၆. ဆဋ္ဌသိက္ခာပဒဝဏ္ဏနာ
၉၀၉-၁၀. ဆဋ္ဌေ – အညံ ပရိက္ခာရန္တိ ယံကိဉ္စိ ထာလကာဒီနံ ဝါ သပ္ပိတေလာဒီနံ ဝါ အညတရံ. အာနိသံသန္တိ ‘‘ကိတ္တကံ အဂ္ဃနကံ ဒါတုကာမတ္ထာ’’တိ ပုစ္ဆတိ၊ ‘‘ဧတ္တကံ နာမာ’’တိ ဝဒန္တိ၊ ‘‘အာဂမေထ တာဝ၊ ဣဒါနိ ဝတ္ထံ မဟဂ္ဃံ၊ ကတိပါဟေန ကပ္ပါသေ အာဂတေ သမဂ္ဃံ ဘဝိဿတီ’’တိ ဧဝံ ဝတွာ နိဝါရေန္တိယာ အနာပတ္တိ. သေသံ ဥတ္တာနမေဝ.
တိသမုဋ္ဌာနံ – ကိရိယံ၊ သညာဝိမောက္ခံ၊ သစိတ္တကံ၊ လောကဝဇ္ဇံ၊ ကာယကမ္မံ၊ ဝစီကမ္မံ၊ အကုသလစိတ္တံ၊ တိဝေဒနန္တိ.
ဆဋ္ဌသိက္ခာပဒံ.