၁၂. ဒုဗ္ဗစသိက္ခာပဒဝဏ္ဏနာ

၄၂၄. တေန သမယေန ဗုဒ္ဓေါ ဘဂဝါတိ ဒုဗ္ဗစသိက္ခာပဒံ. တတ္ထ အနာစာရံ အာစရတီတိ အနေကပ္ပကာရံ ကာယဝစီဒွါရဝီတိက္ကမံ ကရောတိ. ကိံ နု ခေါ နာမာတိ ဝမ္ဘနဝစနမေတံ. အဟံ ခေါ နာမာတိ ဥက္ကံသဝစနံ. တုမှေ ဝဒေယျန္တိ ‘‘ဣဒံ ကရောထ၊ ဣဒံ မာ ကရောထာ’’တိ အဟံ တုမှေ ဝတ္တုံ အရဟာမီတိ ဒဿေတိ. ကသ္မာတိ စေ? ယသ္မာ အမှာကံ ဗုဒ္ဓေါ ဘဂဝါ ကဏ္ဋကံ အာရုယှ မယာ သဒ္ဓိံ နိက္ခမိတွာ ပဗ္ဗဇိတောတိဧဝမာဒိမတ္ထံ သန္ဓာယာဟ. ‘‘အမှာကံ ဓမ္မော’’တိ ဝတွာ ပန အတ္တနော သန္တကဘာဝေ ယုတ္တိံ ဒဿေန္တော ‘‘အမှာကံ အယျပုတ္တေန ဓမ္မော အဘိသမိတော’’တိ အာဟ. ယသ္မာ အမှာကံ အယျပုတ္တေန စတုသစ္စဓမ္မော ပဋိဝိဒ္ဓေါ၊ တသ္မာ ဓမ္မောပိ အမှာကန္တိ ဝုတ္တံ ဟောတိ. သံဃံ ပန အတ္တနော ဝေရိပက္ခေ ဌိတံ မညမာနော အမှာကံ သံဃောတိ န ဝဒတိ. ဥပမံ ပန ဝတွာ သံဃံ အပသာဒေတုကာမော ‘‘သေယျထာပိ နာမာ’’တိအာဒိမာဟ. တိဏကဋ္ဌပဏ္ဏသဋန္တိ တတ္ထ တတ္ထ ပတိတံ တိဏကဋ္ဌပဏ္ဏံ. အထ ဝါ တိဏဉ္စ နိဿာရကံ လဟုကံ ကဋ္ဌဉ္စ တိဏကဋ္ဌံ. ပဏ္ဏသဋန္တိ ပုရာဏပဏ္ဏံ. ဥဿာရေယျာတိ ရာသိံ ကရေယျ.

ပဗ္ဗတေယျာတိ ပဗ္ဗတပ္ပဘဝါ၊ သာ ဟိ သီဃသောတာ ဟောတိ၊ တသ္မာ တမေဝ ဂဏှာတိ. သင်္ခသေဝါလပဏကန္တိ ဧတ္ထ သင်္ခေါတိ ဒီဃမူလကော ပဏ္ဏသေဝါလော ဝုစ္စတိ. သေဝါလောတိ နီလသေဝါလော၊ အဝသေသော ဥဒကပပ္ပဋကတိလဗီဇကာဒိ သဗ္ဗောပိ ပဏကောတိ သင်္ချံ ဂစ္ဆတိ. ဧကတော ဥဿာရိတာတိ ဧကဋ္ဌာနေ ကေနာပိ သမ္ပိဏ္ဍိတာ ရာသီကတာတိ ဒဿေတိ.

