၇. ဝိဟာရကာရသိက္ခာပဒဝဏ္ဏနာ

၃၆၅. တေန သမယေနာတိ ဝိဟာရကာရသိက္ခာပဒံ. တတ္ထ ကောသမ္ဗိယန္တိ ဧဝံနာမကေ နဂရေ. ဃောသိတာရာမေတိ ဃောသိတဿ အာရာမေ. ဃောသိတနာမကေန ကိရ သေဋ္ဌိနာ သော ကာရိတော၊ တသ္မာ ‘‘ဃောသိတာရာမော’’တိ ဝုစ္စတိ. ဆန္နဿာတိ ဗောဓိသတ္တကာလေ ဥပဋ္ဌာကဆန္နဿ. ဝိဟာရဝတ္ထုံ၊ ဘန္တေ၊ ဇာနာဟီတိ ဝိဟာရဿ ပတိဋ္ဌာနဋ္ဌာနံ၊ ဘန္တေ၊ ဇာနာဟိ. ဧတ္ထ စ ဝိဟာရောတိ န သကလဝိဟာရော၊ ဧကော အာဝါသော၊ တေနေဝါဟ – ‘‘အယျဿ ဝိဟာရံ ကာရာပေဿာမီ’’တိ.

စေတိယရုက္ခန္တိ ဧတ္ထ စိတ္တီကတဋ္ဌေန စေတိယံ၊ ပူဇာရဟာနံ ဒေဝဋ္ဌာနာနမေတံ အဓိဝစနံ၊ ‘‘စေတိယ’’န္တိ သမ္မတံ ရုက္ခံ စေတိယရုက္ခံ. ဂါမေန ပူဇိတံ ဂါမဿ ဝါ ပူဇိတန္တိ ဂါမပူဇိတံ. ဧသေဝ နယော သေသပဒေသုပိ. အပိစေတ္ထ ဇနပဒေါတိ ဧကဿ ရညော ရဇ္ဇေ ဧကေကော ကောဋ္ဌာသော. ရဋ္ဌန္တိ သကလရဇ္ဇံ ဝေဒိတဗ္ဗံ၊ သကလရဇ္ဇမ္ပိ ဟိ ကဒါစိ ကဒါစိ တဿ ရုက္ခဿ ပူဇံ ကရောတိ၊ တေန ဝုတ္တံ ‘‘ရဋ္ဌပူဇိတ’’န္တိ. ဧကိန္ဒြိယန္တိ ကာယိန္ဒြိယံ သန္ဓာယ ဝဒန္တိ. ဇီဝသညိနောတိ သတ္တသညိနော.

၃၆၆. မဟလ္လကန္တိ သဿာမိကဘာဝေန သံယာစိကကုဋိတော မဟန္တဘာဝေါ ဧတဿ အတ္ထီတိ မဟလ္လကော. ယသ္မာ ဝါ ဝတ္ထုံ ဒေသာပေတွာ ပမာဏာတိက္ကမေနပိ ကာတုံ ဝဋ္ဋတိ၊ တသ္မာ ပမာဏမဟန္တတာယပိ မဟလ္လကော၊ တံ မဟလ္လကံ. ယသ္မာ ပနဿ တံ ပမာဏမဟတ္တံ သဿာမိကတ္တာဝ လဗ္ဘတိ၊ တသ္မာ တဒတ္ထဒဿနတ္ထံ ‘‘မဟလ္လကော နာမ ဝိဟာရော သဿာမိကော ဝုစ္စတီ’’တိ ပဒဘာဇနံ ဝုတ္တံ. သေသံ သဗ္ဗံ ကုဋိကာရသိက္ခာပဒေ ဝုတ္တနယေနေဝ ဝေဒိတဗ္ဗံ သဒ္ဓိံ သမုဋ္ဌာနာဒီဟိ. သဿာမိကဘာဝမတ္တမေဝ ဟိ ဧတ္ထ ကိရိယတော သမုဋ္ဌာနာဘာဝေါ ပမာဏနိယမာဘာဝေါ စ ဝိသေသော၊ ပမာဏနိယမာဘာဝါ စ စတုက္ကပါရိဟာနီတိ.

ဝိဟာရကာရသိက္ခာပဒဝဏ္ဏနာ နိဋ္ဌိတာ.