၃၈. ဗောဓိဝန္ဒနဝဂ္ဂေါ

၁. ဗောဓိဝန္ဒကတ္ထေရအပဒါနံ

၁. ‘‘ပါဋလိံ ဟရိတံ ဒိသွာ၊ ပါဒပံ ဓရဏီရုဟံ၊

ဧကံသံ အဉ္ဇလိံ ကတွာ၊ အဝန္ဒိံ ပါဋလိံ အဟံ.

၂. ‘‘အဉ္ဇလိံ ပဂ္ဂဟေတွာန၊ ဂရုံ ကတွာန မာနသံ၊

အန္တောသုဒ္ဓံ ဗဟိသုဒ္ဓံ၊ သုဝိမုတ္တမနာသဝံ.

၃. ‘‘ဝိပဿိံ လောကမဟိတံ၊ ကရုဏာဉာဏသာဂရံ၊

သမ္မုခါ ဝိယ သမ္ဗုဒ္ဓံ၊ အဝန္ဒိံ ပါဋလိံ အဟံ.

၄. ‘‘ဧကနဝုတိတော ကပ္ပေ၊ ယံ ဗောဓိမဘိဝန္ဒဟံ၊

ဒုဂ္ဂတိံ နာဘိဇာနာမိ၊ ဝန္ဒနာယ ဣဒံ ဖလံ.

၅. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဗောဓိဝန္ဒကော ထေရော ဣမာ ဂါထာယော အဘာသိတ္ထာတိ.

ဗောဓိဝန္ဒကတ္ထေရဿာပဒါနံ ပဌမံ.

၂. ပါဋလိပုပ္ဖိယတ္ထေရအပဒါနံ

၆. ‘‘ဝိပဿီ နာမ ဘဂဝါ၊ သယမ္ဘူ အဂ္ဂပုဂ္ဂလော၊

ပုရက္ခတော သသိဿေဟိ၊ ပါဝိသိ ဗန္ဓုမံ ဇိနော.

၇. ‘‘တီဏိ ပါဋလိပုပ္ဖါနိ၊ ဥစ္ဆင်္ဂေ ဌပိတာနိ မေ၊

သီသံ နှာယိတုကာမောဝ၊ နဒီတိတ္ထံ အဂစ္ဆဟံ.

၈. ‘‘နိက္ခမ္မ ဗန္ဓုမတိယာ၊ အဒ္ဒသံ လောကနာယကံ၊

ဣန္ဒီဝရံဝ ဇလိတံ၊ အာဒိတ္တံဝ ဟုတာသနံ.

၉. ‘‘ဗျဂ္ဃူသဘံဝ ပဝရံ၊ အဘိဇာတံဝ ကေသရိံ၊

ဂစ္ဆန္တံ သမဏာနဂ္ဂံ၊ ဘိက္ခုသံဃပုရက္ခတံ.

၁၀. ‘‘တသ္မိံ ပသန္နော [သမဏေ (က.)] သုဂတေ၊ ကိလေသမလဓောဝနေ၊

ဂဟေတွာ တီဏိ ပုပ္ဖါနိ၊ ဗုဒ္ဓသေဋ္ဌံ အပူဇယိံ.

၁၁. ‘‘ဧကနဝုတိတော ကပ္ပေ၊ ယံ ပုပ္ဖမဘိပူဇယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၁၂. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ပါဋလိပုပ္ဖိယော ထေရော ဣမာ ဂါထာယော အဘာသိတ္ထာတိ.

ပါဋလိပုပ္ဖိယတ္ထေရဿာပဒါနံ ဒုတိယံ.

၃. တီဏုပ္ပလမာလိယတ္ထေရအပဒါနံ

၁၃. ‘‘စန္ဒဘာဂါနဒီတီရေ၊ အဟောသိံ ဝါနရော တဒါ၊

အဒ္ဒသံ ဝိရဇံ ဗုဒ္ဓံ၊ နိသိန္နံ ပဗ္ဗတန္တရေ.

၁၄. ‘‘ဩဘာသေန္တံ ဒိသာ သဗ္ဗာ၊ သာလရာဇံဝ ဖုလ္လိတံ၊

လက္ခဏဗျဉ္ဇနူပေတံ၊ ဒိသွာနတ္တမနော အဟံ.

၁၅. ‘‘ဥဒဂ္ဂစိတ္တော သုမနော၊ ပီတိယာ ဟဋ္ဌမာနသော၊

တီဏိ ဥပ္ပလပုပ္ဖါနိ၊ မတ္ထကေ အဘိရောပယိံ.

၁၆. ‘‘ပူဇယိတွာန ပုပ္ဖါနိ၊ ဖုဿဿာဟံ မဟေသိနော၊

သဂါရဝေါ ဘဝိတွာန၊ ပက္ကာမိံ ဥတ္တရာမုခေါ.

