၅. ပဉ္စမသိက္ခာပဒဝဏ္ဏနာ
၈၅၄. ပဉ္စမေ – ဃရံ သောဓေန္တာတိ တေသံ ကိရ ဧတဒဟောသိ – ‘‘ထေရိယာ ကောစိ ကာယိကဝါစသိကော ဝီတိက္ကမော န ဒိဿတိ၊ ဃရမ္ပိ တာဝ သောဓေမာ’’တိ၊ တတော ဃရံ သောဓေန္တာ နံ အဒ္ဒသံသု.
၈၅၆. အနောဝဿကံ အတိက္ကာမေန္တိယာတိ ပဌမံ ပါဒံ အတိက္ကာမေန္တိယာ ဒုက္ကဋံ၊ ဒုတိယံ အတိက္ကာမေန္တိယာ ပါစိတ္တိယံ၊ ဥပစာရာတိက္ကမေ ဧသေဝ နယော.
၈၅၈. ဂိလာနာယာတိ ယာ တာဒိသေန ဂေလညေန အာပုစ္ဆိတုံ န သက္ကောတိ. အာပဒါသူတိ ဃရေ အဂ္ဂိ ဝါ ဥဋ္ဌိတော ဟောတိ၊ စောရာ ဝါ၊ ဧဝရူပေ ဥပဒ္ဒဝေ အနာပုစ္ဆာ ပက္ကမတိ၊ အနာပတ္တိ. သေသမေတ္ထ ဥတ္တာနမေဝ.
ကထိနသမုဋ္ဌာနံ – ကာယဝါစတော ကာယဝါစာစိတ္တတော စ သမုဋ္ဌာတိ၊ ကိရိယာကိရိယံ၊ နောသညာဝိမောက္ခံ၊ အစိတ္တကံ၊ ပဏ္ဏတ္တိဝဇ္ဇံ၊ ကာယကမ္မံ၊ ဝစီကမ္မံ၊ တိစိတ္တံ၊ တိဝေဒနန္တိ.
ပဉ္စမသိက္ခာပဒံ.