၄၂၅-၆. ဒုဗ္ဗစဇာတိကောတိ ဒုဗ္ဗစသဘာဝေါ ဝတ္တုံ အသက္ကုဏေယျောတိ အတ္ထော. ပဒဘာဇနေပိဿ ဒုဗ္ဗစောတိ ဒုက္ခေန ကိစ္ဆေန ဝဒိတဗ္ဗော၊ န သက္ကာ သုခေန ဝတ္တုန္တိ အတ္ထော. ဒေါဝစဿကရဏေဟီတိ ဒုဗ္ဗစဘာဝကရဏီယေဟိ၊ ယေ ဓမ္မာ ဒုဗ္ဗစံ ပုဂ္ဂလံ ကရောန္တိ၊ တေဟိ သမန္နာဂတောတိ အတ္ထော. တေ ပန ‘‘ကတမေ စ၊ အာဝုသော၊ ဒေါဝစဿကရဏာ ဓမ္မာ? ဣဓာဝုသော၊ ဘိက္ခု ပါပိစ္ဆော ဟောတီ’’တိအာဒိနာ နယေန ပဋိပါဋိယာ အနုမာနသုတ္တေ (မ. နိ. ၁.၁၈၁) အာဂတာ ပါပိစ္ဆတာ၊ အတ္တုက္ကံသကပရဝမ္ဘကတာ၊ ကောဓနတာ၊ ကောဓဟေတု ဥပနာဟိတာ၊ ကောဓဟေတုအဘိသင်္ဂိတာ၊ ကောဓဟေတုကောဓသာမန္တဝါစာနိစ္ဆာရဏတာ၊ စောဒကံ ပဋိပ္ဖရဏတာ၊ စောဒကံ အပသာဒနတာ၊ စောဒကဿ ပစ္စာရောပနတာ၊ အညေန အညံပဋိစရဏတာ၊ အပဒါနေန န သမ္ပာယနတာ၊ မက္ခိပဠာသိတာ၊ ဣဿုကီမစ္ဆရိတာ၊ သဌမာယာဝိတာ၊ ထဒ္ဓါတိမာနိတာ၊ သန္ဒိဋ္ဌိပရာမာသိအာဓာနဂ္ဂဟိဒုပ္ပဋိနိဿဂ္ဂိတာတိ ဧကူနဝီသတိ ဓမ္မာ ဝေဒိတဗ္ဗာ.

ဩဝါဒံ နက္ခမတိ န သဟတီတိ အက္ခမော. ယထာနုသိဋ္ဌံ အပ္ပဋိပဇ္ဇနတော ပဒက္ခိဏေန အနုသာသနိံ န ဂဏှာတီတိ အပ္ပဒက္ခိဏဂ္ဂါဟီ အနုသာသနိံ.

ဥဒ္ဒေသပရိယာပန္နေသူတိ ဥဒ္ဒေသေ ပရိယာပန္နေသု အန္တောဂဓေသု. ‘‘ယဿ သိယာ အာပတ္တိ၊ သော အာဝိကရေယျာ’’တိ ဧဝံ သင်္ဂဟိတတ္တာ အန္တော ပါတိမောက္ခဿ ဝတ္တမာနေသူတိ အတ္ထော. သဟဓမ္မိကံ ဝုစ္စမာနောတိ သဟဓမ္မိကေန ဝုစ္စမာနော ကရဏတ္ထေ ဥပယောဂဝစနံ၊ ပဉ္စဟိ သဟဓမ္မိကေဟိ သိက္ခိတဗ္ဗတ္တာ တေသံ ဝါ သန္တကတ္တာ သဟဓမ္မိကန္တိ လဒ္ဓနာမေန ဗုဒ္ဓပညတ္တေန သိက္ခာပဒေန ဝုစ္စမာနောတိ အတ္ထော.

ဝိရမထာယသ္မန္တော မမ ဝစနာယာတိ ယေန ဝစနေန မံ ဝဒထ၊ တတော မမ ဝစနတော ဝိရမထ. မာ မံ တံ ဝစနံ ဝဒထာတိ ဝုတ္တံ ဟောတိ.

ဝဒတု သဟဓမ္မေနာတိ သဟဓမ္မိကေန သိက္ခာပဒေန သဟဓမ္မေန ဝါ အညေနပိ ပါသာဒိကဘာဝသံဝတ္တနိကေန ဝစနေန ဝဒတု. ယဒိဒန္တိ ဝုဍ္ဎိကာရဏနိဒဿနတ္ထေ နိပါတော. တေန ‘‘ယံ ဣဒံ အညမညဿ ဟိတဝစနံ အာပတ္တိတော ဝုဋ္ဌာပနဉ္စ တေန အညမညဝစနေန အညမညဝုဋ္ဌာပနေန စ သံဝဍ္ဎာ ပရိသာ’’တိ ဧဝံ ပရိသာယ ဝုဍ္ဎိကာရဏံ ဒဿိတံ ဟောတိ. သေသံ သဗ္ဗတ္ထ ဥတ္တာနမေဝ.

သမုဋ္ဌာနာဒီနိ ပဌမသံဃဘေဒသဒိသာနေဝါတိ.

ဒုဗ္ဗစသိက္ခာပဒဝဏ္ဏနာ နိဋ္ဌိတာ.