိဿရော (သီ.) ။ နိဿဝနော (ပီ.) ။ သာဝနော (သျာ.)]၊

နာဂဝိက္ကန္တဂမနော၊ စန္ဒသူရာဒိကပ္ပဘော.

၃၆. ‘‘မဟာမတီ မဟာဝီရော၊ မဟာဈာယီ မဟာဗလော [မဟာဂတိ (သျာ.)၊ မဟာဟိတော (ပီ.)]၊

မဟာကာရုဏိကော နာထော၊ မဟာတမပနူဒနော [မဟာတမဝိဓံသနော (သျာ.)၊ မဟာတမနိသူဒနော (ပီ.)].

၃၇. ‘‘သ ကဒါစိ တိလောကဂ္ဂေါ၊ ဝေနေယျံ ဝိနယံ ဗဟုံ [ဝေနေယျေ ဝိနိယံ ဗဟူ (သီ.)]၊

ဓမ္မံ ဒေသေသိ သမ္ဗုဒ္ဓေါ၊ သတ္တာသယဝိဒူ မုနိ.

၃၈. ‘‘ဈာယိံ ဈာနရတံ ဝီရံ၊ ဥပသန္တံ အနာဝိလံ၊

ဝဏ္ဏယန္တော ပရိသတိံ၊ တောသေသိ [တောသေတိ (သျာ. ပီ. က.)] ဇနတံ ဇိနော.

၃၉. ‘‘တဒါဟံ ဟံသဝတိယံ၊ ဗြာဟ္မဏော ဝေဒပါရဂူ၊

ဓမ္မံ သုတွာန မုဒိတော၊ တံ ဌာနမဘိပတ္ထယိံ.

၄၀. ‘‘တဒါ ဇိနော ဝိယာကာသိ၊ သံဃမဇ္ဈေ ဝိနာယကော၊

‘မုဒိတော ဟောဟိ တွံ ဗြဟ္မေ၊ လစ္ဆသေ တံ မနောရထံ.

၄၁. ‘‘‘သတသဟဿိတော ကပ္ပေ၊ ဩက္ကာကကုလသမ္ဘဝေါ၊

ဂေါတမော နာမ ဂေါတ္တေန၊ သတ္ထာ လောကေ ဘဝိဿတိ.

၄၂. ‘‘‘တဿ ဓမ္မေသု ဒါယာဒေါ၊ ဩရသော ဓမ္မနိမ္မိတော၊

ရေဝတော နာမ နာမေန၊ ဟေဿတိ သတ္ထု သာဝကော’.

၄၃. ‘‘တေန ကမ္မေန သုကတေန၊ စေတနာပဏိဓီဟိ စ၊

ဇဟိတွာ မာနုသံ ဒေဟံ၊ တာဝတိံသမဂစ္ဆဟံ.

၄၄. ‘‘ပစ္ဆိမေ စ ဘဝေ ဒါနိ၊ ဇာတောဟံ ကောလိယေ ပုရေ၊

ခတ္တိယေ ကုလသမ္ပန္နေ၊ ဣဒ္ဓေ ဖီတေ မဟဒ္ဓနေ.

၄၅. ‘‘ယဒါ ကပိလဝတ္ထုသ္မိံ၊ ဗုဒ္ဓေါ ဓမ္မမဒေသယိ၊

တဒါ ပသန္နော သုဂတေ၊ ပဗ္ဗဇိံ အနဂါရိယံ.

၄၆. ‘‘ကင်္ခါ မေ ဗဟုလာ အာသိ၊ ကပ္ပါကပ္ပေ တဟိံ တဟိံ၊

သဗ္ဗံ တံ ဝိနယီ ဗုဒ္ဓေါ၊ ဒေသေတွာ ဓမ္မမုတ္တမံ.

၄၇. ‘‘တတောဟံ တိဏ္ဏသံသာရော၊ သဒါ ဈာနသုခေ ရတော၊

ဝိဟရာမိ တဒါ ဗုဒ္ဓေါ၊ မံ ဒိသွာ ဧတဒဗြဝိ.

၄၈. ‘‘‘ယာ ကာစိ ကင်္ခါ ဣဓ ဝါ ဟုရံ ဝါ၊ သကဝေဒိယာ ဝါ ပရဝေဒိယာ ဝါ၊

ယေ ဈာယိနော တာ ပဇဟန္တိ သဗ္ဗာ၊ အာတာပိနော ဗြဟ္မစရိယံ စရန္တာ’.

၄၉. ‘‘သတသဟဿေ ကတံ ကမ္မံ၊ ဖလံ ဒဿေသိ မေ ဣဓ၊

သုမုတ္တော သရဝေဂေါဝ ကိလေသေ ဈာပယိံ မမ.

၅၀. ‘‘တတော ဈာနရတံ ဒိသွာ၊ ဗုဒ္ဓေါ လောကန္တဂူ မုနိ၊

ဈာယီနံ ဘိက္ခူနံ အဂ္ဂေါ၊ ပညာပေတိ မဟာမတိ.

၅၁. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝေါ.

၅၂. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.

၅၃. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ကင်္ခါရေဝတော ထေရော ဣမာ ဂါထာယော

အဘာသိတ္ထာတိ.

ကင်္ခါရေဝတတ္ထေရဿာပဒါနံ ဒုတိယံ.