၁၇. ‘‘ဂစ္ဆန္တော ပဋိကုဋိကော၊ ဝိပ္ပသန္နေန စေတသာ၊

သေလန္တရေ ပတိတွာန၊ ပါပုဏိံ ဇီဝိတက္ခယံ.

၁၈. ‘‘တေန ကမ္မေန သုကတေန၊ စေတနာပဏိဓီဟိ စ၊

ဇဟိတွာ ပုရိမံ ဇာတိံ၊ တာဝတိံသမဂစ္ဆဟံ.

၁၉. ‘‘သတာနံ တီဏိက္ခတ္တုဉ္စ၊ ဒေဝရဇ္ဇမကာရယိံ၊

သတာနံ ပဉ္စက္ခတ္တုဉ္စ၊ စက္ကဝတ္တီ အဟောသဟံ.

၂၀. ‘‘ဒွေနဝုတေ ဣတော ကပ္ပေ၊ ယံ ပုပ္ဖမဘိပူဇယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၂၁. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ တီဏုပ္ပလမာလိယော ထေရော ဣမာ ဂါထာယော အဘာသိတ္ထာတိ.

တီဏုပ္ပလမာလိယတ္ထေရဿာပဒါနံ တတိယံ.

၄. ပဋ္ဋိပုပ္ဖိယတ္ထေရအပဒါနံ

၂၂. ‘‘ယဒါ နိဗ္ဗာယိ သမ္ဗုဒ္ဓေါ၊ မဟေသီ ပဒုမုတ္တရော၊

သမာဂမ္မ ဇနာ သဗ္ဗေ၊ သရီရံ နီဟရန္တိ တေ.

၂၃. ‘‘နီဟရန္တေ သရီရမှိ၊ ဝဇ္ဇမာနာသု ဘေရိသု၊

ပသန္နစိတ္တော သုမနော၊ ပဋ္ဋိပုပ္ဖံ အပူဇယိံ.

၂၄. ‘‘သတသဟဿိတော ကပ္ပေ၊ ယံ ပုပ္ဖမဘိပူဇယိံ၊

ဒုဂ္ဂတိံ နာဘိဇာနာမိ၊ သရီရပူဇိတေ ဖလံ.

၂၅. ‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ၊

နာဂေါဝ ဗန္ဓနံ ဆေတွာ၊ ဝိဟရာမိ အနာသဝေါ.

၂၆. ‘‘သွာဂတံ ဝတ မေ အာသိ၊ မမ ဗုဒ္ဓဿ [ဗုဒ္ဓသေဋ္ဌဿ (သီ.)] သန္တိကေ၊

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ.

၂၇. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ပဋ္ဋိပုပ္ဖိယော ထေရော ဣမာ ဂါထာယော အဘာသိတ္ထာတိ.

ပဋ္ဋိပုပ္ဖိယတ္ထေရဿာပဒါနံ စတုတ္ထံ.

၅. သတ္တပဏ္ဏိယတ္ထေရအပဒါနံ

၂၈. ‘‘သုမနော နာမ သမ္ဗုဒ္ဓေါ၊ ဥပ္ပဇ္ဇိ လောကနာယကော၊

ပသန္နစိတ္တော သုမနော၊ သတ္တပဏ္ဏိမပူဇယိံ.

၂၉. ‘‘သတသဟဿိတော ကပ္ပေ၊ သတ္တပဏ္ဏိမပူဇယိံ၊

ဒုဂ္ဂတိံ နာဘိဇာနာမိ၊ သတ္တပဏ္ဏိပူဇာယိဒံ [သတ္တပဏ္ဏိဿိဒံ (သီ.)] ဖလံ.

၃၀. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝေါ.

၃၁. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.

၃၂. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ သတ္တပဏ္ဏိယော ထေရော ဣမာ ဂါထာယော အဘာသိတ္ထာတိ.

သတ္တပဏ္ဏိယတ္ထေရဿာပဒါနံ ပဉ္စမံ.

၆. ဂန္ဓမုဋ္ဌိယတ္ထေရအပဒါနံ

၃၃. [ဣဓ ဂါထာဒ္ဓံ ဦနံ ဝိယ ဒိဿတိ] ‘‘စိတကေ ကရီယမာနေ၊ နာနာဂန္ဓေ သမာဟတေ၊

ပသန္နစိတ္တော သုမနော၊ ဂန္ဓမုဋ္ဌိမပူဇယိံ.

၃၄. ‘‘သတသဟဿိတော ကပ္ပေ၊ စိတကံ ယံ အပူဇယိံ၊

ဒုဂ္ဂတိံ နာဘိဇာနာမိ၊ စိတပူဇာယိဒံ ဖလံ.

