၄. ပဋ္ဋိပုပ္ဖိယတ္ထေရအပဒါနံ

၂၂. ‘‘ယဒါ နိဗ္ဗာယိ သမ္ဗုဒ္ဓေါ၊ မဟေသီ ပဒုမုတ္တရော၊

သမာဂမ္မ ဇနာ သဗ္ဗေ၊ သရီရံ နီဟရန္တိ တေ.

၂၃. ‘‘နီဟရန္တေ သရီရမှိ၊ ဝဇ္ဇမာနာသု ဘေရိသု၊

ပသန္နစိတ္တော သုမနော၊ ပဋ္ဋိပုပ္ဖံ အပူဇယိံ.

၂၄. ‘‘သတသဟဿိတော ကပ္ပေ၊ ယံ ပုပ္ဖမဘိပူဇယိံ၊

ဒုဂ္ဂတိံ နာဘိဇာနာမိ၊ သရီရပူဇိတေ ဖလံ.

၂၅. ‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ၊

နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ.

၂၆. ‘‘သွာဂတံ ဝတ မေ အာသိ၊ မမ ဗုဒ္ဓဿ [ဗုဒ္ဓသေဋ္ဌဿ (သီ.)] သန္တိကေ၊

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ.

၂၇. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ပဋ္ဋိပုပ္ဖိယော ထေရော ဣမာ ဂါထာယော အဘာသိတ္ထာတိ.

ပဋ္ဋိပုပ္ဖိယတ္ထေရဿာပဒါနံ စတုတ္ထံ.