၃၅. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝေါ.

၃၆. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.

၃၇. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဂန္ဓမုဋ္ဌိယော ထေရော ဣမာ ဂါထာယော အဘာသိတ္ထာတိ.

ဂန္ဓမုဋ္ဌိယတ္ထေရဿာပဒါနံ ဆဋ္ဌံ.

၇. စိတကပူဇကတ္ထေရအပဒါနံ

၃၈. ‘‘ပရိနိဗ္ဗုတေ ဘဂဝတိ၊ ဇလဇုတ္တမနာမကေ၊

အာရောပိတမှိ စိတကေ၊ သာလပုပ္ဖမပူဇယိံ.

၃၉. ‘‘သတသဟဿိတော ကပ္ပေ၊ ယံ ပုပ္ဖမဘိပူဇယိံ၊

ဒုဂ္ဂတိံ နာဘိဇာနာမိ၊ စိတပူဇာယိဒံ ဖလံ.

၄၀. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝေါ.

၄၁. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.

၄၂. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ စိတကပူဇကော ထေရော ဣမာ ဂါထာယော အဘာသိတ္ထာတိ.

စိတကပူဇကတ္ထေရဿာပဒါနံ သတ္တမံ.

၈. သုမနတာလဝဏ္ဋိယတ္ထေရအပဒါနံ

၄၃. ‘‘သိဒ္ဓတ္ထဿ ဘဂဝတော၊ တာလဝဏ္ဋမဒါသဟံ၊

သုမနေဟိ ပဋိစ္ဆန္နံ၊ ဓာရယာမိ မဟာရဟံ.

၄၄. ‘‘စတုန္နဝုတိတော ကပ္ပေ၊ တာလဝဏ္ဋမဒါသဟံ၊

ဒုဂ္ဂတိံ နာဘိဇာနာမိ၊ တာလဝဏ္ဋဿိဒံ ဖလံ.

၄၅. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝေါ.

၄၆. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.

၄၇. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ သုမနတာလဝဏ္ဋိယော ထေရော ဣမာ ဂါထာယော အဘာသိတ္ထာတိ.

သုမနတာလဝဏ္ဋိယတ္ထေရဿာပဒါနံ အဋ္ဌမံ.

၉. သုမနဒါမိယတ္ထေရအပဒါနံ

၄၈. ‘‘သိဒ္ဓတ္ထဿ ဘဂဝတော၊ နှာတကဿ တပဿိနော၊

ကတွာန သုမနဒါမံ၊ ဓာရယိံ ပုရတော ဌိတော.

၄၉. ‘‘စတုန္နဝုတိတော ကပ္ပေ၊ ယံ ဒါမံ ဓာရယိံ တဒါ၊

ဒုဂ္ဂတိံ နာဘိဇာနာမိ၊ သုမနဓာရဏေ ဖလံ.

၅၀. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝေါ.

၅၁. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.

၅၂. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ သုမနဒါမိယော ထေရော ဣမာ ဂါထာယော အဘာသိတ္ထာတိ.

သုမနဒါမိယတ္ထေရဿာပဒါနံ နဝမံ.

၁၀. ကာသုမာရိဖလဒါယကတ္ထေရအပဒါနံ

၅၃. ‘‘ကဏိကာရံဝ ဇောတန္တံ၊ နိသိန္နံ ပဗ္ဗတန္တရေ၊

အဒ္ဒသံ ဝိရဇံ ဗုဒ္ဓံ၊ လောကဇေဋ္ဌံ နရာသဘံ.

၅၄. ‘‘ပသန္နစိတ္တော သုမနော၊ သိရေ ကတွာန အဉ္ဇလိံ၊

ကာသုမာရိဖလံ ဂယှ၊ ဗုဒ္ဓသေဋ္ဌဿဒါသဟံ.

၅၅. ‘‘ဧကတ္တိံသေ ဣတော ကပ္ပေ၊ ယံ ဖလမဒဒိံ အဟံ၊

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ.

၅၆. ‘‘ကိလေသာ ဈာပိတာ မယှံ။ပေ။ ဝိဟရာမိ အနာသဝေါ.

၅၇. ‘‘သွာဂတံ ဝတ မေ အာသိ။ပေ။ ကတံ ဗုဒ္ဓဿ သာသနံ.

၅၈. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ကာသုမာရိဖလဒါယကော ထေရော ဣမာ ဂါထာယော အဘာသိတ္ထာတိ.

ကာသုမာရိဖလဒါယကတ္ထေရဿာပဒါနံ ဒသမံ.

ဗောဓိဝန္ဒနဝဂ္ဂေါ အဋ္ဌတိံသတိမော.